جاس سپورتشىنىڭ اتالعان ماڭىزدى جەتىستىككە جەتۋىنە مىقتى ءتارتىپ, كۇندەلىكتى جاتتىعۋلار جانە اتا-اناسىنىڭ ءاردايىم قولداۋى ۇلكەن ءرول اتقاردى. 2007 جىلى 10 قاراشادا استانادا دۇنيەگە كەلگەن ول قارشادايىنان ەرەكشە تاباندى ءارى ماقساتشىل بولعان ەكەن. كاراتەمەن شۇعىلدانۋدى 7 جاسىندا باستاپتى. ەلنۇر ءداۋىلباي العاشقى قادامدارىن «استانا كاراتە ورتالىعىندا» جاتتىقتىرۋشى ارمان مۇحامەدراحىمنىڭ جەتەكشىلىگىمەن جاسادى. كەيىنگى جىلدارى جاس سپورتشىنىڭ الەۋەتىن قر كيوكۋشينكاي KWF فەدەراتسياسىنىڭ جاتتىقتىرۋشىسى دارحان راحيمجانوۆ اشتى.
10 جىلدىق سپورتتىق مانسابىندا ەلنۇر ءداۋىلباي 28 قولا, 22 كۇمىس, 32 التىن مەدال جانە 26 كۋبوك جەڭىپ العان. الايدا, ونىڭ ەڭ ماڭىزدى جەتىستىگى رەتىندە – 16 جاسىندا كاراتەدەن «سپورت شەبەرى» اتاعىن العانىن ايتا كەتكەن ءجون. جىل سايىن گەرمانيا, نيدەرلاند, رەسەي, تۇركيا, جاپونيا ەلدەرىندە وتەتىن جارىستاردا ول ءاردايىم جەڭىس تۇعىرلارىنان كورىنىپ كەلەدى.
ءبىر قىزىعى, وسىنداي مول جەتىستىگى بولا تۇرا جاس سپورتشى ارحيتەكتور بولۋدى ارماندايدى. سونىمەن قاتار, ول وتاندىق كاراتەنىڭ كوشباسشىسى بولۋ مارتەبەسىن ساقتاپ قالۋدى ماقسات ەتەدى.
وتباسى مەن مەكتەبىنىڭ جانە بۇكىل ەلدىڭ ماقتانىشى ەلنۇر ءداۋىلباي تاباندىلىقتىڭ, جاقىندارىنىڭ قولداۋىنىڭ جانە سۇيىكتى ىسىنە دەگەن ادالدىقتىڭ ەرەكشە ناتيجەلەرگە اكەلەتىنىن ءاردايىم ايعاقتاپ ءجۇر.
