قايعىلى وقيعا 14 جەلتوقساندا پاۆلودار وبلىسىنىڭ مايقايىڭ كەنتىندە بولدى.
الەۋمەتتىك جەلىدە تاراعان مالىمەت بويىنشا «مايقايىڭ التىن» اق-دا 140 مەتر جول جيەگىندە جول-كولىك وقيعاسى بولعان. جۇك تيەۋ ماشيناسىنىڭ جۇرگىزۋشىسى جۇمىسشىلاردىڭ ءبىرىن قاعىپ كەتتى. جابىرلەنۋشى وقيعا ورنىندا قايتىس بولدى.
وندىرىستەگى ءولىم-ءجىتىم تۋرالى اقپارات پاۆلودار وبلىسى بويىنشا مەملەكەتتىك ەڭبەك ينسپەكتسياسى دەپارتامەنتىندە راستالدى.
- قايتىس بولعان ەر ادام 1992 جىلى تۋعان. جاعدايلار مەن سەبەپتەر انىقتالىپ جاتىر. الدىن الا مالىمەتتەر بويىنشا, كولىك قاعىپ كەتكەن. قازىرگى ۋاقىتتا ارنايى تەرگەۋ ۇيىمداستىرىلىپ جاتىر, - دەدى پاۆلودار وبلىسى بويىنشا مەملەكەتتىك ەڭبەك ينسپەكتسياسى دەپارتامەنتىندە.
مارقۇمنىڭ ارتىندا جۇبايى مەن 6 جاسار ۇلى قالدى.
بۇل «مايقايىڭ التىن» اق اۋماعىنداعى العاشقى ءولىم-ءجىتىم ەمەس. بيىل قاڭتاردا جۇمىس ىستەمەيتىن شاحتاعا ءتورت تاۋ-كەن قۇتقارۋشىسى بار اۆتوبۋس قۇلادى. سول كۇنى قازا تاپقان ەكى ادام - 24 جاستاعى بەردىقان سارقىت پەن 53 جاستاعى ولەگ تيشكەۆيچ تابىلىپ, دەنەلەرى جەر بەتىنە كوتەرىلدى.
ادامدارمەن بىرگە اۆتوبۋس جەراستىنا كەتتى, قۇلاۋ ءساتى ۆيدەوعا ءتۇستى.
55 جاستاعى جۇرگىزۋشى ايىپ تىلەۋبەرگەنوۆ پەن 36 جاستاعى ۆزۆود كومانديرىنىڭ ورىنباسارى ايدوس شايمەردەننىڭ دەنەلەرى التى ايدان استام ۋاقىت بويى جەراستىندا قالدى.
19 شىلدەدە قايتىس بولعان ايدوس شايمەردەن تابىلدى. 24 شىلدە كۇنى كەشكە جەر قازۋ جۇمىستارى بارىسىندا قۇتقارۋشىلاردىڭ اۆتوبۋسى تابىلدى, ال كەلەسى كۇنى ىزدەۋ جۇمىستارى كەزىندە ايىپ تىلەۋبەرگەنوۆتىڭ دەنەسى تابىلىپ, كوتەرىلدى.
