ەكولوگيالىق ءبىلىمنىڭ بەرەرى مول

تابيعاتتى ايالاۋ, قورشاعان ورتانى قورعاۋ, ەكو­لو­گيالىق قاۋىپسىزدىككە باعدارلانعان, بالالارعا ارنال­عان عى­لىمي, تاجىريبەلىك ءبىلىم جۇيەسى ازىرلەنبەك. 2029 جىلعا دەيىن «جاسىل بالاباقشا» باعىتىنا سايكەس 622 مەكتەپكە دە­يىنگى ۇيىم قۇرۋ, وقۋشىلار اراسىندا سىنىپ ساعاتتارىن, ەكو­لوگيالىق جوبالار بايقاۋلارىن وتكىزۋ جوسپارلانىپ وتىر.

«قازىرگى جەتىستىكتەردى ەسكەرە وتىرىپ, وقىتۋ­شىلار­دىڭ بىلىكتىلىگى ارتتىرىلادى, ءبىلىم باعدار­لامالارى جا­ڭارتىلادى, ەكولوگيالىق قاۋىپسىزدىككە جاۋاپتى باس­شى­لار­دى, مامانداردى كاسىبي قايتا دايارلاۋ كۋرستارى ۇيىم­داستىرىلادى. ەكولوگيا سالاسىنداعى ءبىلىم باعدار­لامالارى كاسىبي ستاندارتتارعا سايكەس جاڭارتىلادى, بۇل ەكولوگيالىق مىندەتتەردى ءتيىمدى شەشۋگە قابىلەتتى مامانداردى دايارلاۋعا مۇمكىندىك بەرەدى», دەدى مينيسترلىك وكىلى.

سپيكەردىڭ ايتۋىنشا, ۋنيۆەرسيتەتتەر اۋماعىندا كوكونىس, جەمىس-جيدەك وسىرەتىن «Community Gardens» قو­عامدىق باقتارى اشىلادى. باق ستۋدەنتتەرگە ەكولوگيا, ورگانيكالىق ەگىنشىلىك, اۋىل شارۋاشىلىعى نەگىزدەرىن تاجىريبەلىك وقىتۋ الاڭىنا اينالادى, سونداي-اق ولاردىڭ ۇجىمدىق ەڭبەك, قورشاعان ورتاعا دەگەن جاۋاپكەرشىلىك داعدىلارىن قالىپتاستىرۋعا ىقپال ەتەدى.

جوعارى وقۋ ورىندارىندا قوعامدىق كولىكتى, ۆەلو­سيپەدتەردى پايدالانۋدى, جاياۋ سەرۋەندەۋدى ىنتالاندىرۋ ماقساتىندا «Green Transportation Initiatives» باستاماسىن ەنگىزۋ جوسپارلانعان. وسى باستامالار اياسىندا جول ءجۇرۋ قۇنىنا جەڭىلدىكتەر بەرىلەدى, ەكولوگيالىق تازا كولىكتەرگە ارنالىپ, ۆەلوسيپەد جولدارى, اۆتوتۇراقتار سالىنادى. بۇل ءىس-شارالار ۋنيۆەرسيتەت ستۋدەنتتەرى مەن قىزمەتكەرلەرىنىڭ كومىرتەگى ءىزىن ازايتۋعا, سونداي-اق ەكولوگيالىق قاۋىپسىز قوزعالىس تاسىلدەرىن ناسيحاتتاۋعا قاتىستى جۇمىستاردى جۇيەلى جۇرگىزۋىنە مۇمكىندىك بەرەدى.

مەملەكەتتىك قىزمەتشىلەردىڭ دە ەكولوگيا سالا­سىنداعى ءبىلىمىن تەرەڭدەتۋگە, قۇزىرەتتەرىن دامىتۋعا باعىتتالعان بىلىكتىلىكتى ارتتىرۋ كۋرستارىن ەنگىزۋ كوزدەلگەن. ءبىر سوزبەن, باستاما ەكولوگيالىق ءبىلىم بەرۋ ماسەلەلەرىن جان-جاقتى قاراستىرۋعا, حالىقتىڭ ءتۇرلى ساناتتارى اراسىندا ەكولوگيالىق اقپارات الۋ مەن جاۋاپكەرشىلىك دەڭگەيىن ارتتىرۋعا, سونداي-اق زامان تالابىنا ساي ەكولوگيالىق سىن-قاتەرلەرگە توتەپ بەرۋگە قابىلەتتى مامانداردى دايارلاۋعا جول اشادى.