جارىستا قازىرگى كەزدە كاليفورنيا شتاتىندا تۇرىپ جاتقان باقىتكەلدى قاسەنوۆ تە تابىستى ونەر كورسەتتى. ءبىز بۇعان دەيىن بۇل جىگىتتىڭ قازان ايىندا دزيۋدودان نانكاداعى «Nanka Fall Tournament», سان-حوسەدەگى «San Jose open» تۋرنيرلەرىندە باس جۇلدەنى ولجالاپ, دجيۋ-دجيتسۋدان لوس-اندجەلەستەگى دودادا قولا مەدالدى موينىندا جارقىراتقانى جايىندا جازعانبىز. باقىتكەلدى داللاستا دا ءوزىن جاقسى قىرىنان كورسەتىپ, كۇمىس مەدالعا يە بولدى. جارتىلاي فينالدا مەتتيۋ لەندريدىڭ اياعىن كوكتەن كەلتىرگەن قاسەنوۆ فينالدا مەرلون گارسياعا ەسە جىبەردى. بۇل بالۋانداردىڭ ەكەۋى دە اقش-تان.
«وتباسىممەن بىرگە امەريكادا تۇرىپ جاتقانىما ەكى جىلدان استى. بالا كەزىمنەن سامبو مەن دزيۋدونى سەرىك ەتىپ, جەتىسۋ, الماتى وبلىستارىنىڭ ماڭدايالدى بالۋانى بولدىم, رەسپۋبليكالىق تۋرنيرلەردە جۇلدەگەرلەر قاتارىنان كورىندىم. جاسىم 35-كە تاياپ قالسا دا, سپورتتان ءالى دە قول ۇزگەن جوقپىن. قازىر لوس-اندجەلەستە جاتتىعىپ, جوعارىدا اتالعان سپورت تۇرلەرىنەن بولەك, دجيۋ-دجيتسۋ, گرەپپلينگتەن باق سىناپ ءجۇرمىن. جەڭىپ العان جۇلدەلەرىم دە از ەمەس. الداعى ۋاقىتتا بۇدان دا ءىرى دودالاردا دارالانۋدى كوزدەيمىن. مۇحيتتىڭ ارعى جاعالاۋىندا دا قازاقتىڭ مىقتىلىعى مەن تەكتىلىگىن تانىتۋعا بارىنشا كۇش سالامىن», دەيدى باقىتكەلدى بالۋان.
تۋرنيردە اتاعى الىسقا كەتكەن حاراساۆا حيكاەسي دە كۇش سىناستى. بۇل ەسىم جانكۇيەرلەرگە جاقسى تانىس. الىپتارمەن ايقاسىپ جۇرگەن جاپونيا جۇلدىزى 2016 جىلى ريو-دە-جانەيرودا وتكەن وليمپيا ويىندارىندا كۇمىس مەدال يەلەندى. فينالدا داڭقى جەر جارعان فرانتسيا دزيۋدوشىسى تەددي رينەرگە عانا ۇتىلدى. 2021 جىلى توكيو وليمپياداسىنىڭ كوماندالىق سايىسىندا دا ەكىنشى ورىندى ەنشىلەدى. ودان بولەك, الەم چەمپيوناتىندا 2 التىن, 1 كۇمىس, 1 قولا مەدال ولجالادى. داڭقتى بالۋان تەحاس شتاتىنداعى تۋرنيردە ءوز سالماعىندا توپ جاردى. مىنە, وسى جايتتىڭ ءوزى-اق اتالعان جارىستىڭ دەڭگەيى قانشالىقتى جوعارى بولعانىن اڭعارتادى.
