كوميسسيا وتىرىسىندا مادەنيەت جانە اقپارات ءمينيسترىنىڭ, سونداي-اق شىمكەنت قالاسى اكىمىنىڭ ەسەبى تىڭدالدى.
قاتىسۋشىلار ۆەدومستۆولىق ماراپاتتار جۇيەسىن, مەملەكەتتىك رامىزدەردى قولدانۋ جانە پايدالانۋ ءتارتىبىن رەتتەيتىن زاڭنامالىق جانە نورماتيۆتىك-قۇقىقتىق اكتىلەردى جەتىلدىرۋ ماسەلەلەرىن قاراستىردى.
جيىن بارىسىندا رەسپۋبليكالىق كوميسسيا بىرقاتار مەملەكەتتىك ورگاننىڭ جاڭادان ءۇش ۆەدومستۆولىق ناگرادا ەنگىزۋ جونىندەگى ۇسىنىسىن قولدامادى.
وسى ورايدا مەملەكەتتىك كەڭەسشى: «ۆەدومستۆولىق ناگرادالار سالاسىن رەتكە كەلتىرۋ كەرەك. بىرىنشىدەن, ۆەدومستۆولىق ناگرادا تۇرلەرىن كوبەيتۋدىڭ قاجەتتىلىگى جوق. قايتا ونى تەرەڭ زەردەلەپ, ماراپاتتاردى وڭتايلاندىرۋ كەرەك. ەكىنشىدەن, ءاربىر مەملەكەتتىك ورگان ءۇشىن ۆەدومستۆولىق ناگرادالاردىڭ كۆوتاسىن بەلگىلەۋ قاجەت. ۇشىنشىدەن, ورتالىق مەملەكەتتىك ورگاندار باسشىلارىنىڭ ۆەدومستۆولىق ناگرادالار سالاسىنا قاتىستى جەكە جاۋاپكەرشىلىگىن ارتتىرعان ءجون», دەپ اتاپ ءوتتى.
ەرلان قارين مەملەكەتتىك, ۆەدومستۆولىق جانە قوعامدىق ماراپاتتار سالاسىندا مەملەكەتتىك باقىلاۋدى قامتاماسىز ەتۋ جۇمىستارى جۇرگىزىلىپ جاتقانىنا نازار اۋداردى. ءتيىستى زاڭدارعا تۇزەتۋ ەنگىزۋ تۋرالى ۇسىنىستار قازىرگى ۋاقىتتا پارلامەنتتىڭ قاراۋىنا جولدانعان.
جيىندى قورىتىندىلاي كەلە, مەملەكەتتىك كەڭەسشى مەملەكەتتىك رامىزدەر, ماراپاتتار جانە گەرالديكا سالاسىنداعى جۇمىستاردىڭ تيىمدىلىگىن ارتتىرۋعا قاتىستى ناقتى تاپسىرمالار بەردى.
