سۋرەت: kazislam.kz
دەپۋتاتتارعا جوعارى اۋديتورلىق پالاتاسى توراعاسىنىڭ اۋىل شارۋاشىلىعىن سۋبسيديالاۋعا بولىنگەن مەملەكەت قاراجاتىن پايدالانۋدىڭ تيىمدىلىگى جونىندەگى ەسەبىن تىڭداۋ ۇسىنىلادى. اۋديت اۋىل شارۋاشىلىعى مينيسترلىگىندە جانە ونىڭ شىعىس قازاقستان, پاۆلودار, سولتۇستىك قازاقستان جانە تۇركىستان وبلىستارىنداعى اۋماقتىق بولىمشەلەرىندە جۇرگىزىلدى.
سونىمەن قاتار ءماجىلىس ءبىرىنشى وقىلىمدا قۇرىلىس سالاسىن جەتىلدىرۋ جانە تۇرعىن ءۇي قۇرىلىسىنا ۇلەستىك قاتىسۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن قارايدى. قۇجات ءماجىلىس دەپۋتاتتارىنىڭ باستاماسىمەن ازىرلەنگەن جانە تۇرعىن ءۇي قۇرىلىسىنا ۇلەستىك قاتىسۋ شارتتارىن ەلەكتروندى تۇردە جاساۋ مۇمكىندىگىن قاراستىرادى. سونداي-اق ۇلەستىك قاتىسۋ شارتتارىن جەرگىلىكتى اتقارۋشى ورگاندا بىرىڭعاي اقپاراتتىق جۇيە ارقىلى مىندەتتى تۇردە تىركەۋ نورمالارى ۇسىنىلادى.
زاڭ جوباسىمەن جۇمىس بارىسىندا دەپۋتاتتار ۇلەسكەرلەرگە تۇرعىن ءۇي قۇرىلىسى بويىنشا كەڭەس بەرۋدى قولدايتىن ورتالىق قۇرۋ جونىندەگى تۇزەتۋلەردى ەنگىزدى. بۇعان قوسا الدىن الا شارتتاردى, برونداۋ, ينۆەستيتسيالاۋ شارتتارىن جاساسۋعا, سونداي-اق جەرگىلىكتى اتقارۋشى ورگاننان ۇلەسكەرلەردىڭ قاراجاتىن تارتۋعا رۇقسات الىنباعان جانە تۇرعىن ءۇي قۇرىلىسىنىڭ بىرىڭعاي وپەراتورىنىڭ كەپىلدىگىنسىز سالىنىپ جاتقان ۇيلەردىڭ جارناماسىنا تىيىم سالۋ ۇسىنىلادى.
