وبلىستىق پد مالىمەتىنشە, وقيعا اقتوبە قالاسىندا بولعان. قالا تۇرعىنى بۇرىنعى ايەلى مەن بالالارىنا الكوگولدىك ماساڭ كۇيدە كەلىپ جانجال شىعارىپ, كوشەدە كامەلەتكە تولماعان ۇلدارىنا ءتيىسىپ, قول جۇمساعان. بالالارىن بۇل جەردەن دەرەۋ الىپ كەتۋگە تىرىسقان اناسىن قۋىپ جەتىپ, قاساقانا نيەتپەن ايەلگە بىرنەشە سوققىلار جاساعان.
«بۇل دەرەك بويىنشا اقتوبە قالاسىنىڭ پوليتسيا ءبولىمى قىلمىستىق كودەكستىڭ 109-1-بابىمەن دەرەۋ قىلمىستىق ءىس قوزعاپ, كۇدىكتىنى ۋاقىتشا ۇستاۋ يزولياتورىنا قامادى. ءتيىستى ساراپتامالار تاعايىندالىپ, جان-جاقتى تەرگەۋ امالدارى جۇرگىزىلىپ جاتىر», دەلىنگەن مالىمەتتە.
2024 جىلعى 21 قاراشادا وسى ءىس بويىنشا سوت ۇكىمى شىقتى. ەكى نەمەسە ودان دا كوپ ادامدى جانە كورىنەۋ كامەلەتكە تولماعانداردى ۇرىپ-سوعۋ تۇرىندەگى قىلمىستىق تەرىس قىلىقتى جاساعانى ءۇشىن سوت ۇكىمى بويىنشا ەر ادام 45 تاۋلىككە قاماققا الۋ جازاسىنا كەسىلدى. سونىمەن قاتار, سوتتالۋشىعا ەرەكشە تالاپتار بەلگىلەنىپ, ول الكوگول جانە ەسىرتكى ونىمدەرىن قولدانباۋ, سونداي-اق ىشكى ىستەر ورگاندارىنا ايىنا ءۇش رەت كەلۋگە مىندەتتەلدى.
بۇعان قوسا, سوتتالۋشىنىڭ ءبىر جىل مەرزىمگە جابىرلەنۋشىمەن كەز كەلگەن بايلانىسىنا تىيىم سالىندى. سوت ۇكىمى زاڭدى كۇشىنە ءالى ەنگەن جوق.
