اقمولا ءوڭىرىنىڭ كليماتتىق جاعدايى قىسقى ءتۋريزمدى دامىتۋعا قولايلى ايماققا جاتادى. بۋراباي, زەرەندى كۋرورتتىق ايماقتارىنداعى تۋريستىك نىساندار قىس ايلارىندا ەكوتۋريزم, سپورت, ساۋىقتىرۋ باعىتىندا كەلۋشىلەرگە قىزمەت كورسەتەدى. وڭىردە جۇمىس ىستەپ تۇرعان, جاتىن جايى دامىعان, قىسقى تۋريزم قىزمەتتەرىنىڭ سان ءتۇرىن كورسەتەتىن «وقجەتپەس», «الماز», «ششۋچينسكي», «تەرراسسالار پاركى», «سامال», «ديسكاۆەري بۋراباي», «گراند پريكس», «زەرەن», س. سەيفۋللين اتىنداعى شيپاجايلار ەم الۋعا دا, دەمالۋعا دا قولايلى.
«قىس مەزگىلىندە تۋريست تارتۋ ماقساتىندا شيپاجايلاردا جىل سايىن كورسەتىلەتىن قىزمەتتەردىڭ اۋقىمى كەڭەيىپ, ساپاسى ارتىپ كەلەدى. ونىڭ ىشىندە مۇز ايدىندارى قۇيىلىپ, شاڭعى مارشرۋتتارى سالىندى, سونداي-اق شاڭعى, كونكي, سنوۋبورد, قاردا جۇرەتىن كولىكتەردى جالعا بەرۋ ورىندارى اشىلىپ جاتىر», دەيدى ششۋچە-بۋراباي كۋرورتىنىڭ قىزمەتكەرلەرى.
ال اۋەسقوي, كاسىپقوي شاڭعىشىلارعا «ەلىكتى پارك», «نۇرتاۋ», «اق جەلكەن» تاۋ شاڭعى كۋرورتى تاپتىرماس ورىن ەكەن. ەكسترەمالدى اۋەسقويلارعا «Rixos Borovoe» قوناقۇيىنىڭ اۋماعىندا «ەكستريم پارك» جۇمىس ىستەيدى.
قازىر ىشكى تۋريستەردى قىزىقتىراتىن ورىن – «Burabay Land» ويىن-ساۋىق پاركى. ول قىسقى ويىن-ساۋىقتىڭ بۇكىل ءتۇرىن ۇسىنىپ وتىر. ايتالىق, حاسكي شانا, اتپەن سەرۋەندەۋ, شانامەن سىرعاناۋ, كونكي تەبۋ, كۆادراتسيكل, قاردا جۇرەتىن كولىكتەردى پايدالانۋعا بولادى. ويىن-ساۋىق ساياباعىندا ەرەسەكتەر مەن بالالارعا ارنالعان اتتراكتسيوندار, شامان اۋىلى, فوتوسۋرەتكە ءتۇسۋ ايماعى بار. سونداي-اق كىشكەنتاي قوناقتارعا ارنالعان «اياز اتا رەزيدەنتسياسى» جۇمىس ىستەيدى. وتباسىلىق ويىن-ساۋىق ساياباعىندا جۇرتشىلىق ەرتەگى الەمىنە ەنگەندەي كۇي كەشەدى. كوپتەگەن تۋريست بۇل ساياباققا جىل سايىن كەلىپ تۇرۋدى داستۇرگە اينالدىرعان.
ونداعى مامانداردىڭ ايتۋىنشا, جىل سايىن بالالار ويىن-ساۋىق كەشەنى بازاسىندا 50 مىڭعا دەيىن تۋريسكە قىزمەت كورسەتىلەدى. بۇعان قوسا ششۋچينسك قالاسىنداعى وليمپيادالىق دايارلاۋ ورتالىعىنىڭ اۋماعىندا حالىقارالىق دەڭگەيدەگى جارىستار ءجيى وتكىزىلىپ تۇرادى. قىستا مۇندا كاسىبي شاڭعىشىلار مەن سپورتشىلارعا ارنالىپ 20-دان استام سپورتتىق ءىس-شارا ۇيىمداستىرىلادى.
«اقمولا وبلىسى ەلىمىزدەگى ءتۋريزمدى دامىتۋ درايۆەرلەرىنىڭ بەستىگىنە كىردى. وڭىردە ءتۋريزمدى دامىتۋ اۋماعى جىل سايىن كەڭەيىپ كەلەدى. بۋراباي, زەرەندى كۋرورتتارىنىڭ ورنى ەرەكشە. وڭىرلىك ءتۋريزمنىڭ دامۋ قارقىنىن كوتەرىپ تۇرعان استانا تۇرعىندارى مەن قوناقتارى», دەيدى اقمولا وبلىسى تۋريزم باسقارماسىنىڭ وكىلى ەرنازار قۇتتىعوجين.
ونىڭ ايتۋىنشا, استانا قالاسىنىڭ ماڭىندا دا قىسقى تۋريزم قىزمەتتەرىن ۇسىناتىن بىرقاتار دەمالىس ايماقتارى بار. سونىڭ ىشىندە ارشالى اۋدانىنداعى «بەيبارىس» دەمالىس بازاسىنا, اقكول اۋدانىنداعى «Arka tour» شاڭعى بازاسىنا, «Shar Zhum» دەمالىس ورتالىقتارىنا ساياحاتتايتىنداردىڭ سانى جىلدان-جىلعا ارتىپ كەلەدى.
