ەلىمىزدىڭ تاەكۆوندوشى-لارى بۇعان دەيىن دە ءىرى جارىستاردا ەل اتىن الەمگە تانىتىپ ءجۇر. الداعى ۋاقىتتا دا ءدال وسى قارقىندا شەبەرلىكتەرىن كورسەتەتىنىنە سەنەدى.
«ەلىمىزدە تاەكۆوندو سپورتى (WT) ەرەسەك سپورتشىلار اراسىندا دا, بالالار اراسىندا دا جاقسى دامىپ كەلەدى. بۇل جولعى چەمپيوناتتىڭ ەرەكشەلىگى, جارىسقا تورەشىلىك ەتۋگە رەسەي, وزبەكستان, تاجىكستان, موڭعوليا وكىلدەرى كەلدى. قىركۇيەك ايىندا استانادا حالىقارالىق فەدەراتسيا ماماندارىمەن بىرلەسكەن سەمينار ءوتتى. جيىندا ەلىمىزدە تورەشىلەرىنىڭ بىلىكتىلىگىن ارتتىرۋ, حالىقارالىق جارىستاردا ولاردىڭ سانىن كوبەيتۋ جونىندە كەلىسسوزدەر جۇرگىزدىك. كەز كەلگەن دەڭگەيدەگى جارىستى ءادىل وتكىزۋ, ءاربىر سپورتشىنىڭ تولىققاندى دايىندىعىنا قاتىستى بارلىق قاجەتتىلىكتى قامتاماسىز ەتۋ – مىندەتىمىز», دەيدى تاەكۆوندو فەدەراتسياسىنىڭ پرەزيدەنتى قۇدرات شاميەۆ.
جارىس «كەرۋگي» فورماتىندا ۇيىمداستىرىلدى. بۇل تاەكۆاندونىڭ باسقا تۇرلەرىنە قاراعاندا ەرەكشە. وندا تەك فيزيكالىق دايىندىق قانا ەمەس, پسيحولوگيالىق توزىمدىلىك تە ماڭىزدى ءرول اتقارادى. سوندىقتان ءار سپورتشى ءوز شەبەرلىگىن بارىنشا كورسەتە الۋعا ءتيىس. جارىستىڭ ماقساتى – ۇلتتىق قۇراما ساپىنا ەرلەر مەن ايەلدەر, جاستار اراسىنان كىل مىقتىنى ىرىكتەۋ.
«تاەكۆوندو سپورتى بۇگىندە مادەنيەتىمىزدىڭ اجىراماس بولىگىنە اينالدى. ەلىمىزدىڭ تاەكۆوندو فەدەراتسياسىنا 20 وڭىرلىك فەدەراتسيا كىرەدى. جىل سايىن ەل كولەمىندە 100-گە جۋىق ايماقتىق, ۇلتتىق, حالىقارالىق دەڭگەيدەگى جارىستار وتەدى. تاەكۆوندومەن ەلىمىزدە 200 مىڭنان اسا ادام اينالىسادى. ولاردىڭ 116 مىڭى – جاس سپورتشىلار. سونداي-اق حالىق سانى 500 مىڭنان اساتىن مەكەندەردە ءتۇرلى تاەكۆوندو سەكتسيالارى جۇمىس ىستەيدى», دەپ اتاپ ءوتتى تاەكۆوندو فەدەراتسياسىنىڭ باس حاتشىسى ايزات قاراشاشەۆ.
جىلدامدىق, سەرپىندىلىك, ەپتىلىك بۇل سپورت تۇرىندە اسا ماڭىزدى. ءوز باعىتىنا ۇقساس جارىستار تۇرلەرىنەن ەرەكشەلىگى – ءار سپورتشىنىڭ كيىمى ەلەكتروندىق داتچيكتەرمەن جابدىقتالادى. سوندىقتان سوققىلار اۆتوماتتى تۇردە ەسەپتەلەدى. بۇل وتە ىڭعايلى جۇيە. ول جەڭىمپازدى وبەكتيۆتى انىقتاۋعا مۇمكىندىك بەرەدى.
قابلان بەيبارىس قاراساي اۋدانىنىڭ تاەكۆوندو سەكتسياسىنا 13 جىل بۇرىن كەلگەن. جاتتىقتىرۋشىلارى بىردەن بالا بويىنداعى جوعارى الەۋەتتى بايقايدى. قاتارلاستارىنان ەڭبەكقورلىعىمەن, قيىندىقتى ەڭسەرۋگە دەگەن ىنتاسىمەن ەرەكشەلەنەدى.
«جاسىم 19-دا, ونىڭ 13 جىلىن تاەكۆوندوعا ارنادىم. بيىل يندونەزيانىڭ تانگەرانگ قالاسىندا وتكەن اشىق ازيا چەمپيوناتىندا G-2 ءتۋرنيرىنىڭ جەڭىمپازى اتاندىم. جىلدار بويى جاتتىعۋدىڭ ناتيجەسىندە ءوزىمنىڭ جەكپە-جەك ءتاسىلىمدى قالىپتاستىردىم. قانداي جاعداي بولسىن مويىماۋدى, قايتا تۇرىپ ارەكەت ەتۋدى ۇيرەتكەن جاتتىقتىرۋشىم جالعاc ورىنباسار ۇلىنا العىسىم شەكسىز. الداعى ۋاقىتتا وليمپيا ويىندارىندا جەڭىسكە جەتسەم دەگەن ارمانىم بار», دەيدى سپورت شەبەرى قابلان بەيبارىس.
ءتۋرنيردىڭ العاشقى جەڭىمپازدارى دا بەلگىلى بولدى. ەرلەر اراسىندا الماتى قالاسىنان تامەرلان تىلەۋلەس, جامبىل وبلىسىنان بەكاسىل ەرگەش, شىعىس قازاقستان وبلىسىنان باتىرحان تولەۋعالي جەڭىس تۇعىرىنا كوتەرىلسە, ايەلدەر اراسىندا الماتىلىق ايدانا قۇمارتاەۆا, استانالىق ايشا ادىلبەكقىزى, تۇركىستاندىق نازىم ماحمۋتوۆا چەمپيون اتاندى. جەكپە-جەك جارىسى جالعاسىپ جاتىر.
الماتى وبلىسى
