وبلىس ورتالىعىنىڭ ءبىراز بولىگىن جىلۋ, جارىقپەن قامتاماسىز ەتىپ تۇرعان №3 جەو-دا كاسىبي ءارى بىلىكتى جاس مامانداردىڭ شوعىرى ءوسىپ كەلەدى. وسى ورايدا كاسىپورىنداعى تاجىريبەلى ماماندار قاتارىنا قوسىلعان ديدار تولەۋحانوۆتى ايرىقشا اتاپ وتۋگە بولادى. جاس جىگىت ۋنيۆەرسيتەتتى تامامداعان سوڭ, بىردەن اتالعان ستانساعا جۇمىسقا ورنالاسقان. بيىل ەڭبەك ۇيىمىندا تۇراقتاپ قالعانىنا ون ەكى جىل بولىپتى.
«قاراپايىم اۋىل بالاسىمىن, ۇيدەگى 6 ۇلدىڭ كەنجەسىمىن. انام جەكە كاسىپپەن اينالىسسا, اكەم ۇزاق جىل پوليتسيادا ەڭبەك ەتىپ, زەينەتكە شىقتى. مەكتەپتە وقىپ جۇرگەن ۋاقىتتا فيزيكا سالاسىنا اسا قۇمارتقان ەدىم. سول سەبەپ بولدى ما ەكەن, ءبىلىم ۇياسىن تامامداعان سوڭ, «ەلەكتر ەنەرگەتيكاسى» ماماندىعى بويىنشا وقۋ گرانتىنا يە بولىپ, جوعارى وقۋ ورنىنا ءتۇستىم. وتباسىمىزدا بۇل سالادا مەنەن وزگە ەشكىم جۇمىس ىستەمەيدى. كەلىنشەگىم – تاريح ءپانىنىڭ مۇعالىمى», دەيدى بىلىكتى مامان.
ول مۇندا العاشىندا ەلەكتر مونتەرى بولىپ قابىلدانىپ, جىلدار وتە ينجەنەر لاۋازىمىنا ساي ەكەنىن ەڭبەگىمەن دالەلدەدى. قازىرگى لاۋازىمى – ەلەكتر تسەحىندا جوعارى ءۆولتتى سىناقتار جۇرگىزۋ جانە ولشەۋ جونىندەگى ينجەنەر. مىندەتى – كۇردەلى جانە اعىمداعى جوندەۋدەن وتكەن كەز كەلگەن وندىرىستىك جابدىقتى ىسكە قوسپاس بۇرىن سىناقتان وتكىزۋ. بۇل جابدىقتاردىڭ قاتارىنا ترانسفورماتورلار, گەنەراتورلار, 6 كۆت كابەلدىك جەلىلەر ەنەدى. سونىمەن قاتار مەتالل بايلانىستارىن, وزگە دە جابدىقتاردى تەكسەرەدى.
«ەڭبەكتە بارلىعى تاجىريبەمەن كەلەتىنىن جىلدار وتە ءتۇسىندىم. قازىر ءۇش ادامنان تۇراتىن بريگادا باسشىسىمىن. ماڭىزدى جابدىقتاردى الدىن الا تەكسەرەمىز. ەگەر جۇمىسى كوڭىلىمىزدەن شىقپاسا, اقاۋدى ىزدەيمىز. ونى تاپقان سوڭ, ىسكە جوندەۋ بريگاداسى قوسىلادى. بيىل ستانساداعى ءۇش بىردەي قازاندىقتى سىناقتان وتكىزدىك. تۇتىنسورعىش, ەلەكتر جەلىلەرىن ايىرعىش, كابەلدىك جەلىلەر, كومىر ۋاتقىش جابدىقتى تەكسەرىپ شىقتىق. باسشىلار ماعان تاجىريبەلى مامان رەتىندە سەنەدى. ارينە, قيىن كەزەڭدەر بولدى, بىراق تاباندىلىق پەن كاسىبىمە بەرىلگەنىمنىڭ ارقاسىندا بارلىعىن ەڭسەرە ءبىلدىم. بۇگىندە 6-رازريادتى مامانمىن. كەيىنگى جىلدارى بۇل سالاداعى تاريفتەردىڭ وسكەنىنىڭ ناتيجەسىن الەۋمەتتىك تۇرعىدان سەزىنىپ وتىرمىز. ەڭ اۋەلى ءبىز سياقتى قاراپايىم قىزمەتكەرلەردىڭ جالاقىسى ۇلعايدى. قازىر ءوز زامانداستارىمدى بۇل قىزمەتكە ۇيالماي شاقىرا الامىن. سەبەبى بۇرىنعىداي ەمەس, ەڭبەكاقىمىز لايىقتى, وتباسىن اسىراۋىمىزعا جەتەدى», دەيدى ول.
جاس مامان مەملەكەت باسشىسى قاسىم-جومارت توقاەۆتىڭ الداعى جىلدى «جۇمىسشى ماماندىقتار» جىلى دەپ جاريالاعانى قۋانتىپ وتىرعانىن جەتكىزدى. ونىڭ ناتيجەسىندە ەنەرگەتيكا سالاسىنداعى كادر تاپشىلىعى, ەڭبەكاقى ماسەلەسى شەشىلىپ, ماڭىزدى وزگەرىستەر بولادى دەپ ۇمىتتەنەدى.
پاۆلودار وبلىسى
