جيىندا ناشاقورلىققا جانە ەسىرتكى بيزنەسىنە, سونداي-اق قۇمار ويىندارعا قارسى كۇرەسكە باعىتتالعان كەشەندى جوسپارلاردى جۇزەگە اسىرۋعا جاۋاپتى مەملەكەتتىك ورگاندار باسشىلارىنىڭ ەسەپتەرى تىڭدالدى.
تالقىلاۋلار بارىسىندا مەملەكەتتىك كەڭەسشى ىشكى ىستەر مينيسترلىگى مەن تۋريزم جانە سپورت مينيسترلىگىنە كەشەندى جوسپارلاردى ورىنداۋعا قاتىستى جۇمىستى كۇشەيتۋ جونىندە تاپسىرما بەردى. ەرلان قارين ءىستىڭ قارقىنى مەن ساپاسىن جوعالتپاۋ كەرەك ەكەنىنە توقتالدى. مەملەكەتتىك كەڭەسشى لۋدومانيانىڭ الدىن الۋعا, سونداي-اق ناشاقورلىققا جانە ەسىرتكى بيزنەسىنە قارسى كۇرەس جۇرگىزۋگە باعىتتالعان بارلىق شارانى ساپالى جۇزەگە اسىرۋ ماسەلەسىنە توقتالدى. ول ءۇشىن بەكىتىلگەن جوسپارلاردىڭ ورىندالۋ بارىسىنا ءادىل ءارى تولىق تالداۋ جۇرگىزۋ قاجەتتىگىن اتاپ ءوتتى.
كەڭەس مۇشەلەرى «قازاقستان جاستارى» اتتى ۇلتتىق باياندامادا كورسەتىلگەن جاستار اراسىنداعى قازىرگى ۇردىستەردى قاراستىردى. وسى ۇردىستەردى ەسكەرە وتىرىپ, جيىنعا قاتىسۋشىلار وزەكتى تاقىرىپتىڭ ءبىرى – جاستاردى جۇمىسپەن قامتۋ ماسەلەسىن تالقىعا سالدى.
ەرلان قارين كەزدەسۋدى قورىتىندىلاي كەلە, كەڭەس مۇشەلەرى تاراپىنان كوتەرىلگەن كوپتەگەن باستامانىڭ بيىل جۇزەگە اسقانىن ايتتى. سونداي-اق كەڭەستىڭ الداعى ۋاقىتتا جاڭا باستامالارعا ۇيىتقى بولىپ, جاستار ساياساتى سالاسىنداعى ماڭىزدى باعىتتاردى جاڭعىرتا تۇسەتىنىنە سەنىم ءبىلدىردى.
جالپى, وتىرىس ناتيجەسىندە ناقتى ۇسىنىستار ازىرلەنىپ, كەڭەستە ايتىلعان ماسەلەلەرگە قاتىستى مەملەكەتتىك ورگاندارعا ءتيىستى تاپسىرمالار بەرىلدى.
