فوتو:قازاقستان ۇلتتىق بانكى
ۇلتتىق بانك باسشىسى تيمۋر سۇلەيمەنوۆ قارجىگەرلەردىڭ XII سەزى بارىسىندا «تسيفرلىق ينۆەستيتسيالىق مونەتا» جوباسى اياسىندا مونەتالاردى ۇلتتىق بانككە مونەتالاردى ساتىپ الۋعا, ۇلتتىق بانككە كەرى ساتۋعا, سىيلاۋعا, سونداي-اق ولاردىڭ جەتكىلىكتى سانى جيناقتالعان كەزدە ۇلتتىق بانكتىڭ اۋماقتىق فيليالدارىندا زاتتاي التىن ينۆەستيتسيالىق مونەتاعا ايىرباستاۋعا بولاتىنىن حابارلادى.
«مۇنداي مونەتالاردى العاش رەت 2025 جىلى ساتىپ الۋعا بولادى. ءبىز, ءبىر جاعىنان, توكەنيزاتسيا ترەندىن ۇستانامىز, بىراق سونىمەن بىرگە ەلىمىزدىڭ بارلىق ينفراقۇرىلىمىن بەلسەندى پايدالاناتىنىمىزدى كورسەتەمىز. ءبىزدىڭ نەگىزگى بيرجامىز بولاتىن KASE جانە جاڭا قۇرالداردى دامىتۋ تۇرعىسىنان ۇلكەن ستاۆكا جاسايتىن AIX سياقتى», دەدى ول.
ۇلتتىق بانكتىڭ مالىمەتىنشە, التىن ينۆەستيتسيالىق مونەتالاردى كەز كەلگەن ۋاقىتتا جانە الەمنىڭ كەز كەلگەن نۇكتەسىنەن online ساتىپ الۋعا جانە ساتۋعا بولادى. تسيفرلىق بالاماداعى ينۆەستيتسيالىق مونەتانىڭ قۇنى LBMA (لوندون باعالى مەتالدار نارىعىنا قاتىسۋشىلاردىڭ قاۋىمداستىعى) بەلگىلەگەن التىننىڭ سالماعى مەن باعاسىنا ساي جانە ۇلتتىق بانك بەلگىلەگەن اقش دوللارىنىڭ تەڭگەگە شاققانداعى ايىرباس باعامى نەگىزىندە تەڭگەمەن ەسەپتەلەتىن بولادى.
ايتا كەتەيىك, مونەتالار Astana International Exchange (AIX) بيرجاسىنىڭ «TABYS» ءموبيلدى قوسىمشاسى ارقىلى ساتىلادى.
«وسى جوبا ءۇشىن ارنايى جاڭا ÚKI ينۆەستيتسيالىق مونەتاسىنىڭ ەكسكليۋزيۆتى ديزاينى ازىرلەنىپ وتىر. ونىڭ سالماعى 31,1 گرامم, نومينالى 100 تەڭگە, التىن سىناماسى – اu 999,9. مونەتا «كوشپەلىلەردىڭ عيبادات جانۋارلارى – توتەمدەرى» سەرياسىنداعى كوللەكتسيالىق مونەتالار ستيلىندە جاسالعان. ÚKI ينۆەستيتسيالىق مونەتاسىن تەك «TABYS» ءموبيلدى قوسىمشاسى ارقىلى ساتىپ الۋعا بولادى. مونەتالار بليستەردە شىعارىلادى», دەلىنگەن حابارلامادا.
