فوتولار: gov.kz
دۇنيەجۇزىلىك تۋريستىك ۇيىمنىڭ باس حاتشىسى زۋراب پولوليكاشۆيلي, ءازىربايجان رەسپۋبليكاسىنىڭ مەملەكەتتىك تۋريزم اگەنتتىگىنىڭ توراعاسى فۋاد ناعيەۆ جانە 20-دان استام ەل مەن حالىقارالىق ۇيىمداردىڭ وكىلدەرى قاتىسقان ءىس-شارادا قر تۋريزم جانە سپورت ءمينيسترىنىڭ ورىنباسارى ەرجان ەركىنباەۆ ۇلتتىق پاركتەر مەن قورىقتار قۇرامىندا قورعالاتىن بىرەگەي تابيعي ەكوجۇيەلەرىمىز بار ەكەنىن اتاپ ءوتتى.
«مىندەتىمىز – قورشاعان ورتاعا زيان كەلتىرمەستەن ەكونوميكالىق دامۋدى قامتاماسىز ەتۋ. ءبىز تۋريزم سالاسىندا كومىرقىشقىل كولەمىن ازايتۋعا جانە ەكولوگيالىق جاۋاپكەرشىلىكتى ارتتىرۋعا مۇمكىندىك بەرەتىن «جاسىل ستاندارتتاردى» ەنگىزۋدى جالعاستىرامىز», دەدى ەرجان ەركىنباەۆ.
ۆەدومستۆونىڭ ءباسپاسوز قىزمەتىنىڭ ءمالىم ەتۋىنشە, كەزدەسۋ بارىسىندا تۋريزم سالاسىنداعى كليماتتىق ارەكەتتەردى كۇشەيتۋگە باعىتتالعان باكۋ دەكلاراتسياسىنىڭ نەگىزگى باعىتتارى تالقىلاندى. قازاقستان ءتۋريزمنىڭ كليماتقا اسەرىن ازايتۋعا جانە تۇراقتى تاجىريبەلەردى حالىقارالىق ارەنادا ىلگەرىلەتۋگە باعىتتالعان بارلىق باستامانى قولدايتىنىن ءبىلدىردى.
سونىمەن قاتار ەرجان ەركىنباەۆ قازاقستاننىڭ ەكولوگيالىق تۋريزم سالاسىنداعى جەتىستىكتەرىن, سونىڭ ىشىندە ساتى اۋىلىنىڭ Best Tourism Villages كونكۋرسىندا ۇزدىك شىققانىن جانە ITB Berlin حالىقارالىق كورمەسىندە «گۇلدەنگەن قاۋىمداستىقتار» اتالىمىنداعى جەتىستىگىن اتاپ ءوتتى.
