اقمولا وبلىسىنىڭ باسشىسى جانىبەك كارىبجانوۆ, ونىڭ ءبىرىنشى ورىنباسارى قۋانىش الپىسبەكوۆ, قالا اكىمى امانجول بولەكباەۆپەن بۇرىننان جاقسى تانىس-ءبىلىس, سىيلاس ەدىم. «جاس الاش» گازەتىنىڭ باس رەداكتورى كەزىندە, ودان سوڭ ون ءۇشىنشى شاقىرىلعان جوعارعى كەڭەستىڭ دەپۋتاتى رەتىندە, اقپارات ءمينيسترىنىڭ ورىنباسارى رەتىندە وسى تۇلعالارمەن ارالاسىپ, مەملەكەتتىك ءىس-شارالاردا كەزدەسىپ جۇرەتىنبىز. اقمولاعا ۇشىپ كەلىپ, وبلىس باسشىسىمەن كەزدەسىپ, «Egemen Qazaqstan» گازەتىن كوشىرۋ ءۇشىن عيمارات قاجەت ەكەنىن ايتتىم. اقمولادا «ەگەمەن قازاقستان» گازەتى مەنشىكتى تىلشىلەرىنىڭ كەڭەسىن وتكىزۋ جۇزەگە اسىرىلدى. اۋەلى بۇرىنعى پوبەدا كوشەسىندەگى تۇرعىن ءۇي استىنداعى اۋماعى جەتكىلىكتى مەكەنجاي ۇسىنىلدى. گازەت قوسىنىنىڭ جەتەكشىسى مۇراتبەك توقتاعازين تسەلينوگراد اۋدانى اكىمشىلىگى وبلىسقا كوشىرىلگەنى تۋرالى اقپارات ايتا قالدى. قىسقاسى, جانىبەك كارىبجانوۆ مىرزاعا قايتا كىرىپ, بۇگىنگى «Egemen Qazaqstan» گازەتى وتىرعان اۋماقتى تۇتاستاي الدىق. جيىرمادان استام پاتەر, جالعىزباستى جۋرناليستەر ءۇشىن بەس بولمەلى جاتاقحانا ساتىپ الدىق.
گازەتتەگى ەكىنشى ءساتتى ءسات – ءبىز قازاقستان تاريحىن جازا باستادىق. ويتكەنى بۇل كەزەڭدە رەسەي تاريحشىلارى تاراپىنان ارا-تۇرا «قازاقتا بۇرىن مەملەكەت بولماعان» دەگەن پىكىرلەر ايتىلىپ, جازىلا باستاعان ەدى. وسىنداي زىميان پيعىلدىڭ جولىنا توسقاۋىل قويۋ ءۇشىن تاريحتاعى ورنىمىزدى ناقتىلاي ءتۇسۋ قاجەت بولدى. اتاقتى تاريحشىلار مامبەت قويگەلدى, تالاس وماربەكوۆ, كامال بۇرقانوۆ, بەرەكەت كارىباەۆ, بۇركىتباي اياعان, تاعى دا باسقا جاس تاريحشىلار وسى جوبانى جۇزەگە اسىرۋعا بەلسەنە ارالاستى. گازەت بەتىندە زامان, قوعام, دەموكراتيالىق ۇردىستەر جۇزەگە اسىرىلا باستادى. ءارتۇرلى وي-پىكىرلەر قالىپتاسا ءتۇستى. وپپوزيتسيالىق توپتار دا قىلاڭ بەرە باستادى.
وسى كەزەڭدە ءوزىمنىڭ كەڭەسشىم ەتىپ قازاقتىڭ اتاقتى جازۋشىسى, مەملەكەتتىك سىيلىقتىڭ لاۋرەاتى شەرحان مۇرتازانى جۇمىسقا شاقىردىم. ويدى وي, ءسوزدى ءسوز قۋادى. قازاقتىڭ تاعى ءبىر اتاقتى پۋبليتسيست جازۋشىسى كامال اعا سمايىلوۆ ەكەۋىنىڭ اراسىنداعى حاتتى ۇيىمداستىرۋ يدەياسى تۋىندادى. كامال اعا ءبىزدىڭ باسىلىمدا ء«ححى عاسىر – قازاقستان عاسىرى» اتتى تالداۋ ماتەريالىن جاريالاعان ەدى. وعان شەرحان اعامىز جاۋاپ جازدى. كوزى قاراقتى وقىرمان مۇنى ۇمىتا قويماعان شىعار. ەكەۋارا جازىسقان بۇل حاتتاردا ەلىمىزدىڭ جەر استى, جەر ءۇستى بايلىقتارى حالىقتىڭ مۇددەسىنە ەمەس, باسقا ءبىر توپتاردىڭ مۇددەسىنە جۇمسالا باستاعانى اشىق ءارى اشىپ جازىلدى. بۇل حات جازىسۋ ءبىر جارىم جىلعا سوزىلدى. كەيىن ەكى جازۋشىنىڭ قالامىنان تۋعان وسى دۇنيەنىڭ ءبارى «حالقىم, ساعان ايتام, ەلباسى, سەن دە تىڭدا» دەگەن اتپەن كىتاپ بولىپ جارىققا شىقتى.
مەن گازەتكە رەداكتور بولعان كەزدە ەل ومىرىندە ورىن العان ەلەۋلى وقيعانىڭ ءبىرى – استانانىڭ الماتىدان اقمولاعا اۋىسۋى. سول جىلى پرەزيدەنتپەن بىرگە اۋستراليانىڭ بىرنەشە قالاسىن ارالادىق. كانبەررا قالاسىندا بولعاندا پرەزيدەنت بىزدە دە وسى شاھار سياقتى جاڭا استانا بولاتىنىن ايتىپ, اقمولاعا كوشتى باستاۋ تۋرالى تۇڭعىش رەت پارمەن بەردى. ماعان وسى پارمەندى «Egemen Qazaqstan» گازەتىنىڭ مىنبەرىنەن حالىققا العاشقى بولىپ جەتكىزۋ باقىتى بۇيىرعانىن دا ايتا كەتكىم كەلەدى.
جالپى, جوعارىدا ايتقان حات جازىسۋلار مەنىڭ تاعدىرىما دا اسەر ەتتى. سول ءۇشىن جۇمىستان شەتتەتىلدىم. بىراق وعان ەش وكىنبەيمىن. ويتكەنى گازەتتىڭ ۇلت الدىنداعى ميسسياسىن ورىنداۋعا ءوز ۇلەسىمدى ءبىر ادامداي قوستىم دەپ ويلايمىن.
قازىر «Egemen Qazaqstan» گازەتى ادىلەتتى قازاقستاننىڭ جاڭا تاريحىنىڭ جىلناماسىن قالىپتاستىراتىنىنا سەنىمىم مول. گازەت ۇجىمى مەن وقىرماندارىن باسىلىمنىڭ 105 جىلدىق مەرەيتويىمەن شىن جۇرەكتەن قۇتتىقتايمىن. جاساي بەر, «ەگەمەن!».
ءۋاليحان قاليجان,
ۇعا اكادەميگى, «Egemen Qazaqstan» گازەتىنىڭ 1996–1998 جىلدارداعى باس رەداكتورى
