ايتا كەتسەك, 1998 جىلى قۇرىلعان «ەۋرازيا» كينوفەستيۆالى – قازاقستانداعى ەڭ ءىرى كينوفورۋم جانە حالىقارالىق كينوپروديۋسەرلەر قاۋىمداستىقتارى فەدەراتسياسى (FIAPF) اككرەديتتەگەن ورتالىق ازياداعى بىردەن-ءبىر كينوفەستيۆال.
فەستيۆالدىڭ تۇراقتى قۇرىلتايشىسى ءارى ۇيىمداستىرۋشىسى - قر مادەنيەت جانە اقپارات مينيسترلىگى.
كينوفەستيۆالدى ۇيىمداستىرۋ جۇمىسى شاكەن ايمانوۆ اتىنداعى «قازاقفيلم» ۇلتتىق كينوستۋدياسىنا تاپسىرىلعان. ايتا كەتەيىك, بيىل كينوستۋدياعا 90 جىل, شاكەن ايمانوۆتىڭ تۋعانىنا 110 جىل جانە «قازاقفيلم» كينوستۋدياسىنا ونىڭ ەسىمى بەرىلگەنىنە 40 جىل تولىپ وتىر.
«ەۋرازيا» كينوفەستيۆالى جىل سايىنعى ءداستۇر بويىنشا الەمدىك جانە وتاندىق كينونىڭ وزەكتى ترەندتەرىن كورسەتەتىن جارقىن ءارى ماڭىزدى تۋىندىلاردى جينايدى.
بۇگىندە «ەۋرازيا» كينوفەستيۆالى ورتالىق ازيا وڭىرىندەگى ەڭ ماڭىزدى مادەني ءىس-شارالاردىڭ بىرىنە اينالعان. 1998 جىلى فەستيۆال قۇرىلعان ساتتەن باستاپ وتاندىق كينەماتوگرافيستەردىڭ تۇتاس بۋىنى قالىپتاسقان. ولاردى «ەۋرازيا ۇرپاعى» دەپ اتاۋعا بولادى.
ۇيىمداستىرۋشىلاردىڭ ايتۋىنشا, بيىل كينوفەستيۆال اياسىندا حالىقارالىق بايقاۋ وتەدى, وعان ەۋروپا مەن ازيا ەلدەرىنىڭ تولىقمەتراجدى فيلمدەرى, سونداي-اق ورتالىق ازيا مەن تۇركى الەمى ەلدەرىنىڭ فيلمدەرى ۇسىنىلادى.
كينوفەستيۆالدىڭ سالتاناتتى اشىلۋ ءراسىمى 24 قاراشادا Almaty Theatre-دە وتەدى.
