پرەزيدەنت قاسىم-جومارت توقاەۆتىڭ فرانتسياعا, ەممانۋەل ماكروننىڭ قازاقستانعا جاساعان مەملەكەتتىك ساپارى اياسىندا ستراتەگيالىق ماسەلەلەرمەن قاتار, مادەني بايلانىستاردى دامىتۋدىڭ ماڭىزى اتاپ وتىلگەنى بەلگىلى. وسى كەلىسىمدەرگە وراي استانا مەن الماتى قالالارىندا فرانتسۋز مەكتەپتەرىن اشۋ تۋرالى ۇكىمەتارالىق كەلىسىم جاسالعان بولاتىن.
ۇكىمەتارالىق كەلىسىمدى ىسكە اسىرۋ ماقساتىندا «EPG» قورى مەن شەتەلدەگى فرانتسۋز ءبىلىم بەرۋ جۇيەسىن دامىتۋ «AEFE» اگەنتتىگى الماتىدا مەكتەپ سالۋ جوباسىن ىسكە اسىرۋ جونىندەگى كەلىسىمگە قول قويدى.
الماتىدا اشىلاتىن مەكتەپتىڭ حالىقارالىق ۇلگىدەگى اتتەستات, تەحنيكالىق پاندەر بويىنشا جوعارى ساپالى ءبىلىم بەرۋ, فرانتسۋز, اعىلشىن, قازاق, ورىس تىلدەرىندە وقىتۋ, بالالاردى ءۇش جاستان باستاپ قابىلداۋ, شەتەلدىك, ونىڭ ىشىندە فرانتسۋز جوعارى وقۋ ورىندارىنا ءتۇسۋ مۇمكىندىگىن قاراستىراتىن بىرقاتار ارتىقشىلىعى بار.
«EPG Education» قورى قاداعالاۋ كەڭەسىنىڭ توراعاسى بالتابەك مۇقاشەۆتىڭ ايتۋىنشا, جوبا ءبىزدىڭ ەل بالالارىنا حالىقارالىق ءبىلىم الەمىنە جول اشادى. الماتىداعى مەكتەپتىڭ قۇرىلىسى AEFE – فرانتسيانىڭ شەتەلدەگى فرانتسۋز ءبىلىمىن دامىتۋ مەن قولداۋعا جاۋاپتى مەملەكەتتىك ۇيىمىنىڭ باقىلاۋىمەن جانە قاتىسۋىمەن جۇزەگە اسادى. بۇل اگەنتتىك فرانتسيانىڭ ەۋروپا جانە سىرتقى ىستەر مينيسترلىگىنىڭ قاراماعىندا, الەمنىڭ 139 ەلىندەگى 580 مەكتەپتى قامتيتىن فرانتسۋز وقۋ ورىندارى جەلىسىن باسقارادى. وندا 392 مىڭنان استام وقۋشى ءبىلىم الىپ جاتىر. AEFE فرانتسيا ءبىلىم مينيسترلىگىنىڭ تالاپتارىنا ساي جوعارى ءبىلىم ستاندارتتارىن قامتاماسىز ەتۋمەن قاتار مۇعالىمدەردىڭ بىلىكتىلىگىن ارتتىرۋعا ەرەكشە ءمان بەرەتىن بولادى.
قازىرگى تاڭدا «EPG» ادامي كاپيتالدى دامىتۋ قورى الماتى قالاسىندا «Prometheus School» جانە «Fiztech» باعىتىنداعى مەكتەپتەردى باسقارىپ وتىر.
الماتى
