چەمپيوناتتىڭ سوڭعى كۇنى كوڭىلسىزدەۋ باستالدى. 48 كگ سالماق دارەجەسىندەگى سانجار تاشكەنباي شوديەرجون مەليكۋزيەۆپەن قولعاپ ءتۇيىستىردى. بۇعان دەيىن قانداسىمىز ءدال وسى وزبەك بوكسشىسىن ءتۇرلى جاۋاپتى جارىستاردا ەكى رەت جەڭگەن. بىراق بۇل جولى ءبىز كۇتكەندەي بولمادى. قوس ورەن ايانباي ايقاستى. باسەكە بارىسىندا ەكەۋىنىڭ دە شەكەسى جارىلىپ, دارىگەرلەردىڭ كومەگىنە جۇگىندى. ءۇشىنشى راۋندتا تاشكەنباي نوكداۋنعا ءتۇستى. تورەشىلەر سونى ەسەپكە الا وتىرىپ, مەليكۋزيەۆتى جەڭىمپاز دەپ تانىدى.
كوپ كەشىكپەي تاعى ءبىر الەم چەمپيونىمىز شارشى الاڭعا شىقتى. 54 كگ سالماقتاعى ماحمۇد سابىرحان جاستاردىڭ الەم بىرىنشىلىگىنىڭ جەڭىمپازى, ەرەسەكتەردىڭ قۇرلىق چەمپيوناتىنىڭ قولا جۇلدەگەرى شاحزود مۇزاففاروۆپەن كۇش سىناستى.
باسەكە باستالعان بەتتە تىزگىندى قولىنا العان ورالبەك ءىلياسوۆتىڭ شاكىرتى ۋاقىت وتكەن سايىن قارقىنىن كۇشەيتە ءتۇستى. مۇزافاروۆ بارىنشا قارسىلىق كورسەتكەنىمەن, ماحمۇدىڭ شەبەرلىك دەڭگەيى ودان ءبىر باس جوعارى ەكەنى انىق اڭعارىلدى. جەڭىس قازاق بوكسشىسىنىڭ ەنشىسىنە جازىلدى.
ودان كەيىن قازاقستان مەن وزبەكستاننىڭ جۋان جۇدىرىقتى جىگىتتەرى اراسىنداعى ءتورت جەكپە-جەكتىڭ بارلىعى دا «وزبەك اعايىنداردىڭ» پايداسىنا شەشىلدى. وسى كۇنگە دەيىن كورشى ەلدىڭ وكىلدەرىن ۇنەمى ساباپ كەلگەن ورازبەك اسىلقۇلوۆ (57 كگ) شەشۋشى تۇستا اتاقتى ميرازيزبەك ميرزاحاليلوۆقا لايىقتى قارسىلىق كورسەتتى. ءبىرىنشى راۋندتا قانداسىمىز باسىم بولدى. بىراق قالعان ەكى كەزەڭدە الەم, قۇرلىق چەمپيونى, ازيا ويىندارىنىڭ جەڭىمپازى سوققىلارىن دالىرەك جۇمساپ, جەڭىستى ورازبەكتىڭ ۋىسىنان ج ۇلىپ اكەتتى.
دۋلات بەكباۋوۆ (67 كگ) پەن مۋجيبيللو تۇرسىنوۆتىڭ كەزدەسۋى دە كەسكىلەسكەن ايقاسپەن ءوتتى. شەبەرلەر شەگىنبەي ايقاستى. قازىلار ءبىراز ويلانا-تولعانا كەلە جەڭىستى تۇرسىنوۆقا بەردى. بۇل شەشىمگە نارازى بولعان دۋلات ماراپاتتاۋ راسىمىنە شىعىپ, كۇمىس مەدالدى موينىنا ىلۋدەن باس تارتتى.
ابىلايحان ءجۇسىپوۆ (71 كگ) پەن حاۆاسبەك اسادۋللاەۆ اراسىنداعى سايىستا دا ءدال سونداي جاعداي ورىن الدى. تەڭ دارەجەدە وتكەن باسەكەدە تورەشىلەر وزبەكتىڭ ىعىنا جىعىلدى.
