«KEGOC» اق مەن ەقدب اراسىنداعى كەزدەسۋدە 141 ملرد تەڭگەگە دەيىنگى سوماعا نەسيەلىك كەلىسىمگە قول قويىلدى. ونىڭ ىشىندە قازاقستاننىڭ دامۋ بانكىمەن 32 ملرد تەڭگە سوماسىنا كەلىسىم بار.
«قاراجات ۇزىندىعى شامامەن 600 شاقىرىم 500 كۆ ەلەكتر جەلىسى ينفراقۇرىلىمىن سالۋعا جۇمسالادى. «اتىراۋ – اقتوبە» تاسجولىنىڭ بويىندا «قاراباتان – ولكە» جەلىسى, 500 كۆ قاراباتان قوسالقى ستانساسى سالىنادى. سونداي-اق قاراباتان (220 كۆ), ولكە (500 كۆ) قوسالقى ستانسالارىنداعى تاراتۋ قۇرىلعىلارىن كەڭەيتۋگە جۇمسالادى. بۇل باتىس قازاقستاننىڭ ەنەرگەتيكا جۇيەسىن ەلدىڭ بىرىڭعاي ەلەكتر ەنەرگەتيكاسى جۇيەسىنە قوسۋعا مۇمكىندىك بەرەدى. باتىس ايماقتىڭ وتكىزۋ قابىلەتى 500 مۆت-عا دەيىن ارتادى», دەدى قۇجاتقا قول قويۋ راسىمىندە «سامۇرىق-قازىنا» باسشىسى نۇرلان جاقىپوۆ.
ساراپشىلاردىڭ پىكىرىنشە, جوبانى جۇزەگە اسىرۋ ناتيجەسىندە:
– ەلەكترمەن جابدىقتاۋدىڭ سەنىمدىلىگى كۇشەيەدى;
– ەلەكتر ەنەرگياسى مەن قۋات تەڭگەرىمسىزدىگىن وتەۋگە مانەۆرلىك گەنەراتسيا پايدالانىلادى;
– باتىس ايماقتاردىڭ ەنەرگەتيكا قاۋىپسىزدىگى ارتادى.
«دامۋ جونىندەگى قارجى ينستيتۋتتارىمەن كەلىسىمدەرگە قول قويۋ قوردىڭ ساتىپ الۋ راسىمدەرىنىڭ اشىق ەكەنىن تاعى ءبىر مارتە دالەلدەدى. بۇل ولاردى «KEGOC» اق جوباسىندا قولدانۋعا مۇمكىندىك بەردى», دەدى نۇرلان جاقىپوۆ.
قازاندا پرەزيدەنت قاسىم-جومارت توقاەۆ ەقدب پرەزيدەنتى وديل رەنو-باسسومەن كەزدەسۋ وتكىزگەنى بەلگىلى. قارجى ۇيىمىنىڭ باسشىسى «سامۇرىق-قازىنا» اق ساتىپ الۋ راسىمدەرىنە وڭ باعاسىن بەردى. ونىڭ ايتۋىنشا, نەسيە بەرۋشى كومپانيالار ساتىپ الۋ راسىمدەرىن قوردىڭ ەرەجەلەرىنە سايكەس جۇزەگە اسىرادى. ال بۇل «سامۇرىق-قازىنا» توبىنىڭ ساتىپ الۋ راسىمدەرىنە, ولاردىڭ اشىقتىعىنا دەگەن سەنىمدى بىلدىرەدى.
ەۋروپا قايتا قۇرۋ جانە دامۋ بانكى قوردىڭ پورتفەلدىك كومپانيالارىنىڭ ەنەرگەتيكا, تاۋ-كەن, مۇناي-گاز, كولىك سالاسىنداعى جوبالارىنا قاتىسادى.
ەقدب ءارى قاراي دا «سامۇرىق-قازىنا» اق كومپانيالارى توبىمەن ستراتەگيالىق ينۆەستيتسيالىق جوبالاردى جۇزەگە اسىرۋ جونىندەگى تىعىز سەرىكتەستىكتى جالعاستىرماق.
