سۋرەتتەردى تۇسىرگەن – دميتري ەروفەەۆ
بۇل – وبلىس ورتالىعىنان جىراقتا ورنالاسقان اۋدان, قالالاردا اشىلعان ءتورتىنشى ورتالىق. اۋىل جۇرتىن تاتۋلىققا شاقىرىپ, تۇرمىسىن تۇزەۋگە باعىتتالعان نىساندا ارنايى دايىندىقتان وتكەن ماماندار قىزمەت كورسەتەدى. ءوڭىر اكىمى ءباسپاسوز قىزمەتىنىڭ مالىمەتىنشە, قوعالى اۋلىنداعى ورتالىقپەن قاتار جىل سوڭىنا دەيىن قاراتال, الاكول اۋداندارىندا وسىنداي مەكەمەلەر اشىلادى. كەلەر جىلى ءدال وسىنداي ورتالىقتى ەسكەلدى, كوكسۋ, اقسۋ اۋداندارىندا اشۋ جوسپارلانىپ وتىر.
جالپى, «جانۇيا» وتباسىن قولداۋ ورتالىعى مەملەكەت باسشىسىنىڭ تاپسىرماسىنا سايكەس الەۋمەتتىك جاعىنان وسال وتباسىلاردىڭ ءومىر ءسۇرۋ ساپاسىن جاقسارتۋ, ولاردىڭ ەكونوميكالىق دەربەستىگىنە, ازاماتتاردىڭ ومىرلىك قيىن جاعدايدان شىعۋىنا قولداۋ كورسەتۋ ماقساتىندا جۇمىس ىستەيدى.
قوعالىدا كەزىندە اۋداندىق ەمحانا بولىپ, كەيىن ءبىرشاما ۋاقىت بوس تۇرعان عيماراتقا اعىمدىق جوندەۋ جۇمىسى جۇرگىزىلىپ, قۇرال-جابدىقتارى ساتىپ الىنعان. وعان جەرگىلىكتى بيۋدجەتتەن ارنايى قاراجات قاراستىرىلدى. ءسويتىپ, ورتالىق ىسكە كىرىستى. نىساننىڭ ديرەكتورى داۋرەن جۇماعاليەۆتىڭ ايتۋىنشا, ورتالىقتا 15 ادامعا ارنالعان جاتىن ورىن, بالالاردىڭ ويىن بولمەسى بار, كىر جۋاتىن ورىن, اسحانا, تىنىعۋ بولمەسى جان-جاقتى جابدىقتالعان. الداعى ۋاقىتتا مەكەمەگە ارنايى كولىك بەرىلەدى دەپ كۇتىلىپ وتىر. مۇندا 19 ادام تۇراقتى جۇمىس ىستەيدى. جاڭا مەكەمە تولىقتاي مەملەكەتتەن قارجىلاندىرىلادى.
«بۇل ورتالىقتا وتباسىلىق جانجالداردى شەشۋگە باعىتتالعان شارالار ىسكە اسىرىلىپ, قيىن جاعدايعا تاپ بولعان ادامدارعا الەۋمەتتىك, زاڭدىق, پسيحولوگيالىق قولداۋ كورسەتىلەدى. تۇرمىستىق زورلىق-زومبىلىق بەلگىلەرى بار ادامدارعا ءبىر ايعا دەيىنگى مەرزىمدە ۋاقىتشا تۇرۋ مۇمكىندىگى بەرىلەدى. بۇل مەكەمەنىڭ كاسىبي ماماندارى وڭىردەگى ءتۇرلى الەۋمەتتىك-تۇرمىستىق ماسەلەلەردىڭ وڭ شەشىلۋىنە ىقپال ەتەدى دەپ سەنەمىن», دەيدى د. جۇماعاليەۆ.
جەرگىلىكتى تۇرعىندار مۇنداي ورتالىقتاردىڭ بولعانى دۇرىس دەپ ەسەپتەيدى.
«وتباسى – مەملەكەتتىڭ ءبىر بولشەگى. مەملەكەت مىقتى بولسىن دەسەك, الدىمەن ءار وتباسى بەرىك بولۋى كەرەك. قازىرگى كەزدە ءارتۇرلى الەۋمەتتىك-تۇرمىستىق جاعدايلارعا بايلانىستى وتباسىلار, اسىرەسە جاس وتباسىلار ءتۇرلى قيىندىقپەن بەتپە-بەت كەلىپ جاتادى. اجىراسۋ دا جيىلەپ كەتتى. سوندىقتان دەر كەزىندە وتباسىلارعا قولداۋ كورسەتۋدىڭ ماڭىزى زور», دەيدى قوعالى اۋىلدىق وكرۋگى اقساقالدار كەڭەسىنىڭ توراعاسى سەرىك تۋربەكوۆ.
ەندىگى رەتتە ومىرلىك قيىن جاعدايعا تاپ بولعان ادامداردى ەرتە انىقتاۋ مەن قولداۋدى ۇيىمداستىرۋ ماقساتىندا اۋداندا ءموبيلدى توپتار قۇرىلادى. ءموبيلدى توپ قۇرامىندا اۋىل وكرۋگتەرىنىڭ اكىمدەرى, الەۋمەتتىك ماسەلەلەر جونىندەگى قىزمەتكەرلەر, ءبىلىم بەرۋ, دەنساۋلىق ساقتاۋ سالالارى, ىشكى ىستەر ورگاندارىنىڭ وكىلدەرى قامتىلادى, ياعني بۇل ىستە بارلىق سالا مامانى بىرلەسىپ جۇمىس ىستەيدى.
ايتا كەتەيىك, «جانۇيا» وتباسىن قولداۋ ورتالىقتارى 2023 جىلى پانفيلوۆ, سارقان اۋداندارى مەن تەكەلى قالاسىندا اشىلعان. ولارعا 82 وتباسى تىركەلىپ, پسيحولوگيالىق, الەۋمەتتىك كومەك بەرىلىپ, قىزمەت كورسەتىلگەن. ال بۇل – اۋىلدا اشىلعان ەكىنشى ورتالىق. بۇعان دەيىن مۇنداي ورتالىقتار وتكەن جىلى پانفيلوۆ, سارقان اۋداندارى مەن تەكەلى قالاسىندا ىسكە كىرىسكەن ەدى.
جەتىسۋ وبلىسى
