سەنات سپيكەرى ورىس پراۆوسلاۆيە شىركەۋىنە الەمدىك جانە ءداستۇرلى دىندەر ليدەرلەرىنىڭ سەزىن جان-جاقتى قولداپ, جاھاندىق دىنارالىق ديالوگتى نىعايتۋعا جانە رۋحاني ديپلوماتيانى حالىقارالىق دەڭگەيدە دامىتۋعا جاردەمدەسكەنى ءۇشىن ريزاشىلىعىن ءبىلدىردى.
سونداي-اق م.اشىمباەۆ قازاقستانداعى پراۆوسلاۆيە قاۋىمى ەلدىڭ بىرلىگىن ارتتىرۋعا ۇلكەن ۇلەس قوسىپ وتىرعانىن اتاپ ءوتتى. سۇحبات بارىسىندا پالاتا توراعاسى VIII سەزگە دايىندىق كۇردەلى جاھاندىق سىن-قاتەرلەر جاعدايىندا ءوتىپ جاتقانىنا نازار اۋدارىپ, مۇنداي احۋال رۋحاني كوشباسشىلاردىڭ كۇش-جىگەرىن جۇمىلدىرۋدى تالاپ ەتەتىنىن ايتتى. اتالعان تۇيتكىلدەر كليماتتىڭ وزگەرۋى, بيولوگيالىق قاۋىپ, ەكونوميكالىق توقىراۋ, كەدەيلىكتىڭ ارتۋى سياقتى وزەكتى ماسەلەلەردىڭ سالدارىنان ودان ءارى شيەلەنىسە تۇسەتىنى انىق.
«بۇگىنگى قالىپتاسقان جاعدايدا ءدىني, ساياسي جانە قوعامدىق كوشباسشىلاردىڭ بىرلەسىپ ارەكەت ەتۋىنىڭ ماڭىزى زور. VIII سەزد «دىندەر ديالوگى: بولاشاق جولىنداعى سينەرگيا» تاقىرىبىنا ارنالادى. وسىعان بايلانىستى حالىقارالىق قوعامداستىقتىڭ الدىندا تۇرعان وزەكتى پروبلەمالاردى شەشۋ جولىندا ءدىن كوشباسشىلارىنىڭ كۇش-جىگەرىن بىرىكتىرۋ ماسەلەلەرى تالقىلانادى. سوندىقتان سەزدە سىندارلى جانە مازمۇندى پىكىرتالاستار بولىپ, اتالعان ماسەلەنى شەشۋدى كوزدەيتىن جاڭا يدەيالار ايتىلادى دەپ سەنەمىن. بۇل قادام الەمدىك مادەنيەتتەر مەن دىندەردى ودان ءارى جاقىنداستىرۋعا تىڭ سەرپىن بەرەرى ءسوزسىز», دەدى م.اشىمباەۆ.
ءوز كەزەگىندە ماسكەۋ جانە بۇكىل رەسەي پاتريارحى كيريلل قاسىم-جومارت توقاەۆقا الەمدىك جانە ءداستۇرلى دىندەر ليدەرلەرىنىڭ VIII سەزىنە شاقىرعانى ءۇشىن العىس ءبىلدىردى. سونداي-اق ول ورىس پراۆوسلاۆيە شىركەۋى قازاقستانداعى ءتۇرلى ءدىن وكىلدەرى اراسىنداعى بەيبىتشىلىك پەن ىنتىماقتاستىق يدەيالارىن دارىپتەۋگە ارنالعان باستامالاردى قولدايتىنىن جەتكىزدى.
