پالاتا سپيكەرى ديپلوماتقا ەكى ەلدىڭ ىنتىماقتاستىعىن نىعايتۋعا جانە استانا مەن توكيو اراسىنداعى ساياسي-ەكونوميكالىق بايلانىستى ارتتىرۋعا قوسقان ۇلەسى ءۇشىن العىس ءبىلدىردى. سۇحبات كەزىندە ەكولوگيا, ەنەرگەتيكا, اۋىل شارۋاشىلىعى, عىلىم, جوعارى ءبىلىم جانە ادىلەت سالاسىنداعى ءوزارا تىعىز قارىم-قاتىناس ورناعانى ءسوز بولدى.
سونىمەن قاتار م.اشىمباەۆ جاپونيا قازاقستاننىڭ ازيا-تىنىق مۇحيتى وڭىرىندەگى ماڭىزدى سەرىكتەسى ەكەنىن اتاپ ءوتتى. وسىعان بايلانىستى ول ەكى ەلدىڭ پارلامەنتارالىق قاتىناستارىن ودان ءارى جانداندىرۋ قاجەتتىگىنە نازار اۋداردى.
«ەل پرەزيدەنتى قاسىم-جومارت توقاەۆ قازاقستان مەن جاپونيا اراسىنداعى ىنتىماقتاستىقتى نىعايتۋعا باسا ءمان بەرىپ كەلەدى. بۇگىندە «ورتالىق ازيا+جاپونيا» فورماتى ناتيجەلى جۇمىس ىستەپ كەلە جاتىر. وسى ورايدا ءبىز جاپونيانىڭ ورتالىق ازيا ەلدەرىمەن دوستىق پارلامەنتتىك ليگاسىنىڭ قۇرىلۋىن قولدايمىز. ەلدەرىمىز اراسىنداعى ترانزيتتىك-كولىكتىك, ەنەرگەتيكالىق, سۋ جانە باسقا دا سالالارداعى ىنتىماقتاستىقتى ىلگەرىلەتۋ ۇزاقمەرزىمدى ءوزارا ءتيىمدى سەرىكتەستىككە ىقپال ەتەدى», دەدى م.اشىمباەۆ.
سەنات توراعاسى وسىعان دەيىن قازاقستان مەن جاپونيا اراسىندا ءتۇرلى سالادا, اتاپ ايتقاندا, سۋمەن جابدىقتاۋ جانە مەديتسينالىق ينفراقۇرىلىمدى جاقسارتۋ باعىتىندا ەكىجاقتى ىنتىماقتاستىقتىڭ بىرلەسكەن جوبالارى مەن باعدارلامالارى تابىستى ىسكە اسىرىلعانىن دا ايتتى. بۇل رەتتە جاپونيانىڭ زەرتتەۋ ورتالىقتارىندا قازاقستاندىق عالىمداردىڭ عىلىمي تاعىلىمدامالارى ۇيىمداستىرىلعانىن اتاپ وتكەن ءجون.
ءوز كەزەگىندە ەلشى قازاقستان تاراپىنا بەلسەندى ءوزارا ءىس-قيمىل ءۇشىن العىسىن ءبىلدىرىپ, ەلىمىزدە جۇرگىزىلىپ جاتقان قوعامدىق-ساياسي وزگەرىستەردى جوعارى باعالادى. سونداي-اق ول قازاقستان مەن جاپونيا اراسىنداعى ىنتىماقتاستىقتى ودان ءارى نىعايتۋعا مۇددەلى ەكەنىن ءبىلدىردى.
