ينفوگرافيكانى جاساعان – امانگەلدى قياس, «EQ»
ال ىرگەسىن كەڭگە سالعانى دەيتىنىمىز, ءبىزدىڭ ومىرىمىزگە ەنگەن جاڭاشىلدىقتىڭ, جاڭالىقتىڭ قاي-قايسىن دا بۇل گازەت جاتىرقاعان جوق. مۇمكىندىگىنشە ءوزىنىڭ سيپاتىنا, كەلبەتىنە ساي قابىلداپ, تاعى دا سول وقىرمانىنىڭ نازارىنا ۇسىنادى.
ءححى عاسىر ەسىك قاققالى ەڭسەمىزدى دە تىكتەگەنىمىز ەسىمىزدە. سول تۇستاردان سوڭ جاھاندا قارىشتاپ ىلگەرىلەگەن جاڭا تەحنولوگيانىڭ كوشىنە ەلىمىز دە ات ءىزىن سالا ءتۇستى. سوڭعى ۇلگىدەگى تەلەديدار, سمارتفون, كومپيۋتەر دەگەندەردىڭ يگىلىگىن بۇقارانىڭ سەزىنە باستاعانى سول جىلدار ەدى. ينتەرنەت باق-تا ەل ومىرىنە ەنتەلەي ەنىپ, ەكپىندەتە اقپارات تاراتتى.
«ەگەمەن» ينتەرنەت باسىلىمداردى باسەكەلەس ساناعان جوق. ويتكەنى ءوزىنىڭ داڭعىل جولى قالىپتاسقان, دارا شابىسىنا تۇسكەن. قايتا جۇمىس اۋقىمىن كەڭەيتىپ, قازىر تىرشىلىگى قىز-قىز قايناپ جاتقان ينتەرنەت-رەداكتسياسىنىڭ ىرگەتاسىن قالاۋعا كىرىسىپ كەتتى. 2005 جىلى-اق سول كەزدەگى اقپارات جانە كوممۋنيكاتسيا مينيسترلىگىنىڭ كۋالىگىن الىپ ۇلگەردى.
ال قازىرگى «egemen.kz» ينتەرنەت-پورتالىندا گازەت بەتىندە 2010 جىلدان بەرى جارىق كورگەن ماتەريالدار, ماقالالار, سۇحباتتار, ساراپتامالار, جاڭالىقتار ساقتالعان. ولاردى كەز كەلگەن ۋاقىتتا وقىرمان اشىپ جىبەرىپ, وقي الادى.
جىل وتكەن سايىن الگى ينتەرنەت باق مازمۇنىن جاڭارتىپ, فورماسىن وزگەرتىپ, كوكجيەگىن كەڭەيتىپ, كوپشىلىكتىڭ سۇرانىسىنا ساي سان ءتۇرلى شارۋانى اتقاردى. وسىناۋ يگى ۇدەرىستەن «ەگەمەننىڭ» سايتى دا كەنجە قالمادى. زامان تالاپ ەتكەن پلاتفورماعا اۋىسىپ, اعىلشىن, ورىس تىلدەرىندە دە اقپارات تاراتا باستادى.
ال ءبىزدىڭ شەتتەگى قانداستارىمىزدىڭ دەنى – ىرگەدەگى قىتاي مەن موڭعولياداعى قازاقتار ءبىزدىڭ كيريل قارىپتەرىن تاني قويمايدى. ولار نەگىزىن بايتۇرسىن ۇلى قالاعان توتە جازۋدى بىلەدى. ولار اتاجۇرتىنىڭ باس باسىلىمىن, باسقا جاڭالىعىن وقۋعا ءتيىس. وسىنى ەسكەرگەن «ەگەمەن» سايتى جاڭالىقتارىن توتە جازۋمەن دە تاراتۋدى قولعا الدى.
وسىنداي شارۋالاردىڭ ەشقايسىسى ناتيجەسىز قالعان ەمەس. بۇگىندە «egemen.kz» پورتالىنىڭ وقىرماندارى الەمنىڭ تۇكپىر-تۇكپىرىندە بار. ەڭ قىزىعى, ءبىزدىڭ سايتتى وقيتىنداردىڭ دەنى ءتۇۋ امەريكادا ەكەن. بيىلدىققا سايتىمىز مۇحيتتىڭ ارعى بەتىنەن 223 مىڭ مارتە كورىلگەن. بۇل كورسەتكىش بىلتىر 135 مىڭعا جەتىپ جىعىلىپتى.
سودان كەيىنگى ورىندا رەسەي, موڭعوليا, سينگاپۋر تۇر. بەستىكتى وزبەكستان تۇيىندەيدى. «ەگەمەننىڭ» ينتەرنەتتەگى وقىرماندارى قىتاي, نورۆەگيا, شۆەتسيا, تۇركيا, يرلانديا, گەرمانيا, بولگاريادا دا بار ەكەن. از دەۋگە كەلمەيدى, مىڭداپ سانالادى.
جالپى, ءبىزدىڭ سايتتى وتكەن جىلى 3 ميلليون 800 مىڭ ادام 11 ميلليون 367 مىڭ مارتە اشىپ, كەرەگىن تاپسا, وسى جىلدىڭ باسىنان بەرى وقىرماندارىمىز 8 ميلليون مارتە پورتالىمىزعا ەنىپ, جاڭالىقتارىمىزدى شولىپتى.
قازىرگى تاڭدا ينتەرنەت-سايتتارمەن بىرگە, الەۋمەتتىك جەلىلەر دە قوعامىمىزدىڭ اجىراماس بولىگىنە اينالىپ ۇلگەردى. وقىرمان قولىنداعى سمارتفون ارقىلى جەلىگە ەنىپ, ءوزىن قىزىقتىرعان سايتتاردىڭ جاڭالىعىمەن ءاپ-ساتتە تانىسىپ جاتادى. «ەگەمەننىڭ» ينتەرنەت-رەداكتسياسىنىڭ ۇجىمى بۇل ءۇردىستى دە قولعا الىپ, Instagram, Facebook, Telegram, X, YouTube جەلىلەرىنەن پاراقشالارىن اشتى. بۇگىندە بۇلاردىڭ ارقايسىندا 4 مىڭنان 31 مىڭعا دەيىن وقىرمانىمىز بار. ولار ءار كۇن سايىن, ساعات سايىن ەل ءومىرىنىڭ سوڭعى حابارلارىمەن دەر كەزىندە تانىسىپ وتىرادى.
ءبىز ءالى دە ينتەرنەتتەگى وقىرماندارىمىزدىڭ قاتارى قالىڭداي بەرەتىنىنە سەنىمدىمىز.
