ساۋدا قاتىناستارىن نىعايتۋ, وداقتىڭ ترانزيتتىك-كولىكتىك الەۋەتىن كۇشەيتۋ, ونەركاسىپ كووپەراتسياسىن دامىتۋ, اگروونەركاسىپ كەشەنى سالاسىنداعى ىنتىماقتاستىقتى ارتتىرۋ جانە ەكونوميكالىق ۇدەرىستەردى تسيفرلاندىرۋ ماسەلەلەرى قارالدى.
ولجاس بەكتەنوۆ ءوز سوزىندە ەاەو-نىڭ كولىك-لوگيستيكالىق نەگىزى مەن بايلانىسىن نىعايتۋعا ءارى دامىتۋعا ەرەكشە نازار اۋداردى.
«مامىرداعى سامميتتە قازاقستان پرەزيدەنتى قاسىم-جومارت توقاەۆ كولىك-لوگيستيكالىق ينفراقۇرىلىمدى جاڭعىرتۋ جانە كەڭەيتۋ قاجەتتىگىن ەرەكشە اتاپ ءوتتى. «سولتۇستىك – وڭتۇستىك» ءدالىزىنىڭ وتكىزۋ قابىلەتىن جىلىنا 10 ملن توننادان 20 ملن تونناعا دەيىن ارتتىرۋ جوسپارلانىپ وتىر. تەمىرجول سالاسىن دامىتۋدىڭ 2029 جىلعا دەيىنگى تۇجىرىمداماسى شەڭبەرىندە ءتۇيىسۋ پۋنكتتەرى داميتىن جانە تەمىرجول جەلىلەرىنىڭ قۇرىلىسى جۇزەگە اسىرىلادى. وسىلايشا, ءبىز ترانزيتتىك تاسىمال كولەمىن 28 ملن توننادان 45 ملن تونناعا دەيىن ۇلعايتۋدى, 5 مىڭ شاقىرىمعا جۋىق جاڭا جانە ەكىنشى تەمىرجولدار توسەۋدى كوزدەپ وتىرمىز», دەپ اتاپ ءوتتى و.بەكتەنوۆ.
بۇگىندە قىتايدان ەۋروپاعا ترانزيت كولەمىن ۇلعايتۋ ءۇشىن «دوستىق – مويىنتى» ۋچاسكەسىندە تەمىرجولدار سالۋ جۇمىستارى جالعاسۋدا. جوبانى ىسكە اسىرۋ وتكىزۋ قابىلەتىن 5 ەسەگە, ال تاسىمالداۋ جىلدامدىعىن 2 ەسەگە – تاۋلىگىنە 1,5 مىڭ شاقىرىمعا دەيىن ارتتىرۋعا مۇمكىندىك بەرەدى. پرەمەر-مينيستر وداقتىڭ ينفراقۇرىلىمدىق باسىم جوبالارىن ىسكە اسىرۋ جونىندەگى جۇمىستى جانداندىرۋ قاجەتتىگىن اتاپ ءوتتى.
ساۋدا قاتىناستارىن دامىتۋ ماسەلەسىندە العا قويىلعان ماقساتتارعا سايكەس, ەاەو-نىڭ ەكونوميكالىق الەۋەتىن اشۋ جونىندەگى جۇمىستى جالعاستىرۋ ماڭىزدى. ينتەگراتسيالىق بىرلەستىك ءۇشىن بايلانىستىرۋشى بۋىن سانالاتىن ساۋدا ءۇشىن قولايلى جاعداي جاساۋدىڭ جانە ەاەو-نىڭ ىشكى نارىعىنداعى جۇيەلىك كەدەرگىلەردى جويۋدىڭ ماڭىزدىلىعى اتاپ ءوتىلدى.
