اۋىلشارۋاشىلىق داقىلدارىنىڭ ونىمدىلىگىن ارتتىراتىن ءتيىمدى جولدىڭ ءبىرى – وسىمدىكتى حيميالىق جولمەن قورعاۋ. ونىڭ باستى سەبەبى – حيميالىق زاتتى قولدانۋ كولەمى مەن اۋىلشارۋاشىلىق داقىلدارى ونىمدىلىگىنىڭ ارتۋى اراسىنداعى بايلانىس. ياعني حيميالىق زاتتى قولدانۋ ارتقان سايىن, ءونىم الۋ كولەمى دە ەسەلەنەدى.
ق.ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ عالىمدارى جەرگىلىكتى جانە ارزان شيكىزاتتى پايدالانا وتىرىپ, اۋىلشارۋاشىلىق داقىلدارىن بيولوگيالىق قورعاۋعا جانە ونىمدىلىگىن ارتتىرۋعا ارنالعان گۋمين نەگىزىندەگى وتاندىق ءونىم شىعاردى. ونى الاكول كەن ورنىنداعى قوڭىر كومىر مەن قۇس فابريكالارىنداعى قۇس ساڭعىرىعىنان سينتەزدەپ العان.
«گۋميندىك زات قۇرامىندا ءوسۋ ستيمۋلياتورى جانە ميكروتىڭايتقىش رەتىندە وسىمدىكتەرگە كەشەندى اسەر ەتەتىن گۋمين قىشقىلى مەن فۋلۆو قىشقىلى كوپ مولشەردە كەزدەسەدى. سونىمەن قاتار اتالعان زات توپىراقتىڭ قۇرىلىمىن, بۋفەرلىك جانە يون الماسۋ قاسيەتتەرىن دە جاقسارتادى. گۋمين توپىراقتاعى لاستاۋشى زاتتاردى ءسىڭىرىپ, ولاردىڭ وسىمدىك بويىنا وتۋىنە جول بەرمەيتىن قورعانىس قىزمەتىن اتقارادى. گۋمين قىشقىلىن قولدانۋ – وسىمدىكتىڭ تىنىس الۋ ءۇردىسى, فوتوسينتەز, سۋ الماسۋ قارقىنىن ارتتىرىپ, حلوروفيلل مەن اسكوربين قىشقىلى كونتسەنتراتسياسىنىڭ جوعارىلاۋىنا ىقپال ەتەدى. زەرتتەۋ ناتيجەسىندە الاكول كومىر كەن ورنىنان الىنعان گۋمين شىعىمى جوعارى ەكەنى انىقتالىپ, كومىردى الدىن الا وڭدەۋدە تۇز قىشقىلى ءتيىمدى ەكەنى بەلگىلى بولدى», دەيدى اتالعان جوعارى وقۋ ورنىنىڭ جەتەكشى عىلىمي قىزمەتكەرى, تەحنيكا عىلىمدارىنىڭ كانديداتى سانا قابدراحمانوۆا.
زەرتحانالىق جاعدايدا انىقتالعان گۋمين قىشقىلىنىڭ سويانىڭ ءونۋى مەن وسۋىنە اسەرى جوعارى بولىپ, سويا تۇقىمىنىڭ ونىمدىلىگى 70 پايىزعا ارتقان. سونداي-اق الدىڭعى جۇرگىزىلگەن زەرتتەۋ ناتيجەلەرى گۋمين قىشقىلىن قولدانۋ ناتيجەسىندە اۋىل شارۋاشىلىعى داقىلدارىنىڭ ونىمدىلىگى ورتا ەسەپپەن 30-90 پايىزعا ارتاتىنىن انىقتاعان. ەندىگى كەزەكتە عالىمداردىڭ الدىندا الىنعان گۋمين ءونىمىن دالالىق جاعدايدا زەرتتەۋ جۇمىسى تۇر.
