وبلىس اكىمدىگى ءباسپاسوز قىزمەتىنىڭ مالىمەتىنشە, لەپسى اۋىلىنان بالقاش كولىنىڭ جاعالاۋىنا دەيىنگى 27 شاقىرىم اۆتوكولىك جولىنىڭ قايتا جاڭعىرتۋ جۇمىسى اياقتالىپ, قولدانىسقا بەرىلگەن. مولالى – لەپسى – اقتوعاي ۋچاسكەسىندەگى 105 شاقىرىمدا قۇرىلىس ءجۇرىپ جاتىر.
«قازىر قۇرىلىسقا 90-عا جۋىق ارنايى تەحنيكا جۇمىلدىرىلعان. اسفالت جامىلعىسىن سالۋ, جەر توسەمى, اسفالت دايىنداۋ, ۇنتاقتاۋ, ماتەريالداردى وڭدەۋ, تاسىمالداۋ جۇمىستارىندا 130-عا جۋىق ادام جۇمىس ىستەپ جاتىر. جوبا ىسكە اسىرىلعانعا دەيىن وسى جولمەن قاتىنايتىن جول كولىكتەرىنىڭ اعىنى تاۋلىگىنە 3 مىڭ اۆتوكولىك بولسا, قايتا جاڭعىرتۋدان كەيىن بۇل كورسەتكىش 6 مىڭعا جوعارىلاپ وتىر», دەيدى وبلىستىق جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى ايدوس دوسجانوۆ.
قۇرىلىس قۇنىنىڭ قىمباتتاۋىنا بايلانىستى وبلىستىق بيۋدجەتتەن قوسىمشا 15,9 ملرد تەڭگە قارجى بولىنگەن. بالقاش كولىنە دەيىنگى جول قۇرىلىسى جوباسىنىڭ جالپى قۇنى – 30,4 ملرد تەڭگە.
وبلىس اۋماعىندا رەسپۋبليكالىق ماڭىزى بار ءىرى جوبالار دا ىسكە اسىپ جاتىر. ءۇشارال – دوستىق جولى جانە تالدىقورعان – ءۇشارال اۆتوجولىن جوندەۋ 95%-عا ورىندالدى. نىسان 2024 جىلدىڭ سوڭىندا اياقتالادى. سونداي-اق سارىوزەك-كوكتال, جاركەنت-قورعاس اۆتوجولدارى جوندەلىپ جاتىر.
«قازاۆتوجول» ۇك» اق جەتىسۋ وبلىستىق فيليالى ديرەكتورىنىڭ ورىنباسارى جاسۇلان قالتاەۆتىڭ ايتۋىنشا, وتكەن جىلى سارىوزەك – كوكتال جانە كوكتال – جاركەنت اۆتوجولىنىڭ جالپى ۇزىندىعى 81 شاقىرىمدىق ۋچاسكەلەرىنە كۇردەلى جانە ورتاشا جوندەۋ جۇرگىزىلگەن.
«جەتىسۋ وبلىسىندا جول قۇرىلىسىنىڭ اۋقىمى ارتىپ كەلەدى. بۇل ينفراقۇرىلىمدىق جۇمىستار ءوڭىردىڭ ترانزيتتىك-لوگيستيكالىق الەۋەتىن ودان ءارى دامىتادى. جۋىق ارادا سارىوزەك پەن كوكتال, سونداي-اق ايدارلى مەن كوكتال ەلدى مەكەندەرى اراسىنداعى جولدىڭ بىرنەشە ۋچاسكەسىندە كۇردەلى جانە ورتاشا جوندەۋدى جالعاستىرۋ جوسپارلانىپ وتىر», دەيدى ج.قالتاەۆ.
ايماقتا 54 ەلدى مەكەننىڭ ىشكى جولى جوندەلىپ جاتىر. «اۋىل – ەل بەسىگى» باعدارلاماسى اياسىندا جالپى ۇزىندىعى 2 شاقىرىم بولاتىن 5 كوشەدە قىزۋ ارەكەت بايقالادى.
جالپى, جەتىسۋ وبلىسىندا بيىل جەرگىلىكتى ماڭىزى بار اۆتوموبيل جولدارىن دامىتۋ ءۇشىن 38,0 ملرد تەڭگە بولىنگەن, سونىڭ ىشىندە وبلىستىق ماڭىزى بار جولداردى جوندەۋگە – 24,0 ملرد تەڭگە, اۋداندىق جانە قالالىق ىشكى جولداردى جوندەۋگە 14,0 ملرد تەڭگە قاراستىرىلدى. بولىنگەن قاراجات ەسەبىنەن جەرگىلىكتى ماڭىزى بار جولداردىڭ 335,7 شاقىرىمىنا قايتا جاڭعىرتۋ, كۇردەلى جانە ورتاشا جوندەۋ جۇمىستارى جۇرگىزىلىپ جاتىر.
جەتىسۋ وبلىسى
