مەملەكەت قولداۋىمەن سالىنعان بۇل پاتەرلەر «وتباسى بانكتىڭ» جەڭىلدەتىلگەن زاەم ارقىلى بەرىلدى. «تۇرعىن ءۇي-كوممۋنالدىق ينفراقۇرىلىمدى دامىتۋدىڭ 2023 – 2029 جىلدارعا ارنالعان تۇجىرىمداماسى» اياسىندا بەرىلەتىن باسپانا - بۇگىنگى تادا تۇرعىن ءۇي ماسەلەسىن شەشۋدىڭ ەڭ ءتيىمدى قۇرالدارىنىڭ ءبىرى بولىپ تابىلادى. باعدارلاما اياسىندا كوپ بالالى وتباسىلارعا, الەۋمەتتىك وسال توپتارعا, مۇگەدەكتەرگە, جەتىم بالالارعا, سونداي-اق مەملەكەتتىك جانە بيۋدجەتتىك سالا قىزمەتكەرلەرى جاڭا باسپانالارىنا قونىستاندى. ايماق باسشىسى نۇرلىبەك نالىباەۆ تۇرعىنداردى جاڭا باسپانالارىمەن قۇتتىقتاپ, ءوڭىردىڭ تۇرعىن ءۇي قۇرىلىسى سالاسىنداعى جەتىستىكتەرىنە توقتالدى. مەملەكەت باسشىسى قاسىم-جومارت توقاەۆتىڭ تاپسىرماسى اياسىندا تۇرعىنداردى قولجەتىمدى باسپانامەن قامتاماسىز ەتۋ جۇمىستارى جۇيەلى تۇردە جۇزەگە اسىرىلىپ كەلەدى.
«سوڭعى ەكى جىلدا ايماقتا 4 مىڭعا جۋىق پاتەر پايدالانۋعا بەرىلدى. بۇل 17 مىڭ تۇرعىننىڭ باسپانا ماسەلەسىن شەشتى. ال 2023 جىلدىڭ وزىندە 1500-دەن استام وتباسى قونىس تويىن تويلادى. جىل سوڭىنا دەيىن تاعى 2,5 مىڭ پاتەر پايدالانۋعا بەرىلەدى دەپ جوسپارلانۋدا. بۇل كورسەتكىشتەر تۇرعىن ءۇي قۇرىلىسىنىڭ كولەمىنىڭ 126 پايىزعا ارتقانىن كورسەتەدى», دەدى وبلىس اكىمى.
سونىمەن قاتار ايماق باسشىسى جاڭا پاتەرلەر تۇرعىندارعا تەك جايلى تۇرمىس عانا ەمەس, تۇراقتى بولاشاققا سەنىمدىلىك سىيلايتىنىن اتاپ ءوتتى. ول مۇنداي ناتيجەلەرگە قول جەتكىزۋ مەملەكەتتىڭ حالىققا قامقورلىعىن جانە قۇرىلىس سالاسىنىڭ دامىپ كەلە جاتقانىن دالەلدەيدى.
بۇل ۇيلەردىڭ قۇرىلىسىنا 9,9 ميلليارد تەڭگە بولىنگەن. ءار پاتەردىڭ اۋدانى 80-85 شارشى مەتردى قۇرايدى, بۇل ءاربىر وتباسىنىڭ قاجەتتىلىكتەرىن تولىق قاناعاتتاندىرۋعا مۇمكىندىك بەرەدى.
جاڭا باسپانا يەلەرى قۋانىشتارىن جاسىرماي, مەملەكەتتىڭ قولداۋىنا ريزاشىلىقتارىن ءبىلدىردى. سولاردىڭ ءبىرى – مۇمكىندىگى شەكتەۋلى بالانى تاربيەلەپ وتىرعان باعداگۇل جۇباتقانقىزى. ول 8 جىلدان بەرى پاتەر كەزەگىندە تۇرعانىن جانە بۇگىن كوپتەن كۇتكەن ارمانىنىڭ ورىندالعانىن ايتادى. باعداگۇلدىڭ سوزىنشە, جاڭا پاتەر تەك باسپانا ەمەس, وتباسىنا تۇراقتىلىق پەن جايلىلىق سىيلادى. ولار ەندى بالالارىن قاۋىپسىز ءارى جايلى ورتادا وسىرە الاتىنىنا قۋانىشتى.
«مۇنداي مۇمكىندىكتى ۇسىنعان مەملەكەتىمىزگە, وبلىس اكىمىنە جانە «وتباسى بانكىنە» ۇلكەن العىسىمدى بىلدىرەمىن. بۇل جەڭىلدەتىلگەن يپوتەكا ارقىلى قولجەتىمدى بولدى», دەدى ول.
