وقۋ اعارتۋ مينيسترلىگىنىڭ بالا قۇقىقتارى جونىندەگى باتىس قازاقستان وبلىسىنداعى ۋاكىلى جانات نۇرماعامبەتوۆامەن بالالار اراسىنداعى ءسۋيتسيدتىڭ الدىن الۋ ماسەلەسى جونىندە سويلەسكەنىمىزدە: ء«وز-وزىنە قول جۇمساۋدىڭ الدىن الۋ, قاۋىپتى سەبەپتەرىن انىقتاۋ, سۋيتسيد جۇمساۋعا ارەكەتتەنگەن ادامداردى باقىلاۋ ماسەلەلەرىن تىكەلەي پسيحيكالىق دەنساۋلىق ورتالىعىنىڭ ماماندارى جۇرگىزەدى. سونداي-اق مۇنداي جاعدايلاردى پوليتسيا تىركەۋگە الادى. ال مەنىڭ سالام – ادام قۇقىقتارىن ساقتاۋ. دەگەنمەن بالا قۇقىعى جونىندەگى وڭىرلىك ۋاكىل بولعاندىقتان, قىزمەتىمنىڭ ءبىر بولىگى رەتىندە وسى ماسەلەمەن دە اينالىسۋعا تۋرا كەلەدى», دەپ باستادى ءسوزىن.
ج.نۇرماعامبەتوۆا وسىعان دەيىن باتىس قازاقستان وبلىسى اۋماعىندا «Amanat» پارتياسى فيليالىنىڭ جانىنان قۇرىلعان كوميسسيامەن بىرلەسىپ, كوشپەلى وتىرىستار وتكەنىن, سول وتىرىستاردىڭ ءبىر تاقىرىبى كامەلەتكە تولماعاندار اراسىندا ءسۋيتسيدتىڭ الدىن الۋعا ارنالعانىن, بۇل ماسەلەنى شەشۋدىڭ ءبىر جولى رەتىندە ءموبيلدى توپ قۇرۋ ۇسىنىلعانىن تىلگە تيەك ەتتى.
ء«بىز ايتىپ وتىرعان ءموبيلدى توپتاردىڭ قۇرامىنا وڭىردەگى اقساقالدار, قۇرمەتتى ازاماتتار, اتا-انالار, مەكتەپ, پسيحولوگتەر, ت.ب. كىرۋى كەرەك. ياعني «اتا-انا – مەكتەپ – مەملەكەت» دەگەن ءوزارا ارەكەتتەسۋ ء«ۇش تاعانى» قۇرىلادى. بالالار ومبۋدسمەنى قىزمەتىنە العاشقى كىرىسكەن كۇنىمنەن باستاپ, بارلىق قۇزىرەتتى ورگاننىڭ ءوزارا بىرلەسىپ ءىس-قيمىل جاساۋ كەرەك ەكەنىن ايتىپ كەلەمىن. سەبەبى بالالاردىڭ قۇقىعىن بۇزۋ, قورقىتۋ, ولاردى سۋيتسيدكە دەيىن جەتكىزۋ سياقتى پروبلەمالاردى ءبىر عانا مەكەمە, ورگان شەشە المايدى. قوعامنىڭ بۇل پروبلەماسى وزدىگىنەن شەشىلەتىندەي قۇر قول قاراپ وتىرماي, وزەكتى ماسەلەلەرىنە ۋاقتىلى جاۋاپ بەرۋگە ءتيىسپىز. ول ءۇشىن مەن ايتقان ء«ۇش تاعان» بىرلەسە جۇمىس جاساۋى قاجەت», دەيدى بالا قۇقىعى جونىندەگى ۋاكىل.
ساراپشى ادام قۇقىقتارىن, اسىرەسە, بالالاردىڭ قۇقىعىن ساقتاۋ ماسەلەسىندە كيبەرقاۋىپسىزدىككە قاتىستى پروبلەمالاردى ۇمىتۋعا بولمايتىنىن ەسكەرتتى. ول جاسوسپىرىمدەردىڭ سۋيتسيدىنە عالامتورداعى ءتۇرلى ويىنداردىڭ سەبەپ بولاتىنىن, ءموبيلدى قوسىمشالارعا قاتىستى اتا-انالاردىڭ اراسىندا الاڭداۋشىلىق بار ەكەنىن ايتا كەلىپ: «ينتەرنەتتەگى ءتۇرلى قاۋىپتى ويىندار جاسوسپىرىمدەردىڭ نازىك پسيحيكاسىنا اسەر ەتىپ, وتە كۇردەلى ءھام قاتال قادامدارعا بارۋعا يتەرمەلەيدى. ءموبيلدى قوسىمشالارداعى ويىندا ءجاسوسپىرىم اتا-انالارمەن جانجالداسۋ, ۇيدەن قاشۋ, بەلگىلى ءبىر دەڭگەيلەردەن وتكەننەن كەيىن QR كودتارى مەن جەدەلحات ارناسىنا سىلتەمەلەر الۋ سەكىلدى تاپسىرمالاردى ورىندايدى. بۇل تاپسىرمالار بارعان سايىن اۋىرلاپ, جەتكىنشەكتى تىكەلەي ءوز-وزىنە قول جۇمساۋعا دەيىن جەتكىزەدى. بىرىنشىدەن, ءبىزدىڭ قۇزىرەتتى ورگاندارىمىز وسىنداي قوسىمشانى جۇكتەۋگە بولاتىن پلاتفورمالاردى بۇعاتتاۋى كەرەك دەپ ويلايمىن. ەكىنشىدەن, اتا-انالار مەن بالالاردىڭ زاڭدى وكىلدەرى ولاردىڭ قانداي ويىن ويناپ جۇرگەنىن نازاردان تىس قالدىرماۋى قاجەت», دەدى.
ماماننىڭ ايتۋىنشا, بالالارىمىزدىڭ بارلىق قاۋىپسىزدىگىنە ءبارىمىز جاۋاپتىمىز. سوندىقتان دا ءسۋيتسيدتىڭ الدىن الۋ ماسەلەسىندە مەملەكەتتىك قۇرىلىمدار, پەداگوگتەر, پسيحولوگتەر جانە اتا-انالار قوعامى بىرلەسە ارەكەت ەتۋ كەرەك. سوندا عانا وڭ ناتيجەگە قول جەتكىزەمىز.
