وسى ورايدا بيىل اتىراۋدا وتكەن ۇلتتىق قۇرىلتايدا مەملەكەت باسشىسى قاسىم-جومارت توقاەۆ قوعامىمىزدا جاڭا ەتيكا قالىپتاستىرۋ قاجەتتىگىنە باسا نازار اۋدارا كەلىپ, يدەولوگيالىق تۇجىرىمدارىمىز بەن نەگىزگى باعىتتارىمىز – جالپىۇلتتىق قۇندىلىقتار جۇيەسىن تاۋەلسىزدىك پەن وتانشىلدىق, بىرلىك پەن ىنتىماق, ادىلدىك پەن جاۋاپكەرشىلىك, زاڭ مەن ءتارتىپ, ەڭبەكقورلىق جانە كاسىبي بىلىكتىلىك, جاسامپازدىق جانە جاڭاشىلدىق ۇعىمدارى نەگىزىندە قۇرۋدى اتاپ كورسەتتى.
ارينە, بۇگىندە قوعامعا قانداي دا ءبىر قۇندىلىقتاردى ماجبۇرلەپ ەنگىزۋ مۇمكىن ەمەس. بىراق پرەزيدەنت كۇن تارتىبىنە شىعارىپ, حالىققا ۇسىنعان جوعارىدا اتالعان قۇندىلىقتار جۇيەسىنە ەستى ادام قارسىلىق تانىتىپ, بۇرا تارتار پىكىرىن بىلدىرمەيتىنى انىق. ويتكەنى بولاشاققا سەنىممەن قاراپ وتىرعان حالقىمىز وسىناۋ قۇندىلىقتاردىڭ قوعامدا ورنىعۋىنا, وسىنداي جالپىۇلتتىق باعداردىڭ بەلگىلەنگەنىنە مۇددەلى.
بۇل ايتىلىپ وتىرعان ماسەلەلەر – جالپىحالىقتىق ءىس. بۇعان ازاماتتىق قوعامنىڭ, جالپى حالىقتىڭ قولداۋى قاجەت. ونسىز وڭ ناتيجەگە جەتۋ نەعايبىل. بىزگە قازىرگى تاڭدا ۋاقىت تالابىنا, زامان سۇرانىسىنا ساي ءىس-قيمىل كەرەك-اق. بۇل قاجەتتىلىكتەردى ىسكە اسىرۋ ءۇشىن اياققا ورالعى بولىپ كەلە جاتقان ەسكى, تاپتاۋرىن كوزقاراستار مەن دامۋعا كەرى اسەر ەتۋدەن باسقا ەشتەڭەسى قالماعان, رەسۋرسى تاۋسىلعان, كەرىسىنشە كەلەڭسىز, جويداسىز ارەكەتتەرگە اينالعان ءىس-قيمىلداردان ارىلۋ ابزال. بۇلاي ەتپەيىنشە ىلگەرىلەۋ, ىلكىمدى ويعا جۇگىنۋ, ىزگى نيەتتىڭ شاۋجايىنا جارماسۋ قيىن.
