سۋرەت: gov.kz
باسقوسۋدىڭ نەگىزگى تاقىرىبى ەكىجاقتى جانە كوپجاقتى ىنتىماقتاستىقتى نىعايتۋ ماسەلەلەرىن تالقىلاۋ, سونداي-اق حالىقارالىق جانە وڭىرلىك كۇن تارتىبىندەگى ماسەلەلەر بويىنشا سىندارلى پىكىر الماسۋ بولدى. سونىمەن قاتار ءارتۇرلى سالالارداعى ىنتىماقتاستىقتىڭ نەگىزگى باعىتى تالقىلاندى. اسىرەسە ساۋدا-ەكونوميكالىق جانە ينۆەستيتسيالىق ىنتىماقتاستىقتى دامىتۋعا, ونىڭ ىشىندە ەنەرگەتيكا, اۋىل شارۋاشىلىعى, تۋريزم, كولىك جانە لوگيستيكا سالالارىنا ەرەكشە نازار اۋدارىلدى.
سۇحبات بارىسىندا م.نۇرتىلەۋ ەكىجاقتى قاتىناستار دامۋىنىڭ وڭ ديناميكاسىن اتاپ ءوتىپ, 2024 جىلعى اراب ەلدەرىمەن ىنتىماقتاستىقتىڭ نەگىزگى قورىتىندىلارىن ايقىنداپ, الداعى جىلعا ورتاق نەگىزگى مىندەتتەردى بەلگىلەدى.
مينيستر ەلىمىزدىڭ اراب مەملەكەتتەرىمەن سەرىكتەستىگىنىڭ ماڭىزدىلىعىن اتاپ, ورتاق ساياسي, ەكونوميكالىق جانە مادەني-گۋمانيتارلىق بايلانىستار مەن مۇددەلەرگە ەرەكشە ءمان بەردى. سونداي-اق ەلشىلەرگە ەكىجاقتى قارىم-قاتىناستاردى دامىتۋعا قوسقان ۇلەستەرى جانە قازاقستان مەن اراب الەمى اراسىنداعى ىنتىماقتاستىقتى نىعايتۋداعى بەلسەندىلىگى ءۇشىن العىس ءبىلدىردى.
«قازاقستان ءوز سەرىكتەستەرىمەن تاياۋ شىعىس پەن سولتۇستىك افريكادا بار بايلانىستاردى كەڭەيتۋگە جانە ىنتىماقتاستىقتىڭ جاڭا باعىتتارىن زەرتتەۋگە بارلىق مۇمكىندىكتى پايدالانۋعا دايىن جانە بەيىل», دەپ اتاپ ءوتتى م.نۇرتىلەۋ.
اراب ديپلوماتيالىق ميسسيالارىنىڭ باسشىلارى قازاقستاننىڭ بەيبىتشىلىكتى نىعايتۋ, تۇراقتى دامۋ ءارى قاۋىپسىزدىك ماسەلەلەرىن ىلگەرىلەتۋ جولىنداعى ءرولى مەن كۇش-جىگەرىن, سونىڭ ىشىندە بۇۇ, يسلام ىنتىماقتاستىعى ۇيىمى جانە باسقا دا حالىقارالىق الاڭدار شەڭبەرىندەگى باستامالارىن جوعارى باعالادى. اراب ديپلوماتتارى ەلىمىزدىڭ سىرتقى ساياسي ۆەدومستۆوسىمەن تىعىز ىنتىماقتاستىقتى جالعاستىرۋعا جانە ەلدەر مەن وڭىرلەر اراسىنداعى جان-جاقتى بايلانىستاردى كەڭەيتۋگە دايىندىقتارىن راستادى.
دوستىق اتموسفەرادا وتكەن كەزدەسۋدىڭ قورىتىندىسى بويىنشا تاراپتار تۇراقتى ديالوگتى جالعاستىرۋدى قولداپ, بىرلەسكەن جوبالار مەن مىندەتتەردى ىسكە اسىرۋ جولىندا ۇمتىلىستى كۇشەيتۋگە ۋاعدالاستى.
