عىلىمي-ادىستەمەلىك ورتالىق اباي ۋنيۆەرسيتەتى, «جيدەباي-ءبورىلى» مەملەكەتتىك قورىق-مۋزەيى جانە «ابايتانۋ اكادەمياسى» عىلىمي-زەرتتەۋ ينستيتۋتى اراسىنداعى ىنتىماقتاستىقتى نىعايتۋدى كوزدەيدى. شەتەلدەگى اباي ورتالىقتارىمەن بايلانىسىن كەڭەيتىپ, ۇلى ويشىلدىڭ مۇراسىن جاستار اراسىندا ناسيحاتتاۋدىڭ جاڭا تاسىلدەرىن ەنگىزۋ الاڭىنا اينالادى. حاكىم ءىلىمى مەن ونىڭ «تولىق ادام» تۇجىرىمداماسىن عىلىمي-ادىستەمەلىك تۇرعىدان ناسيحاتتاۋعا, ونىڭ شىعارمالارى ارقىلى وسكەلەڭ ۇرپاقتى تاربيەلەۋگە ەرەكشە كوڭىل بولەدى.
«ورتالىق جاھاندانۋ جاعدايىندا ەرەكشە ماڭىزدى بولىپ تابىلاتىن وقۋ-اعارتۋ, عىلىمي جانە مادەني جۇمىستار ءۇشىن زاماناۋي مۋزەيدىڭ مۇمكىندىكتەرىن ءتيىمدى پايدالانۋعا باعىتتالعان. بۇل مۋزەيگە كەلۋشىلەردىڭ قاتارىن ارتتىرۋدىڭ جاڭا جولدارىن ىزدەۋگە, ولكەتانۋ باعىتىنداعى مادەني ءتۋريزمدى دامىتۋعا, سونداي-اق مۋزەي مەن ۋنيۆەرسيتەت اراسىنداعى عىلىمي-ىنتىماقتاستىق بايلانىستى نىعايتۋعا ىقپال ەتەدى», دەيدى ابايدىڭ «جيدەباي-ءبورىلى» مەملەكەتتىك تاريحي-مادەني جانە ادەبي-مەموريالدىق مۋزەي-قورىعىنىڭ ديرەكتورى ۇلان ساعاديەۆ.
بيىلعى مامىر ايىندا ارنايى باستاما كوتەرىپ, مۋزەيى ءىسىن دامىتۋعا قولداۋ بىلدىرگەن اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى بولات تىلەپ اشىلىپ جاتقان ورتالىقتىڭ ماڭىزدىلىعىنا توقتالدى. ۇلى ويشىلدىڭ مۇراسىن رەسپۋبليكالىق جانە حالىقارالىق دەڭگەيدە كەڭىنەن ناسيحاتتاۋعا باعىتتالعان نەگىزگى باستامالاردى تارقاتتى.
«ەل پرەزيدەنتى قاسىم-جومارت توقاەۆ ۇلى ويشىل, ۇلتتىق رۋحانياتتىڭ تەمىرقازىعى اتانعان اباي قۇنانباي ۇلىنىڭ شىعارماشىلىعىن كەڭىنەن ناسيحاتتاۋعا ەرەكشە كوڭىل بولۋدە. ابايدىڭ «تولىق ادام» ءىلىمى جاستاردى تاربيەلەۋدە ماڭىزدى باعدار بولسا, ونىڭ مۇرالارىن ۇلىقتاۋ جانە ناسيحاتتاۋ جاۋاپكەرشىلىگى اقىن اتىمەن اتالاتىن مادەنيەت, ونەر جانە ءبىلىم بەرۋ مەكەمەلەرىنە جۇكتەلەدى. ۇلى اباي عۇمىر كەشكەن, قىزمەت ەتكەن كيەلى ولكەدە بولىپ, وسىناۋ ابىرويلى ميسسيانى ارقاۋ ەتكەن «جيدەباي-ءبورىلى» مەملەكەتتىك مۋزەي-قورىعىنىڭ بازاسىندا وسىنداي عىلىمي-مادەني ورتالىق اشۋ – ءبىز ءۇشىن ۇلكەن مارتەبە», دەدى رەكتور.
اتالعان عىلىمي-مادەني ورتالىق الداعى ۋاقىتتا مۋزەي سالاسىندا قىزمەت اتقاراتىن عالىمدارمەن تىعىز قارىم-قاتىناستا ابايتانۋ عىلىمىنىڭ اياسىن كەڭەيتۋ ماقساتىندا تانىمدىق دارىستەر وتكىزىپ, ۇلى تۇلعانىڭ مۇراسىن زەرتتەۋ, ساقتاۋ جانە بولاشاق ۇرپاققا جەتكىزۋ ماقساتىندا جۇمىس ىستەيتىن بولادى.
سەمەي
