10 جاسقا دەيىنگى ويىنشىلار اراسىندا الاننا بەرىكقىزى اسقان شەبەرلىگىمەن ءتانتى ەتتى. 100 ۇمىتكەردىڭ اراسىنان سۋىرىلىپ شىققان قازاق قىزى التىننان القا تاقتى. جارىس بارىسىندا ول 11 تۋردان كەيىن 9,5 ۇپاي جينادى. ءسويتىپ, الاننا ءوزىنىڭ باستى قارسىلاستارى – امەريكالىق ەيمي يانگ (9 ۇپاي) پەن موڭعوليالىق يدەر تسەلمۋندى (8,5 ۇپاي) ارتقا تاستادى. بىلتىر ول 9 جاسقا دەيىنگى شاحماتشىلاردىڭ سايىسىندا توپ جارعان ەدى. مىنە, ەندى بەرىكقىزى ەكى دۇركىن الەم چەمپيونى اتانىپ وتىر.
12 جاسقا دەيىنگى ۇلدار اراسىندا مارك سميرنوۆقا تەڭ كەلەر ەشكىم تابىلمادى. 11 تۋردان كەيىن 10 ۇپايدى قورجىنعا سالعان وتانداسىمىز باس جۇلدەنى قانجىعاسىنا بايلادى. بۇل ساناتتاعى 150 ويىنشىنىڭ اراسىنان پولشالىق انتوني رادزيمسكي مەن فرانتسيالىق داۆيد لاسان رۋس ەكىنشى, ءۇشىنشى ورىنداردى ءوزارا ءبولىستى. ەكەۋى دە 8,5 ۇپايدان جيدى. ءدال وسى جاستاعى قىزدار اراسىندا حانزادا امانجول قىتايلىق سيۋە تيانحاومەن بىردەي ناتيجە كورسەتتى. ەكەۋىندە دە – 9 ۇپاي. بىراق قوسىمشا كورسەتكىشتەر بويىنشا سيۋەنىڭ باعى جانىپ, ءبىزدىڭ حانزادا كۇمىس مەدالدى قاناعات تۇتتى. قولا جۇلدەنى ۆەتنامدىق تونگ تحاي حوانگ ان (9 ۇپاي) يەلەندى.
يتاليادا وتكەن جارىستا بارلىعى 77 مەملەكەتتەن كەلگەن 710 شاحماتشى باق سىنادى. سولاردىڭ اراسىنان ەلىمىزدىڭ قۇراماسى (2 التىن, 1 كۇمىس) بارلىعىنان وزىپ, جالپىكوماندالىق ەسەپتە ءبىرىنشى ورىندى ولجالادى. قىتاي (2 التىن, 1 قولا) ەكىنشى ورىن السا, ءۇندىستان (1 التىن, 1 قولا) ءۇشىنشى ساتىعا جايعاستى.
