سالتاناتتى ءراسىمدى اشقان دەپارتامەنت باستىعى پولكوۆنيك الىبەك كايۋپوۆتىڭ بۇيرىعىمەن الاڭعا جاۋىنگەرلىك تۋ كەلتىرىلگەن سوڭ «كۇز-2024» شاقىرىلىمىنىڭ ساربازدارى انت قابىلداۋعا كىرىسكەن. وسىلايشا, ساربازداردىڭ «مەن, قاتارداعى جاۋىنگەر ....» دەپ ساڭقىلداپ شىعىپ جاتقان داۋىستارىنان شەكارانى قورعاۋدىڭ بارلىق اۋىرتپالىعىن, تۋعان ەلىنىڭ تىنىشتىعى ءۇشىن جەلدىڭ وتىندە جۇرۋگە تاس-ءتۇيىن دايىن ەكەنىن انىق بايقاۋعا بولاتىن.
بۇدان ءارى ءراسىمنىڭ نەگىزگى ءبولىمى باستالىپ, دەپارتامەنت باستىعى پولكوۆنيك ءا.كايۋپوۆ, ۇيعىر اۋدانىنىڭ اكىمى ب.ەلەۋسىزوۆا ءسوز سويلەپ, ساربازداردى انت قابىلداۋلارىمەن قۇتتىقتادى. سونداي-اق ساربازدار اتىنان سويلەگەن قاتارداعى جاۋىنگەر دياس تىلەكتەس وزدەرىنە كورسەتىلگەن سەنىمدى اقتاپ, ەل شەبىن كوزدىڭ قاراشىعىنداي كۇزەتۋگە ۋادە بەردى.
تاعى ءبىر ايشىقتى وقيعا, دەپارتامەنت باستىعى پولكوۆنيك ءا.كايۋپوۆ كوپشىلىكتىڭ الدىندا «سروچنيك 2.0» باعدارلاماسىنىڭ گرانتىن جەڭىپ العان «كۇز-2023» شاقىرىلىمىنىڭ قوس ساربازى, قاتارداعى جاۋىنگەرلەر راسۋل ارتىقجانوۆ پەن ەدىل تىلەۋبەككە سەرتيفيكات تاپسىرىپ, وتان الدىنداعى قىزمەتتەرىنە العىس ءبىلدىردى.
قاتارداعى جاۋىنگەر نۇرجان سۋروۆتىڭ اتا-اناسى يسقار اعامىز بەن ەلميرا اپاي بۇگىنگى ءىس-شاراعا قاتىسۋ ءۇشىن جامبىل وبلىسىنىڭ قورداي اۋدانىنا قارايتىن قىزىلساي اۋىلىنان ارنايى ات تەرلەتىپ جەتىپتى.
«اتا-انانىڭ كوڭىلى بالادا عوي. ۇلىمىزدى كورىپ, ماۋقىمىزدى باسۋ ءۇشىن ساعىنىپ جەتكەن جايىمىز بار. كوزىمىزدىڭ قاراشىعى بۇگىن انت قابىلدايىن دەپ جاتىر. بۇل دا – ۇلىمىزدىڭ ەر-ازامات اتانعانى. ءبىز ءۇشىن وسى قۋانىشىن كورۋدەن اسقان باقىت بار ما؟», دەيدى قاتتى تولقىعان ي.سۋروۆ.
ءىس-شارا سوڭى شەكارا باسقارماسىنىڭ ارناۋلى ماقساتتاعى ۇتقىر ءىس-قيمىلدار توبىنىڭ ساحنالىق كورىنىسىنە ۇلاستى. جەلدىڭ وتىندە جۇرۋگە جارالعان سايىپقىراندار شەكارا بۇزۋشىلاردى ۇستاۋدىڭ ءادىس-تاسىلدەرىن شەبەر كورسەتە بىلگەن. بۇل ءۇشىن الاڭدى ناعىز شايقاس دالاسىنا اينالدىرعان شەكاراشىلاردىڭ ءابجىل قيمىلدارى ولاردىڭ جاۋىنگەرلىك دايارلىعى جوعارى دەڭگەيدە ەكەنىن ايعاقتاي ءتۇستى.
«مەن قازاقپىن» ءانى شىرقالدى. پاتريوتتىق رۋحتاعى تاماشا انگە 500 ساربازبەن بىرگە الاڭ شەتىنە جينالعان حالىق تا قوسىلعان. وسىلايشا, قاسقاعىم ساتتە وتە شىققان راسىمنەن كەيىن اتا-انالار ۇلدارىمەن قاۋىشىپ, مارە-سارە بولدى.
الماتى وبلىسى