ونەركاسىپ كووپەراتسياسىن نىعايتۋ ءۇشىن بىرلەسكەن جوبالارعا قارجىلاي كومەك كورسەتۋ تەتىگى قولدانىلادى. ولجاس بەكتەنوۆ وداقتىڭ باسىم مىندەتى – بيزنەستى قولداۋ قۇرالدارى مەن قولدا بار مۇمكىندىكتەرى تۋرالى اقپاراتتاندىرۋ بويىنشا جۇمىستى كۇشەيتۋ بولۋى ءتيىس ەكەنىنە توقتالدى. بۇگىنگى تاڭدا كووپەراتسيا ءۇشىن پەرسپەكتيۆالى باعىتتار – جوعارى تەحنولوگيالىق دارىلىك زاتتار مەن مەديتسينالىق ماقساتتاعى بۇيىمدار ءوندىرۋ بولۋى مۇمكىن. ونىمدەردىڭ وسى تۇرلەرىن شىعارۋدى ارتتىرۋ ءۇشىنشى ەلدەردەن مۇنداي تاۋارلار يمپورتىن ازايتۋعا ىقپال ەتەدى.
ونىمدىلىكتى ارتتىرۋ ماقساتىندا اوك-تە جوعارى تەحنولوگيالاردى ەنگىزۋ ۇسىنىلىپ وتىر. ۇكىمەت باسشىسى قازىرگى تاڭدا ەلىمىزدە «تسيفرلى» فەرمالار بەلسەندى دامىپ كەلە جاتقانىن, ەگىنشىلىك پەن مال شارۋاشىلىعىندا «اقىلدى» جۇيەلەر قولدانىلاتىنىن ايتتى. اۋىل شارۋاشىلىعى سالاسىندا تاجىريبە الماسۋعا جانە بىرلەسكەن جوبالارعا دايىن ەكەنى اتاپ ءوتىلدى. ەۋرازيا دامۋ بانكىنىڭ تالداۋىنا سايكەس, ەاەو-عا قاتىسۋشى ەلدەردىڭ اۋىل شارۋاشىلىعى الەۋەتىن ىسكە اسىرۋ شامامەن 600 ملن ادامنىڭ ازىق-ت ۇلىككە دەگەن قاجەتتىلىگىن قامتاماسىز ەتۋگە مۇمكىندىك بەرەدى.
وتىرىس بارىسىندا ەكونوميكالىق ۇدەرىستەردى تسيفرلاندىرۋ ماسەلەسى دە قارالدى. پرەمەر-مينيستر وزىق تسيفرلى تەحنولوگيالاردى تابىستى ەنگىزۋ ءوزارا ساۋدا كولەمىن ارتتىرۋعا, بيزنەسكە اكىمشىلىك جۇكتەمەنى ازايتۋعا ىقپال ەتەتىنىن باسا ايتتى. و.بەكتەنوۆ ەاەو ينتەگراتسيالانعان اقپاراتتىق جۇيەسىن ىسكە قوسۋ بويىنشا بىرلەسكەن جۇمىستىڭ ماڭىزدىلىعىن اتاپ ءوتتى, بۇل قاتىسۋشى ەلدەر اراسىندا, ءبىرىنشى كەزەكتە, سانيتارلىق, فيتوسانيتارلىق, كولىكتىك جانە كەدەندىك باقىلاۋ سالالارىندا دەرەكتەر مەن ەلەكتروندى قۇجاتتارمەن الماسۋدى ايتارلىقتاي جەڭىلدەتۋگە مۇمكىندىك بەرەدى.
وتىرىس قورىتىندىسى بويىنشا قاتىسۋشىلار بىرقاتار قۇجاتقا قول قويىپ, ينتەگراتسيالىق ۇدەرىستەردىڭ تيىمدىلىگىن ارتتىرۋعا, بىرلەسكەن جوبالاردى ىسكە اسىرۋعا جانە ەاەو-عا مۇشە ەلدەردىڭ ازاماتتارى مەن بيزنەسى ءۇشىن جاڭا مۇمكىندىكتەردى دامىتۋعا باعىتتالعان شەشىمدەر قابىلدادى.
ەۋرازيالىق ۇكىمەتارالىق كەڭەستىڭ كەزەكتى وتىرىسى 2025 جىلعى قاڭتاردا الماتى قالاسىندا وتەدى.