بۇگىنگى قوعامىمىزدى جەڭىلتەكتىك, سابىرسىزدىق, بايىبىنا بارىپ جاتپاي بايبالام سالۋ, ورىنسىز داۋرىعۋ, كوپكە ويلانباستان توپىراق شاشۋ, جازىقتىنى تەرگەپ-تەكسەرمەستەن جاردان قۇلاتىپ جىبەرۋ, جازىقسىزعا جالا جاۋىپ, جانىن جارالاۋ, يگى ىستەردى كولەڭكەدە قالدىرۋ, كورمەۋ, قيت ەتكەندى ەلدىڭ, وتانىمىزدىڭ باستى ولقىلىعى رەتىندە كورسەتۋدە جارىسۋ, تاعىسىن تاعىلار «بيلەپ-توستەپ» تۇر. مۇنداي جاعىمسىز كورىنىستەرگە توقتام سالۋ, ونى شىدەرلەپ, تۇساۋ ءۇشىن جوعارىدا اتالعان قۇندىلىقتار جۇيەسىن ومىرشەڭ ەتۋدى, لايىقتى قولدانۋدى, باسشىلىققا الۋدى باستى مىندەتتەرىمىزدىڭ ءبىرى رەتىندە قاراستىرۋ قاجەت-اق. مۇنى جۇزەگە اسىرۋعا ەل الەۋەتى تولىق جەتەدى. بۇل, پرەزيدەنت سوزىمەن ايتقاندا, الەمدە «زاڭنىڭ كۇشى ەمەس, كۇشتىنىڭ زاڭى» دەگەن قاعيدات ۇستەمدىككە يە بولىپ, ەگەمەندىگى وسال مەملەكەتتەردىڭ ماڭدايىنا وزگەگە كىرىپتار بولۋ جازىلعان-مىس دەگەن پايىمعا جول بەرىلە باستاعان بۇگىنگى زاماندا وتە وزەكتى.
قوعامدى دامىتۋدا, زامان تالابىنا ساي ءىس-قيمىل جاساۋدا مەملەكەتشىل, ادال ازاماتتاردى ۇلگى ەتۋ, ولاردىڭ قابىلەت-قارىمىن يگىلىكتى ىستەرگە باعىتتاۋ ماڭىزدى. بۇل ءوز كەزەگىندە قۇندىلىقتارىمىزدى قوعامنىڭ دۇرىس, ءوز دەڭگەيىندە قابىلداۋىنا, حالقىمىزدىڭ مادەني-رۋحاني ءومىرىن زامان سۇرانىسىنا ساي بەيىمدەۋگە, سول ارقىلى نەگىزگى مىندەتتەرىمىزدى بەلگىلەپ, ونى لايىقتى ورىنداۋىمىزعا جول اشادى. ويتكەنى ادال ازامات قۇندىلىقتاردى تۋ ەتىپ, ونىڭ باعاسىن ءاردايىم كوتەرە بىلەدى. سوندىقتان ادال ادام ۇلتتىق قۇندىلىقتارىمىزدىڭ ەڭ باستىلارىنىڭ ءبىرى رەتىندە دارىپتەلۋگە ءتيىس. ادال ازاماتتاردى ناسيحاتتاۋدا اقپاراتتىق وزىق تەحنولوگيالار كەڭىنەن قولدانىلعانى ابزال. سونىمەن قاتار ادەبيەت, كينو, مۋزىكا سالالارىندا ادال ازامات بەينەسى باستى كەيىپكەر رەتىندە كورىنىپ, حالىق نازارىنا لايىقتى دەڭگەيدە ۇسىنىلۋى قاجەت.
ادال ادامنىڭ ۇستانىمى – ادىلدىك پەن جاۋاپكەرشىلىك. وسىنداي ادال ادامداردىڭ قاتارى قالىڭ بولسا, ەلدىڭ دە جوسپارى اۋقىمدى, ەڭسەسى بيىك, قادامى نىق.
پرەزيدەنت ايتقانداي, «ادىلەتتى قازاقستان – ادال ازامات – وزىق ويلى ۇلت» دەگەن ۇشتاعان ۇعىم ەل بولاشاعىنىڭ نەگىزگى سيپاتىن كورسەتەدى. ال ادىلەتتى قوعام قۇرا العان, ادال ازاماتىن ارداقتاي بىلگەن جۇرت قاشاندا وزىق ويلى, ءوز قۇندىلىقتارىنىڭ قادىرىن بىلەتىن ۇلت ساناتىندا بولاتىنى بەلگىلى. ال مۇنىڭ ىرگەتاسى پرەزيدەنت ۇسىنعان «ادال ازامات – ادال ەڭبەك – ادال تابىس» قاعيداتىن ۇستانعاندا عانا بەرىك قالانباق.