بۇگىن قونىس تويىن تويلايتىن جاندار قاتارىندا جاندوس رىسبەكوۆ تە بار. قىزىلوردا قالاسىنىڭ ءورت ءسوندىرۋ قىزمەتىندە ەڭبەك ەتەتىن ول بىرنەشە جىل كۇتكەن ءوزىنىڭ ۇيىنە كىرىپ وتىر. ول مەملەكەتتىك باعدارلامانىڭ ارتىقشىلىقتارى مەن تيىمدىلىگىنىڭ ارقاسىندا وسىنداي پاتەرگە قول جەتكىزدىم, دەيدى.
ء«بىز مەملەكەتتىك باعدارلامانىڭ ارقاسىندا "وتباسى بانك» ارقىلى پاتەر الدىق. وسىنداي مۇمكىندىكتەردى جاساعان باسشىلىققا جانە قۇرىلىسشىلارعا راقمەت. جاڭا پاتەر يەلەرىن شىن جۇرەكتەن قۇتتىقتايمىن», دەدى ول.
تۇرعىن ۇيلەردى قولجەتىمدى ەتۋدە «وتباسى بانك» ەرەكشە ءرول اتقارۋدا. بانكتىڭ قالالىق فيليالىنىڭ بيزنەستى دامىتۋ ءبولىمىنىڭ باسشىسى شىڭعىس قۇتتىقوۆ باعدارلامانىڭ ءتيىمدى شارتتارىن ءتۇسىندىرىپ بەردى:
«بۇل باعدارلاما تۇرعىن ۇيگە مۇقتاج ازاماتتارعا ارنالعان. الەۋمەتتىك وسال توپتار مەن بيۋدجەتتىك قىزمەتكەرلەر ءۇيدىڭ باستاپقى جارناسىنا 10 پايىز تولەپ, جەڭىلدەتىلگەن پايىزبەن نەسيە الا الادى. الەۋمەتتىك وسال توپتاعى ازاماتتار ءۇشىن مولشەرلەمە 2 پايىز (جتسم 2,0% باستاپ 2,1% دەيىن), ال مەملەكەتتىك قىزمەتكەرلەر ءۇشىن 5 پايىزعا دەيىن (جتسم 5,2% باستاپ 5,8% دەيىن) جەڭىلدىك قاراستىرىلعان. بۇل تەك ءبىزدىڭ بانك سالىمشىلارىنا ارنالعان باعدارلاما», دەدى ول.
سونىمەن قاتار كەزەكتە تۇرعان سالىمشىلار «باسپانا ماركەت» پورتالى ارقىلى ءوتىنىش بىلدىرە الادى. بۇل پورتال تۇرعىندارعا وزدەرىنىڭ مۇمكىندىكتەرىن ءتيىمدى پايدالانۋعا جانە جىلدام اقپارات الۋعا جول اشادى.
سىرداريانىڭ سول جاعالاۋىندا ورنالاسقان بۇل تۇرعىن ۇيلەر – زاماناۋي ينفراقۇرىلىممەن جابدىقتالعان. بارلىعى 7 قاباتتى 6 ۇيدەن تۇراتىن كەشەندە 504 پاتەر بار. ءار پاتەردىڭ اۋدانى 80-85 شارشى مەتر. جوبادا جەدەلساتىلار, بالالار ويىن الاڭدارى جانە اۆتوكولىك تۇراقتارى قاراستىرىلعان.
ءاربىر وتباسىنىڭ قاجەتتىلىگىن ەسكەرىپ سالىنعان بۇل ۇيلەردىڭ بەرىلۋى – وڭىردەگى الەۋمەتتىك جاعدايدى جاقسارتۋ باعىتىنداعى ناقتى قادام. جاڭا كەشەن تۇرعىندارى ەندى قاۋىپسىز ءارى جايلى ءومىر سۇرەتىن ورتادا تۇراتىن بولادى. ۇيلەردىڭ ىشكى ارلەۋى مەن پايدالانىلعان ماتەريالداردىڭ ساپاسى جوعارى دەڭگەيدە. ءار پاتەردە زاماناۋي سانتەحنيكا, جىلىتۋ جۇيەسى جانە ەنەرگيا ۇنەمدەيتىن تەرەزەلەر ورناتىلعان. سونىمەن قاتار, ءاربىر اۋلادا بالالارعا ارنالعان ويىن الاڭدارى, دەمالىس ورىندارى جانە كولىك تۇراقتارى بار.
جاڭا قونىسقا يە بولعان تۇرعىندار ءۇشىن بۇل ۇيلەر تەك جايلى باسپانا عانا ەمەس, سونىمەن قاتار بولاشاققا دەگەن سەنىمنىڭ كەپىلىنە اينالدى. وسىلايشا, سىر ءوڭىرى قولجەتىمدى تۇرعىن ءۇي سالاسىنداعى ۇلگىلى وڭىرلەردىڭ ءبىرى رەتىندە تانىلىپ جاتىر.
