پالاتا سپيكەرى ءوز سوزىندە فورۋمعا قاتىسۋشىلارعا ءىلتيپات ءبىلدىرىپ, قازاقستان ءۇشىن عىلىمدى جانە عىلىمعا نەگىزدەلگەن ەكونوميكانى دامىتۋ ستراتەگيالىق ماڭىزعا يە ەكەنىن ايتتى. جالپى, مەملەكەت باسشىسى قاسىم-جومارت توقاەۆ جاس عالىمداردى جۇيەلى قولداۋعا جانە وتاندىق عىلىمنىڭ الەۋەتىن ارتتىرۋعا ءاردايىم باسا ءمان بەرىپ كەلەدى.
م.اشىمباەۆ بۇل باعىتتا جاس عالىمدارعا ءوز الەۋەتتەرىن ىسكە اسىرۋعا ۇلكەن قولداۋ كورسەتىپ وتىرعان اليانستىڭ جۇمىسىنا نازار اۋداردى. سونداي-اق ول بىرلەستىك وتاندىق زەرتتەۋشىلەردىڭ عىلىمي-زەرتتەۋ جوبالارىنا باعىت-باعدار بەرىپ, ولاردى دارىپتەۋگە ۇلكەن ۇلەس قوسىپ كەلە جاتقانىن اتاپ ءوتتى جانە وسى باعىتتا اتقارىلعان جۇمىس پەن قول جەتكىزىلگەن جەتىستىكتەرگە نازار اۋداردى.
«ادىلەتتى قازاقستاندا عىلىم, يننوۆاتسيا جانە جاڭا تەحنولوگيا ەلدىڭ ورنىقتى دامۋىنىڭ نەگىزى رەتىندە قاراستىرىلادى. پرەزيدەنتىمىز قاسىم-جومارت توقاەۆتىڭ باستاماسىمەن عىلىم جانە تەحنولوگيالار جونىندەگى ۇلتتىق كەڭەستىڭ قۇرىلۋى – سونىڭ جارقىن كورىنىسى. كەڭەس عىلىمي جانە تەحنولوگيالىق دامۋ سالاسىندا ءتيىمدى, ستراتەگيالىق ماڭىزدى شەشىمدەر قابىلداۋدى قامتاماسىز ەتەدى. ۇلتتىق عىلىم اكادەمياسىنىڭ ينستيتۋتسيونالدىق ءرولى دە ايتارلىقتاي نىعايدى. الداعى ۋاقىتتا بۇل ينستيتۋت عىلىمي قوعامداستىق تابان تىرەيتىن ماڭىزدى نەگىزگە اينالۋعا ءتيىس. كەيىنگى 4 جىلدا قازاقستاندا عىلىمدى قارجىلاندىرۋ ءۇش ەسەدەن اسا ءوسىپ, 80 ملرد تەڭگەدەن 250 ملرد تەڭگەگە جەتتى», دەپ م.اشىمباەۆ وسى سالادا پارلامەنت سەناتى جۇزەگە اسىرعان زاڭنامالىق رەفورمالارعا توقتالىپ ءوتتى.
سەنات توراعاسى اتاپ وتكەندەي, عىلىم ۇلتتىق ستراتەگيالىق ماقساتتارمەن جانە باسەكەلەستىك ارتىقشىلىقتارمەن تىعىز ينتەگراتسيالانىپ, ۇندەسۋگە ءتيىس. پالاتا سپيكەرى ءوز سوزىندە پارلامەنت پەن عىلىمي قوعامداستىقتىڭ الداعى بىرلەسكەن جۇمىسىنىڭ نەگىزگى باعىتتارىن دا تىلگە تيەك ەتتى.
«ەلىمىزدىڭ ازىق-ت ۇلىك قاۋىپسىزدىگىن قامتاماسىز ەتۋ ءۇشىن, ەڭ الدىمەن, اگرارلىق عىلىمدى دامىتۋدىڭ ماڭىزى زور. سونداي-اق تابيعي بايلىعىمىزدى ساقتاۋعا جانە ونى ءتيىمدى پايدالانۋعا مۇمكىندىك بەرەتىن تەرەڭ زەرتتەۋلەر, يننوۆاتسيالىق تاسىلدەر جانە تەحنولوگيالار قاجەت. حيميا, مۇناي-گاز حيمياسى, عارىش عىلىمى سياقتى سالالاردى دامىتۋ دا ستراتەگيالىق مانگە يە. تۇراقتى وسۋگە قول جەتكىزۋ ءۇشىن اتوم ەنەرگەتيكاسىنىڭ دامۋى جانە جاڭارتىلاتىن ەنەرگيا كوزدەرىن پايدالانۋدىڭ جاڭا تاسىلدەرى ماڭىزدى ءرول اتقارادى. وسى سالاداعى باسىم باعىتتاردىڭ تاعى ءبىرى – جاساندى ينتەللەكت. عىلىم ەكونوميكانىڭ تۇراقتى جانە سەرپىندى دامۋىن سينحروندى تۇردە قامتاماسىز ەتە وتىرىپ, ەلدىڭ ستراتەگيالىق ماقساتتارىن ىسكە اسىرۋعا ىقپال ەتۋگە ءتيىس», دەدى پالاتا توراعاسى.
سونىمەن قاتار فورۋم بارىسىندا عالىمدار مەن ساراپشىلار عىلىم سالاسىنداعى وزەكتى ماسەلەلەر مەن پروبلەمالاردى كەڭىنەن تالقىلاپ, سىندارلى ديالوگ قۇردى. سونىڭ ناتيجەسىندە ەلدىڭ الەۋمەتتىك-ەكونوميكالىق دامۋى اياسىنداعى ورتاق مىندەتتەر ايقىندالدى.
