كيەلى ولكەدە قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ لاۋرەاتى, اكتەر نۇرقانات جاقىپباي, «قۇرمەت» وردەنىنىڭ يەگەرى, جازۋشى جاقىپجان نۇرعوجاەۆ, قازاقستاننىڭ ەڭبەك سىڭىرگەن قايراتكەرى, كينو جانە تەاتر اكتەرى ومار قيقىم, قازاقستاننىڭ ەڭبەك سىڭىرگەن قايراتكەرى, كۇيشى, كومپوزيتور ەرمۇرات ۇسەنوۆ, فيلوسوفيا عىلىمدارىنىڭ دوكتورى, پروفەسسور سۆەتا بەردىباەۆا, قازاق جۋرناليستيكاسىنىڭ قايراتكەرى ساعاتبەك مەدەۋبەك ۇلى, باسقا دا ەسىمى ەلگە تانىمال اقىندار مەن قالامى قارىمدى جۋرناليستەردىڭ كىندىگى كەسىلگەنىن ەسكەرسەك, بۇلاردىڭ قاتارى ءالى تالاي دارىندارمەن تولىعا تۇسەرى انىق.
اۋىل تۇرعىندارى كوپتەن كۇتكەن نىساننىڭ اشىلۋىنا الماتى وبلىسىنىڭ مادەنيەت, ارحيۆتەر جانە قۇجاتتاما باسقارماسىنىڭ باسشىسى دانيار اليەۆ, وبلىستىق دەنە شىنىقتىرۋ جانە سپورت باسقارماسىنىڭ باسشىسى ەربولات سارابەك ۇلى, جازۋشى اقساۋلە ابدىحالىققىزى, ادەبيەت سىنشىسى باعاشار تۇرسىنباي ۇلى, قارقارالىق ونەر مايتالماندارى, قوعامدىق ۇيىم وكىلدەرى قاتىستى.
«شالعاي اۋىلداردىڭ ىشكى ءتۇيىندى ماسەلەلەرىن ورنىمەن شەشىپ وتىرۋ – مەملەكەتىمىزدىڭ باستى نازارىندا. وبلىس اكىمى مارات ەلەۋسىز ۇلىنىڭ قولداۋىمەن اۋداننىڭ مادەنيەت سالاسىنا تىڭ سەرپىن بەرىلدى. وڭىردەگى جالاعاش, بولەكساز, جىلىساي اۋىلدارىندا زاماناۋي مادەنيەت ۇيلەرى سالىندى. قارابۇلاق مادەنيەت ءۇيى كۇردەلى جوندەۋدەن ءوتىپ جاتىر. سونىمەن قاتار 157 ملن تەڭگەگە مادەنيەت وشاقتارى جىلجىمالى ساحنا, دىبىس كۇشەيتكىش قۇرالدارمەن, ساحنالىق كيىمدەرمەن تولىقتى. جارقىن جوبالاردىڭ جۇزەگە اسۋى – ەڭ الدىمەن, ەلىمىزدىڭ وركەندەپ وسۋىمەن قاتار, جاستارىمىزدىڭ دەنساۋلىعىن نىعايتۋعا, مادەنيەت پەن ونەردىڭ كەڭىنەن تارالۋىنا ىقپال ەتەرى ءسوزسىز», دەدى اۋدان اكىمى نۇرباقىت تەڭىزباەۆ.
جاڭادان اشىلعان مادەني نىسان اۋىل حالقىنىڭ بوس ۋاقىتىن ءتيىمدى پايدالانۋىنا, ءتۇرلى تاقىرىپتا مادەني ءىس-شارالار وتكىزۋگە ارنالعان. سپورتزالمەن بىرىكتىرىلگەن مادەنيەت ءۇيى زاماناۋي قۇرىلعىلارمەن تولىقتاي جابدىقتالعان. تىپتەن, ليفت تە ىسكە قوسىلعان. مۇندا مىڭعا تارتا كىتاپ قورى بار كىتاپحانا مەن ونەر ۇيىرمەلەرى جۇمىس ىستەيتىن بولادى.
«كيەلى كەگەن اۋدانىنىڭ كوز سۇيسىنتەر تابيعاتى مەن سىر تۇنعان تاريحىن تاسپالاپ, اۋداننىڭ فوتوشەجىرەسىن جاساۋدامىز. ونى الداعى ۋاقىتتا تابىستايمىز. كەلەشەكتە وسى عيماراتتا فوتوگراف بولۋعا نيەتتى بالالار بولسا, 2-3 كۇندىك ءدارىس وتكىزىپ, تاجىريبەممەن بولىسۋگە دايىنمىن. مۇنداي ونەر وشاعى بوس تۇرماي, اۋىل بالالارىنىڭ تالانتىن اشىپ, تالابىن ۇشتاۋعا قىزمەت ەتۋى كەرەك», دەدى تۇرعىنداردى قۋانىشىمەن قۇتتىقتاعان رەسپۋبليكالىق «فوتوونەر» قوعامدىق بىرلەستىگىنىڭ توراعاسى, كاسىبي فوتوگراف اسىلحان ءابدىرايىم ۇلى.
سالتاناتتى ءىس-شارا بارىسىندا تۋعان اۋىلىنىڭ اجارىن اشىپ, كوركىن كىرگىزگەن مادەنيەت ءۇيىنىڭ سالىنۋىنا اتسالىسقان ازاماتتارعا وسى اۋىلدان تۇلەپ ۇشقان ونەر قايراتكەرلەرى نۇرقانات جاقىپباي مەن ساعاتبەك مەدەۋبەك ۇلى جۇرەكجاردى العىسىن جەتكىزدى.
بۇدان كەيىن كەڭ سارايداي مادەنيەت ءۇيىنىڭ القىزىل لەنتاسى قيىلىپ, كيمەشەك كيگەن اجەلەر شاشۋ شاشتى. اۋىل حالقى العاش رەت جايلى دا جۇمساق ورىندىققا جايعاسىپ, اۋداندىق كوركەمونەرپازدار ءانسامبىلىنىڭ كونتسەرتتىك باعدارلاماسىن تاماشالادى.
سونداي-اق بۇل كۇنى سپورتزالمەن بىرىكتىرىلىپ سالىنعان عيماراتتا اۋدان ۆولەيبولشىلارىنىڭ اقتىق ويىنى ءوتىپ, جارىس جەڭىمپازدارى باعالى سىيلىقتارمەن ماراپاتتالدى. وسىلايشا ونەرپازدار مەن سپورتشىلار قاتار ونەر كورسەتتى. مادەنيەت ءۇيى الداعى ۋاقىتتا جارقىن ىستەر مەن جەتىستىكتەردىڭ جىلى ۇياسىنا اينالماق.
الماتى وبلىسى
