سۋرەتتى تۇسىرگەن – تيشبەك حاميتوۆ
سالتاناتتى كەشكە ونەر مەن مادەنيەت قايراتكەرلەرى, ءار جىلدارى قارقارالىعا ءان-جىرىن ارناعان اقىن, سازگەر مەن جەزتاڭداي انشىلەر قاتىستى.
الىس-جاقىننان كەلگەن مەيماندارعا, انسۇيەر قاۋىمعا اۋدان اكىمى ءادىلجان ارعىنوۆ قۇتتىقتاۋ ءسوزىن جەتكىزىپ, لەبىزىن ءبىلدىردى.
ودان سوڭ ءمادي ءباپي ۇلىنىڭ ايگىلى انىمەن اتالعان «اتىڭنان اينالايىن, قارقارالى!» ءان جيناعىنىڭ تۇساۋكەسەر ءراسىمى جاسالدى. قارقارالىنىڭ 200 جىلدىق تويىنا ەرەكشە تارتۋ-تارالعى بولعان ءان جيناقتىڭ تۇساۋىن قازاقستاننىڭ ەڭبەك سىڭىرگەن قايراتكەرى رىمبالا وماربەكوۆا, اۋدان باسشىسى ءادىلجان ارعىنوۆ, قازاقستاننىڭ مادەنيەت قايراتكەرى قارلىعاش قۇسپانوۆا, بەلگىلى كومپوزيتور قانات مەرساليموۆ كەسىپ, الپىستان استام ءان جيناقتالعان توپتاماعا ءسات ساپار تىلەدى.
ساحنادا ەلگە كەڭىنەن تانىلعان اسەم اندەر شىرقالدى. ادەمى اۋەندەر تۋعان جەردى تەربەدى, تىڭدارمان قاۋىمنىڭ جۇرەگىن تەبىرەنتتى.
ءداستۇرلى ءان ونەرىنىڭ بۇگىنگى الىبى جاقسىگەلدى كەمالوۆ باستاعان داۋرەنبەك اركەنوۆ, سەرجان مۇسايىن, نۇرلىتاڭ ساياتقىزى, سارسەن ابىشەۆ, ازامات امانتاي ۇلى سىندى تالانتتاردىڭ انىنە قۇلاق سالدى.
«سالتانات» ءان-بي ءانسامبلىنىڭ, «قارقارالى اۋەندەرى» ءانسامبلىنىڭ, «اڭىز» حورەوگرافيالىق بي توبىنىڭ, ونەر مەكتەبى ورەندەرىنىڭ, جەرگىلىكتى ونەرپازداردىڭ بەكزادا ونەرىنە بەك ءتانتى بولىپ, قوشەمەت ءبىلدىردى.
وسىلايشا ارقانىڭ ءىنجۋ-مارجانى اتانعان قارقارالىعا ارنالعان اندەر جيناقتالىپ, ەل ىشىنە تارالىپ, تاريحقا اينالدى.
قاراعاندى وبلىسى
