- كونكيدەن ەلىمىزدىڭ جاسوسپىرىمدەر قۇراماسى پولشانىڭ توماشۋۆ-مازوۆەتسكي قالاسىندا وتكەن الەم كۋبوگىنىڭ كوماندالىق باسەكەسىندە قولا مەدالعا قول جەتكىزدى. ەلىمىزدىڭ تۋى استىندا اناستاسيا بەلوۆودوۆا, ارينا يلياششەنكو, الەنا ليفاتوۆا ونەر كورسەتتى.
- استانانىڭ وڭ جاعالاۋىندا قاجىمۇقان مۇڭايتپاسوۆ اتىنداعى فۋتبول ستاديونى بار. قازىر ول ابدەن ەسكىرىپ, توز-توزى شىقتى. سونىڭ ورنىنا قۇنى 15 ميلليارد تەڭگەدەن اساتىن جاڭا ستاديون سالۋ كوزدەلىپ وتىر. جوسپار بويىنشا كولەمى 15 مىڭ شارشى مەتردى قۇرايتىن, 3 600 كورەرمەنگە ەسەپتەلگەن ءۇش قاباتتى كەشەن 16 ايدا بوي كوتەرۋگە ءتيىس.
- مەكسيكانىڭ مەريد قالاسىندا وتكەن ITF J500 تەننيس ءتۋرنيرىنىڭ جۇپتىق سايىسىندا ءامىر ومارحانوۆ پەن رەسەيلىك تيموفەي دەرپيسكو جەڭىمپاز اتاندى. فينالدا ولار چەحيالىق پەترا برۋنليكا مەن ۇلىبريتانيالىق چارلي روبەرتسوندى 6:4, 6:1 ەسەبىمەن ۇتتى. جەكەلەگەن باسەكەدە ءامىر جارتىلاي فينالعا دەيىن جەتىپ, بۇل مەجەدە فرانتسيالىق توماس فۋرەلگە جول بەردى – 2:6, 3:6.
- تاياۋدا OAC مەن IBA ۇيىمدارى موڭعوليالىق باتارسۋح چينزوريگتىڭ دوپينگ قولدانعانىن تولىقتاي دالەلدەپ, وسى ماسەلەگە بايلانىستى شەشىم شىعاردى. ول ءتورت جىلعا سپورتتان شەتتەتىلدى. ەستەرىڭىزدە بولسا, 63,5 كگ سالماقتا ونەر كورسەتكەن ءدال وسى بىلعارى قولعاپ شەبەرى بىلتىر قىتايدا الاۋى تۇتانعان ازيا ويىندارىنىڭ شيرەك فينالىندا ءبىزدىڭ ەرتۋعان زەينۋللينوۆتى ۇتقان ەدى. ەندى ەرەجەگە ساي ازيادانىڭ قولا مەدالى قازاق بوكسشىسىنا تابىس ەتىلۋگە ءتيىس.
- فينليانديانىڭ رۋكا قالاسىندا شاڭعى سپورتىنان الەم كۋبوگىنىڭ كەزەڭدىك سايىسى اياقتالدى. بۇل جارىستا ەل نامىسىن نايل باشماكوۆ, فەدور كارپوۆ, ولجاس كليمين, سۆياتوسلاۆ ماتاسوۆ, ۆلاديسلاۆ كوۆالەۆ, ۆيتالي پۋحكالو, ەرنار نۇرىسبەكوۆ, داريا رياجكو, نادەجدا ستەپاشكينا, كاميلا ماحمۇتوۆا, كاميلا ەلعازينوۆا, انگەلينا شۋرىگا, كسەنيا شالىگينا قورعادى. وكىنىشكە قاراي, ولاردىڭ بىردە-بىرەۋى كوڭىل كونشىتەرلىك ناتيجە كورسەتە المادى.
- قاراعاندىنىڭ «شاحتەر» فۋتبول كلۋبىنىڭ باس باپكەرى بولىپ يرجي ياروشيك تاعايىندالدى. 47 جاستاعى چەحيالىق ماماننىڭ ەسىمى جانكۇيەرلەرگە جاقسى تانىس. كەزىندە ول ماسكەۋدىڭ تسسكا, لوندوننىڭ «چەلسي», شوتلانديانىڭ «سەلتيك», يسپانيانىڭ «ساراگوسا» مەن «الاۆەس», تاعى باسقا كلۋبتاردا وينادى. چەحيا ۇلتتىق قۇراماسىنىڭ باستى جۇلدىزدارىنىڭ ءبىرى بولدى. كەيىننەن ءوز ەلىنەن بولەك, سلوۆاكيا, سلوۆەنيا, رەسەيدە جاتتىقتىرۋشىلىق قىزمەت اتقاردى.
- فيفا ءوز رەيتينگىن جاڭارتتى. سوڭعى كەزدەرى ساتسىزدىكتىڭ شىرماۋىعىنان شىعا الماي جۇرگەن ەلىمىزدىڭ قۇراماسى وتكەن ايمەن سالىستىرعاندا ءۇش ساتىعا تومەندەپ, قازىرگى كەزدە 110-ورىندا تۇر. ال الدىڭعى لەكتەگى 10 كوماندا مىنالار: ارگەنتينا, فرانتسيا, يسپانيا, انگليا, برازيليا, پورتۋگاليا, نيدەرلاند, بەلگيا, يتاليا, گەرمانيا.
- وتكەن اپتانىڭ سوڭىندا «بارىس» حوككەي كلۋبى ەكى كەزدەسۋ وتكىزدى. جۇما كۇنى ماگنيتوگورسكىدە جەرگىلىكتى «مەتاللۋرگتەن» 0:2 ەسەبىمەن ۇتىلدى. جەكسەنبىدە ماسكەۋدە تسسكا-عا قارسى ويناپ, جەرلەستەرىمىز تاعى دا جەڭىلىستىڭ كەرمەك ءدامىن تاتتى – 1:3. بۇل «بارىستىڭ» قاتارىنان بەسىنشى باسەكەدە جەڭىلۋى.
