فوتو: depositphotos.com
ءىستىڭ ءمان-جايىن اقمولا وبلىستىق سوتىنىڭ ءباسپاسوز قىزمەتى حابارلادى. وبلىستىق اۋرۋحانالاردىڭ ءبىرىنىڭ ەسەپشىسى 1س بۋحگالتەرلىك باعدارلاماسىنداعى دەرەكتەردى وزگەرتىپ, اۋرۋحانا قىزمەتكەرلەرىنىڭ جالاقىسى مەن باسقا دا تولەمدەرىن جوعارىلاتىپ جىبەرگەن. اۋرۋحانانىڭ باس ەسەپشىسى مەن باس دارىگەرى ەلەكتروندىق تسيفرلىق قولتاڭبا كىلتتەرى بار قۇجاتتارعا تەكسەرۋسىز قول قويعان.
«وسىلايشا, د. قىزمەت بابىن پايدالانىپ, ءوزىنىڭ جانە باسقا ادامداردىڭ شوتتارىنا سومالاردى زاڭسىز ەسەپتەپ, كەيىننەن ولاردى اۋدارىم ارقىلى نەمەسە قولما-قول اقشامەن وزىنە قايتارۋدى تالاپ ەتىپ وتىرعان (قىلمىستىق كودەكسىنىڭ 190-بابى 3-بولىگىنىڭ 1-تارماعى). 2020-2022 جىلدارى ارالىعىندا د.-ءنىڭ قىلمىستىق ارەكەتتەرىمەن دەنساۋلىق ساقتاۋ باسقارماسىنا 10 ملن تەڭگەگە جۋىق ماتەريالدىق زالال كەلتىرىلدى», دەلىنگەن حابارلامادا.
سوتتالۋشىنىڭ كىناسى اۋديتورلىق ەسەپپەن, كۋاگەرلەر مەن اۋرۋحانا قىزمەتكەرلەرىنىڭ ايعاقتارىمەن, ولاردىڭ شوتتارىنا تۇسكەن ارتىق تولەمدەرمەن دالەلدەنگەن. جازا تاعايىنداۋدا سوت د.-دا كىشكەنتاي بالانىڭ بولۋىن جەڭىلدەتەتىن ءمان-جاي رەتىندە, اۋىرلاتاتىن ءمان-جايلاردىڭ بولماۋىن ەسكەرگەن.
القانىڭ قاۋلىسىمەن د.-عا قاتىستى ۇكىم وزگەرىسسىز قالدىرىلعان.
«سوت ۇكىمىمەن د.-ءنىڭ مۇلكى (ۇرلىق جاساۋ كەزەڭىندە ساتىپ الىنعان اۆتوكولىك) تاركىلەنىپ, 3 جىل 8 ايعا باس بوستاندىعىنان جانە ماتەريالدىق-جاۋاپتى لاۋازىمداردى اتقارۋ قۇقىعىنان ايىرىلدى.باس بوستاندىعىنان ايىرۋ بولىگىندەگى جازانىڭ ورىندالۋى د.-ءنىڭ بالاسى 14 جاسقا تولعانعا دەيىن 4 جىلعا كەيىنگە قالدىرىلدى», دەلىنگەن سوت حابارلاماسىندا.