قالا ماڭىنداعى دەمالىستى ودان ءارى دامىتۋ ماقساتىندا تسەلينوگراد اۋدانىندا «تاۋ پاركى» دەمالىس ايماعىنىڭ قۇرىلىسى (سىرعاناقتار, مۇز ايدىنى, شاڭعى, قاردا جۇرەتىن كولىكتەر, اتپەن ءجۇرۋ) قولعا الىنىپتى. استانا سەكىلدى اينالاسىندا تاۋى جوق جازىق وڭىرگە مۇنداي سىرعاناۋعا ارنالعان ورىندار از ولجا ەمەس.
«ساندىقتاۋ اۋدانىنداعى شاڭعى-روللەر بازاسىندا جىل سايىن سپورت ارداگەرلەرىنىڭ ءداستۇرلى شاڭعى مارافونى وتكىزىلەدى. وڭىردە «Four Seasons» كۇنتىزبەلىك ءىس-شارالار جوسپارىنا سايكەس, تۇراقتى نەگىزدە قىس مەزگىلى مەن ماۋسىمارالىق كەزەڭدە كۋرورتتىق ايماقتاردا سپورتتىق, مادەني ءىس-شارالار ۇيىمداستىرىلادى», دەيدى ە.قۇتتىعوجين.
بىلتىر وبلىس اكىمى بۋرابايعا ءبىر جىلدا 1 ملن شەتەلدىك تۋريست كەلگەنىن ايتقان ەدى.
«جىل سايىن ششۋچينسك-بۋراباي شيپاجاي ايماعىنا الەمنىڭ ءار تۇكپىرىنەن 1 ملن شەتەلدىك تۋريست كەلەدى. جالپى, اقمولا وبلىسىنىڭ تۋريستىك كلاستەرىندە 600-دەن استام كاسىپورىن بار. ولاردا 22 مىڭنان استام تۇرعىن جۇمىس ىستەيدى. 2023 جىلى تۋريستەردى ورنالاستىرۋ باعىتىندا 16,5 ملرد تەڭگەنىڭ قىزمەتى كورسەتىلدى. بۇل 2022 جىلعىدان 29% كوپ. 2024 جىلدىڭ جوسپارىندا 25 ملرد تەڭگەنىڭ 30 جوباسى تۇر. ونىڭ سىرتىندا كۋرورتتىق ايماقتىڭ ينفراقۇرىلىمىن جەتىلدىرۋ جوبالارى دا ىسكە اسادى», دەدى ءوڭىر باسشىسى مارات احمەتجانوۆ.
«بۋراباي دامۋ» جشس ءباسپاسوز قىزمەتى جەلتوقساننىڭ العاشقى ونكۇندىگىندە بۋراباي كۋرورتىندا قىسقى ماۋسىمنىڭ سالتاناتتى جاعدايدا اشىلاتىنىن ءمالىم ەتتى.
«بيىل كۋرورتتىق ايماقتاعى «قازاقستان لاپلاندياسى» جاڭارتىلىپ, ەسىگىن ايقارا اشىپ, قوناقتارىن كەزەكتى مارتە قارسى الۋعا دايىندىق جۇمىستارىن جۇرگىزىپ جاتىر. قىس مەزگىلىندە بۋراباي جۇرتشىلىقتى ساف تازا اۋاسىمەن, كونكي, شاڭعى تەبۋ, ورماندا سەرۋەندەۋ, مۇزدى ويىپ بالىق اۋلاۋ سىندى ماۋسىمدىق قىزىقتارىمەن باۋرايدى. بۋرابايدىڭ قىس مەزگىلىندەگى سۇلۋلىعى تۋرالى ايتۋدىڭ ءوزى ارتىق, ول كەز كەلگەن فوتوتوپتاماعا لايىق», دەيدى كۋرورت قىزمەتكەرلەرى.
كورىكتى ايماقتىڭ تۋريزم الەۋەتىن دامىتۋمەن «بۋراباي دامۋ» جشس اينالىسادى. پرەزيدەنت ءىس باسقارماسىنا قاراستى كومپانيا توعىز جىلدان بەرى ششۋچينسك-بۋراباي كۋرورتتىق ايماعىنداعى ءتۋريزمدى دامىتۋ قىزمەتىن كورسەتىپ كەلەدى. ابىلاي حان الاڭى ساياباعىنداعى مۋلتيمەديالىق ينتەراكتيۆتى كەشەن, ۆيزيت-ورتالىق, «Burabay Land» ويىن-ساۋىق ساياباعى, حايۋاناتتار باعى, مارال فەرماسى سىندى نىسانداردىڭ جۇمىسىن وسى كاسىپورىن باقىلايدى ەكەن.
بىلتىر قىسقى تۋريزمگە قامدانىس بارىسىندا «بۋراباي» ۇلتتىق پاركىندە 470 توننا ءشوپ, 135 مىڭ بۋما جاپىراق دايىندالعان. بيىلعى دايىندىق بۇدان دا جوعارى, قىسقى تۋريزمگە تاس-ءتۇيىن ءازىر ەكەنىن ايتادى پارك قىزمەتكەرلەرى.
