سۋرەت: ءماجىلىستىڭ ءباسپاسوز قىزمەتى
وتىرىستى اشقان سەرىك ەگىزباەۆ وتكەن اپتادا اۋىل شارۋاشىلىعى قىزمەتكەرلەرىنىڭ ءبىرىنشى فورۋمىندا پرەزيدەنت قاسىم-جومارت توقاەۆ قازىرگى جاھاندىق جانە ىشكى سىن-قاتەرلەر تۇرعىسىنان سالانى دامىتۋ جانە ونىڭ باسەكەگە قابىلەتتىلىگىن ارتتىرۋ بويىنشا اۋقىمدى مىندەتتەر قويعانىن ەسكە سالدى. سونداي-اق دەپۋتات اگروونەركاسىپ كەشەنىنىڭ ماسەلەلەرى فەرمەرلەرمەن تۇراقتى تۇردە كوميتەت وتىرىسىندا تالقىلانىپ, 13 قاراشادا وتكەن جالپى وتىرىستا ۇكىمەتكە ءتيىستى دەپۋتاتتىق ساۋال جولدانعانىن ايتتى. وندا شۇعىل شەشىمدى قاجەت ەتەتىن بىرقاتار ماسەلە قامتىلعان.
اۋىل شارۋاشىلىعى ءمينيسترى ايداربەك ساپاروۆ ءوز ءسوزىن تاقىرىپ اياسىنداعى ساۋالدارعا جاۋاپ بەرۋدەن باستادى. ول وتكەن جۇماداعى اۋىل شارۋاشىلىعى قىزمەتكەرلەرى فورۋمىندا مەملەكەت باسشىسى «ازىق-ت ۇلىك كەلىسىمشارت كورپوراتسياسى» ارقىلى نارىقتاعى باعانى تۇراقتاندىرۋ ءۇشىن فەرمەرلەردەن استىق ساتىپ الۋدى ۇيىمداستىرۋدى تاپسىرعانىن ايتتى.
– وسى تاپسىرمانى ورىنداۋ ماقساتىمەن بۇگىن ازىق-ت ۇلىك كورپوراتسياسى ساتىپ الۋ باعاسىن جاريالايدى. ۇكىمەت رەزەرۆىنەن 10 ملرد تەڭگە ءبولىنىپ, العاشقى 155 مىڭ توننا استىقتى ساتىپ الۋ جوسپارلانىپ وتىر. سونىمەن قاتار كورپوراتسيا استىق باعاسىنىڭ كۇرت تومەندەۋىنە جول بەرمەۋ ءۇشىن فەرمەرلەردى ءىرى كەلىسىمشارتتار جاساۋعا جۇمىلدىرىپ جاتىر. قازىرگى تاڭدا كونسوليداتسيا ناتيجەسىندە 20 ملن دوللارعا بەس ەكسپورتتىق كەلىسىمشارت جاسالدى, – دەدى مينيستر.
كوكتەمگى ەگىس جانە ەگىن جيناۋ جۇمىستارىنا بەرىلگەن نەسيەنىڭ مەرزىمىن ۇزارتۋ ماسەلەسىنە قاتىستى مينيستر بۇگىنگى تاڭدا شارۋالاردان 5,1 ملرد تەڭگەدەن اسا نەسيەگە 119 ءوتىنىش كەلىپ تۇسكەنىن ايتتى. بۇل رەتتە ءار جاعداي جەكە-جەكە قارالادى, جاپپاي ۇزارتۋ قاراستىرىلماعان.
سونىمەن قاتار ا.ساپاروۆ سۋبسيديالار بويىنشا قارىزداردى وتەۋ بەلگىلەنگەن كەستەگە سايكەس جۇرگىزىلەتىنىن اتاپ ءوتتى. اكىمدىكتەردىڭ دەرەگىنە سۇيەنسەك, قوسىمشا سۋبسيديا قاجەتتىلىگى 256 ملرد تەڭگەنى قۇرايدى. الايدا «كۇتۋ تىزىمىندە» جالپى سوماسى 194 ملرد تەڭگە بولاتىن ماقۇلدانعان ءوتىنىم تۇر. ونىڭ ىشىندە 56 ملرد تەڭگەسى – وسىمدىك شارۋاشىلىعىنا, 20 ملرد تەڭگەسى – مال شارۋاشىلىعىنا, 118 ملرد تەڭگەسى قارجى قۇرالدارىنا باعىتتالعان.
– سۋبسيديا – وتە ماڭىزدى ءارى اۋقىمدى ماسەلە. سۋبسيديالار زاماناۋي تەحنولوگيالاردى, تىڭايتقىشتاردى, گەربيتسيدتەردى قولداناتىن, تەحنيكا ساتىپ الاتىن الدىڭعى قاتارلى شارۋاشىلىقتارعا بەرىلۋى كەرەك. بىراق جىلدار بويى مۇنداي شارۋاشىلىقتار سۋبسيديا الا الماسا, تاۋى شاعىلادى. سوندىقتان وسى ماسەلەنى شەشىپ, سۋبسيديا بويىنشا قارىزدى تولىق وتەۋ ماڭىزدى دەپ ەسەپتەيمىن, – دەدى ءماجىلىس دەپۋتاتى ەركەبۇلان مامبەتوۆ.
دەپۋتاتتار ءوز تاراپىنان باسقا دا ۇسىنىستار ايتىپ, جاۋاپتى مەملەكەتتىك ورگاندارعا ناقتى سۇراقتار قويدى. اتاپ ايتقاندا, استىقتى ساقتاۋدى تسيفرلاندىرۋ, تاسىمالداۋ شىعىندارىن سۋبسيديالاۋ, ايماقتىق لوگيستيكالىق حابتار قۇرۋ, قانت قىزىلشاسىن وتكىزۋ, كۇنباعىستى ەكسپورتتاۋ جانە باسقا دا ماسەلەلەر كوتەرىلدى.
جيىن سوڭىندا سەرىك ەگىزباەۆ كەڭەيتىلگەن وتىرىستا فەرمەرلەردەن كەلىپ تۇسكەن ماسەلەلەر بويىنشا ۇسىنىمدار ۇكىمەتكە جەتكىزىلەتىنىن اتاپ ءوتتى.
– ۇكىمەت وتىرىسىنىڭ قورىتىندىسىن كۇتەمىز. بۇگىنگى تالقىلاۋدىڭ نەگىزگى تاقىرىبى استىق بولعانىمەن, دەپۋتاتتار كوتەرگەن بارلىق ماسەلە – قانت قىزىلشاسى, كۇنباعىس, كۇرىشكە قاتىستى سۇراقتار ۇكىمەتتىڭ شەشىمىندە ەسكەرىلسە ەكەن دەيمىز, – دەپ تۇيىندەدى كوميتەت توراعاسى.
