حالىقارالىق كونفەرەنتسيانىڭ ماقساتى – عىلىم, ءبىلىم, مەديتسينا, بيوتەحنولوگيا, حيميالىق تەحنولوگيا, قۇرىلىس, قۇرىلىس ماتەريالدارى, اگروونەركاسىپتىك كەشەن, تاماق ونەركاسىبى, توقىما ونەركاسىبى تەحنولوگيالارى, مەحانيكا, ەكولوگيا, تابيعي رەسۋرستاردى راتسيونالدى قولدانۋ, جاڭارتىلاتىن ەنەرگيا كوزدەرىن, ەنەرگيا ۇنەمدەيتىن تەحنولوگيالار جانە IT تەحنولوياسىن پايدالانۋداعى زەرتتەۋلەر ناتيجەسىن تالقىلاۋ.
جيىن بارىسىندا «قازفوسفات» جشس, «قازازوت» جشس, «دامۋ» كاسىپكەرلىكتى دامىتۋ قورى» اق, «قازاتومونەركاسىپ» ۇاك» اق, ەۋروپالىق كوميسسيا, پۋترا مالايزيا ۋنيۆەرسيتەتى, شەنيان حيميا-تەحنولوگيالىق ۋنيۆەرسيتەتى, ي.كاريموۆ اتىنداعى تاشكەنت مەملەكەتتىك تەحنيكالىق ۋنيۆەرسيتەتى, ۆۋلۆەرحەمپتون ۋنيۆەرسيتەتى, ەگەي ۋنيۆەرسيتەتى, يۆانوۆو مەملەكەتتىك پوليتەحنيكالىق ۋنيۆەرسيتەتى, بەلارۋس مەملەكەتتىك تەحنولوگيالىق ۋنيۆەرسيتەتى, بەلارۋس ۇلتتىق تەحنيكالىق ۋنيۆەرسيتەتى, «ماسكەۋ ەنەرگەتيكا ينستيتۋتى» ۇلتتىق زەرتتەۋ ۋنيۆەرسيتەتى, د.ي. مەندەلەەۆ اتىنداعى رەسەيدىڭ حيميالىق-تەحنولوگيالىق ۋنيۆەرسيتەتى مەن سانكت-پەتەربۋرگ مەملەكەتتىك تەحنولوگيالىق ينستيتۋتىنىڭ (تەحنيكالىق ۋنيۆەرسيتەت) وكىلدەرى بايانداما جاساپ, زامان تالابىنا ساي ماماندار وقىتۋ مەن جاڭا تەحنولوگيالار جاساۋداعى تەحنيكالىق جوعارى وقۋ ورىندارىنىڭ ماڭىزى مەن ءرولى تۋرالى سالماقتى ءسوز سويلەدى.
ماسەلەن, پۋترا مالايزيا ۋنيۆەرسيتەتىنىڭ عالىمى مۋحامماد مۋح ناسير اۋىل شارۋاشىلىعى سالاسىنداعى يننوۆاتسيالىق تەحنولوگيالاردى پايدالانۋدىڭ ارتىقشىلىعى تۋرالى باياندادى.
«مالايزيادا 690 مىڭ گەكتار كۇرىش القابى بار. ولاردى سۋارۋ ءۇشىن مول سۋ كەرەك. سوندىقتان بۇل جەردە سۋ ۇنەمدەۋ تەحنولوگياسىن قولدانۋ وتە ماڭىزدى. ال ونى ءبىز گيدرولوگيالىق مودەلدەۋ ارقىلى ىسكە اسىرىپ جاتىرمىز. مۇندا جەراستى سۋلارى, جاۋىن-شاشىن مولشەرى, وزەن-كولدەردىڭ سۋ تولىمدىلىعى ءبارى-ءبارى ەسكەرىلەدى», دەدى ول.
جالپى, پۋترا مالايزيا ۋنيۆەرسيتەتى وڭتۇستىك-شىعىس ازيادا ورنالاسقان بۇل ەلدە ەڭ ۇزدىك العاشقى 5 جوعارى وقۋ ورىندارىنىڭ قاتارىنا كىرسە, دۇنيەجۇزىلىك ۋنيۆەرسيتەتتەر رەيتينگىندە 158-ورىن الادى.
بۇدان بولەك, يسلام كاريموۆ اتىنداعى تاشكەنت مەملەكەتتىك ۋنيۆەرسيتەتىنىڭ وكىلى گۇلنارا يحتياروۆا اتالعان تەحنيكالىق جوعارى وقۋ ورنىنىڭ مۇمكىندىگى تۋرالى اڭگىمەلەدى. ءبىر عاسىردان استام تاريحى بار ۋنيۆەرسيتەتتە گەولوگيا, باعدارلامالاۋ, تسيفرلاندىرۋ, جاساندى ينتەللەكەت, بالامالى قۋات كوزدەرى سىندى ماماندىقتار بويىنشا ستۋدەنتتەر ءبىلىم الادى. سونىمەن بىرگە جاپونيانىڭ ىرگەلى وقۋ ورىندارىمەن تىعىز بايلانىس ورناتىلعان. سونىڭ ناتيجەسىندە ستۋدەنتتەر اتالعان ۋنيۆەرسيتەتتەن بولەك كۇنشىعىس ەلىندەگى جوعارى وقۋ ورىندارىندا دا ءبىلىم الىپ, تاجىريبە جينايدى. ۋنيۆەرسيتەتتىڭ ەندىگى ماقساتى – الەمدەگى ەڭ وزىق جوعارى ءبىلىمدى ماماندار دايارلايتىن وقۋ وردالارىنىڭ قاتارىنا ەنۋ.
سونداي-اق كونفەرەنتسيا اياسىندا مۇحتار اۋەزوۆ اتىنداعى وڭتۇستىك قازاقستان, يسلام كاريموۆ اتىنداعى تاشكەنت مەملەكەتتىك جانە دميتري مەندەلەەۆ اتىنداعى رەسەي حيميا-تەحنولوگيالىق ۋنيۆەرسيتەتتەرى اراسىندا حيميالىق تەحنولوگيا بويىنشا اكادەميالىق حاب قۇرۋ تۋرالى مەموراندۋمعا قول قويىلدى.
شىمكەنت
