القالى جيىندا پرەزيدەنت جانىنداعى ۇلتتىق عىلىم اكادەمياسىنىڭ پرەزيدەنتى, اكادەميك اقىلبەك كۇرىشباەۆ اۋقىمدى بايانداما جاساپ, وتاندىق عىلىمنىڭ دامۋى مەن عىلىمي ىقپالداستىق, جاس عالىمداردى ۇيلەستىرۋ سالاسىنداعى ماڭىزدى ىستەرگە توقتالدى.
«قازىر مەملەكەت باسشىسىنىڭ تاپسىرماسىنا سايكەس, الەمدەگى 20 جەتەكشى اكادەميا تاجىريبەسىن تالداي وتىرىپ, الداعى 10 جىلدىق دامۋ ستراتەگياسىن ينديكاتورلارمەن ايقىنداعان ناقتى ۇلگى جاسادىق. وعان بار رەسۋرستاردى پايدالانىپ, قانداي ناتيجەلەرگە قول جەتكىزۋگە بولاتىنىن زەرتتەدىك. بۇعان دەيىن عىلىم سالاسىنداعى ورىن العان ولقىلىقتى انىقتاپ, باسىمدىقتار ايقىندالدى», دەدى ا.كۇرىشباەۆ.
بايانداما بارىسىندا ۇعا باسشىسى العاش رەت عىلىمدى دامىتۋعا نەگىزدەلگەن فورسايت-زەرتتەۋلەر, وتاندىق عىلىمنىڭ ناقتى جاي-كۇيىن باعالايتىن تالداۋ ورتالىعىنىڭ جۇمىس ناتيجەسى تۋرالى ايتتى. 2025–2027 جىلدارعا ارنالعان عىلىمي-تەحنيكالىق تاپسىرىس بارىسىنا ساراپتاما جاسالدى. مينيسترلىكتەرگە سالالىق عىلىمدى دامىتۋدا ناقتى كەڭەستەر بەرىلىپ, تۇيتكىلدى ماسەلەلەرى بويىنشا اكادەميا پرەزيديۋمى كوشپەلى وتىرىس وتكىزدى. مۇنداعى ماقسات – ايماقتارداعى جەرگىلىكتى بيلىك تاراپىنان دا عىلىمدى قولداۋعا جارقىن باستامالاردىڭ بولعانى ماڭىزدى. وسى جۇمىستاردىڭ ناتيجەسىندە اناليتيكالىق جازبالار, جول كارتاسى دايىندالدى. بيىل العاش رەت اكادەميا جانىنان «جاس عالىمدار» كەڭەسى قۇرىلدى. ونىڭ قۇرامىنا 20-دان استام جەتەكشى جاس عالىم ەنگەن. كەڭەس قۇرامىنداعى ومبۋدسمەن جاس عالىمداردىڭ ماسەلەلەرىنە ۇسىنىس بەرىپ وتىراتىن بولادى.
سونداي-اق ەلىمىزگە بەلگىلى عالىمدار سەرىكبەك داۋكەەۆ, ءابدىراسىل جارمەنوۆ, كارىمبەك قۇرماناليەۆ, اسقاربەك قۇسايىنوۆ, باقىتجان جۇماعۇلوۆ, راحمان الشانوۆ, ۆياچەسلاۆ لوكشين, نۇرلان رىسپانوۆ جانە تاعى دا باسقا عالىمدار اكادەميا پرەزيدەنتىنىڭ بايانداماسىنا قاتىستى ويلارىن ورتاعا سالىپ, ماقسات-مىندەتىنە بايلانىستى ۇسىنىس ايتتى. اسىرەسە جاس عالىمداردى قولداۋ, ولارعا الەۋمەتتىك جاعداي جاساۋ, زەرتحانالاردى زاماناۋي جابدىقتاۋ, ورتا ءبىلىمنىڭ ساپاسىن ارتتىرۋ سياقتى ءبىر-بىرىنەن بولە جارىپ قاراۋعا بولمايتىن كەلەلى ماسەلەلەردى اعا عالىمدار ناقتى دالەلدەرمەن جەتكىزدى. وسى باعىتتا حالىقارالىق بىرلەسكەن جوبالاردىڭ ماڭىزىنا يەك ارتقان ابزال.
بۇگىندە پرەزيدەنت جانىنداعى ۇلتتىق عىلىم اكادەمياسى مەن قىتاي, امەريكا, تۇركيا, رەسەي, تمد ەلدەرىنىڭ جەتەكشى عىلىم اكادەميالارى اراسىندا ىنتىماقتاستىق تۋرالى كەلىسىمگە قول قويىلعان. سونىمەن بىرگە گەرمانيا, وڭتۇستىك كورەيا جانە قىتايمەن بىرلەسكەن 3 حالىقارالىق ورتالىق قۇرىلدى. جەتەكشى 8 اكادەميانىڭ تاجىريبەسى نەگىزىندە عىلىمي ەتيكا كودەكسى – عىلىمي زەرتتەۋلەردى جۇرگىزۋ ستاندارتى دايىندالدى. فالسيفيكاتسيانى, پلاگياتى, مۇددەلەر قاقتىعىسىن جانە جالعان بىرلەسكەن اۆتورلىقتى انىقتاۋدىڭ قاعيداتتارى بەكىتىلدى.
الداعى ۋاقىتتا ۇلتتىق عىلىم اكادەمياسى مەن عىلىمي بىرلەستىكتىكتەر بىرلەسىپ جۇمىس ىستەۋگە دايار. اسىرەسە جاس عالىمدارعا كوپ قولداۋ كورسەتىلەدى. سونىمەن قاتار عالىمدار عىلىمي تەحنولوگيالىق دامۋ ماقساتىندا قول قويىلعان مەموراندۋمدارعا سايكەس جول كارتاسى اياسىنداعى جۇمىستارىن جالعاستىرا بەرەدى.
الماتى