چيانگمايدا ءوزىن جاقسى قىرىنان كورسەتكەن دياس مولجىگىتوۆ (75 كگ) شەشۋشى تۇستا دجاۆوحير ۋمماتاليەۆتىڭ وسال تۇسىن تابا المادى.
86 كگ سالماق دارەجەسىندە جۇدىرىقتاسقان الەم چەمپيونى بەكزات نۇرداۋلەتوۆ جاستار اراسىنداعى ازيا بىرىنشىلىگىنىڭ جەڭىمپازى (U-22) جاسۋربەك يۋلدوشەۆتى جەڭدى. ءسويتىپ, اتالعان جارىستىڭ بۇعان دەيىنگى مەجەلەرىندە قازاق پەن وزبەك بوكسشىلارى اراسىندا تەڭ ەسەپ (2:2) تىركەلسە, فينالدا ەكى جەرلەسىمىز عانا جەڭىسكە جەتىپ, قالعان بەسەۋى جەڭىلىستىڭ كەرمەك ءدامىن تاتتى.
92 كگ سالماقتاعى ساعىندىق توعامباي تاجىستاندىق پارۆيز كارىموۆتىڭ تاس-تالقانىن شىعاردى. مىرزاعالي ايتجانوۆتىڭ شاكىرتى ونى ءۇش رەت نوكداۋنعا جىبەرگەننەن كەيىن باسەكە دەرەۋ توقتاتىلدى.
اسا اۋىر سالماقتا ايقاسقان ايبەك ورالباي كوماندا كاپيتانىنا ءتان مىنەز كورسەتىپ, قىتايلىق ابۋدۋرەشيتي رەمۋلادان باسىم ءتۇستى.
وسىلايشا, تايلاندتا وتكەن ازيا چەمپيوناتىندا ەلىمىزدىڭ ءانۇرانى ءتورت مارتە شىرقالدى. بۇل جارىستىڭ باس جۇلدەسى مەن كۇمىس مەدالى كىمدەرگە بۇيىرعانىن جوعارىدا ايتتىق. جارتىلاي فينالدا سۇرىنگەن ەراسىل جاقپەكوۆ (80 كگ) قولانى قاناعات تۇتتى. ساكەن بيبوسىنوۆ (51 كگ), بەيبارىس جەكسەن (60 كگ), مۇحامەدسابىر بازارباي ۇلى (63,5 كگ) جەڭىس تۇعىرىنا كوتەرىلە الماي, ەلگە ەڭسەلەرى ءتۇسىپ ورالدى.
كوماندالىق ەسەپتە ءبىزدىڭ جىگىتتەر ەكىنشى ورىن الدى. ال قورجىنىندا 8 التىن, 2 كۇمىس, 1 قولاسى بار وزبەكستان جەكە-دارا كوش باستاسا, ۇزدىك ۇشتىكتى تاجىكستان (1+1+3) تۇيىندەدى.
جارىس اياقتالعان بەتتە باق وكىلدەرىنە سۇحبات بەرگەن ۇلتتىق قۇرامانىڭ باس باپكەرى قايرات ءساتجانوۆ: ء«بىز 67, 71 كگ سالماق دارەجەلەرىندە وتكەن فينالدىق سايىستارىنىڭ ناتيجەلەرىمەن كەلىسپەيمىز. بۇل جەردە تورەشىلەر تاراپىنان اعاتتىق كەتتى. قالعان جەكپە-جەكتەردە دۇرىس شەشىم شىعارىلدى. شاكىرتتەرىمنىڭ جىبەرگەن قاتەلىكتەرىنىڭ بارلىعىن كوردىم. ەندى سول ولقىلىقتاردىڭ ورنىن تولتىرۋ باعىتىندا ەڭبەك ەتەمىز. الداعى ۋاقىتتا فيزيكا مەن تەحنيكاعا كوبىرەك ءمان بەرۋدى كوزدەپ وتىرمىز. وسى ورايدا, نۇربەك ورالباي باستاعان مىقتى بوكسشىلارىمىزدىڭ ءبىرازى وسى جارىسقا قاتىسپاعانىن دا ەسكەرگەن ءجون. ەڭ باستىسى, بىزدە جاقسى رەزەرۆ بار. دارىندى جاستاردى ۇلتتىق قۇراماعا تارتامىز», دەپ وي ءتۇيدى.
