فوتو: اشىق دەرەككوز
مامانداردىڭ دەرەكتەرىنە سايكەس, قاراشا ايىنىڭ 26, 27 جانە 28-ءى كۇندەرى قازاقستان بويىنشا تۇراقسىز اۋا رايى كۇتىلەدى. ەلىمىزدىڭ وڭتۇستىگىندە جەلدىڭ ەكپىنى سەكۋندىنا 28 مەترگە جەتەدى.
مەتەورولوگتاردىڭ مالىمدەمەسىنە سۇيەنسەك, رەسپۋبليكانىڭ باسىم بولىگىنىڭ اۋا رايىن اۋقىمدى انتيتسيكلون انىقتايدى, سول سەبەپتەن جاۋىن-شاشىنسىز اۋا-رايى بولجانىپ وتىر.
«تەك باتىستا, وڭتۇستىك-باتىستا جانە وڭتۇستىكتىڭ تاۋلى ايماقتارىندا, 28 قاراشادا كۇندىز ەلىمىزدىڭ سولتۇستىگىندە جانە ورتالىعىندا اتموسفەرالىق فرونتالدى بولىمدەردىڭ وتۋىمەن جاۋىن-شاشىن (جاڭبىر, قار) جانە كوكتايعاق بولۋى ىقتيمال», دەلىنگەن حابارلامادا.سونىمەن قاتار رەسپۋبليكا بويىنشا تۇمان ءتۇسىپ, جەل كۇشەيەدى, ەكپىنى - 15-20 م/س. ال ەلدىڭ وڭتۇستىگىندە ەكپىنى 23-28 م/س دەيىن جەتەدى. تەمپەراتۋرالىق فوندا كۇرت وزگەرىستەر كۇتىلمەيدى.
