تۋرنيرگە ەلىمىزدىڭ, بىرىككەن اراب امىرلىكتەرىنىڭ سپورتشىلارى تىزگىندەگەن, قوستاناي, اداي تۇقىمدارىنان ىرىكتەلگەن 16 جىلقى قاتىستى. شاباندوزدار ءبىر كۇندە 100 شاقىرىم قاشىقتىقتى ءجۇرىپ ءوتىپ, توزىمدىلىكتى, شەبەرلىكتى, اقىل-وي كۇشىن كورسەتتى.
حالىقارالىق ات سپورتى فەدەراتسياسى جىلقىنىڭ توزىمدىلىگى جونىندەگى تەحنيكالىق كوميتەتىنىڭ باسشىسى مۇحاممەد ءالي امەر ومار ءال-ءحادراميدىڭ ايتۋىنشا, جارىستىڭ بۇل ءتۇرى قازاقتىڭ ءداستۇرلى ات جارىسىنا وتە ۇقساس. قازاق جىلقىلارىنىڭ دايىندىعى وتە جاقسى, مۇندا عاسىرلار بويى جىلقى شارۋاشىلىعى دامىعان. «قازاقستاننىڭ ات سپورتىنان حالىقارالىق جارىستاردى وتكىزۋ الەۋەتى جوعارى, ويتكەنى گەوگرافيالىق تۇرعىدا رەسەي, قىتاي, وزبەكستان, قىرعىزستان, تاعى باسقا ەلدەر اراسىندا وتە ءتيىمدى ورنالاسقان. بولاشاقتا وسى ءوڭىر ات سپورتىنىڭ دامۋ ورتالىعىنا اينالۋى مۇمكىن», دەدى ءال-حادرامي.
ءىس-شارانىڭ باستى ماقساتى – ەلىمىزدە ات سپورتىن ناسيحاتتاۋ, دامىتۋ, قازاقى جىلقى تۇقىمدارىنىڭ, ياعني قوستاناي, اداي جىلقىلارىنىڭ الەۋەتىن ارتتىرۋ. سونداي-اق ەلىمىزدىڭ تورەشىلەر القاسىنىڭ تورەشىلىك ساپاسىن, كاسىبي داعدىلارىن جەتىلدىرۋ, تالانتتى شاباندوزدار مەن جىلقىلاردى انىقتاۋ, ولاردى حالىقارالىق تۋرنيرلەرگە قاتىستىرۋ جۇمىستارىن جانداندىرۋ.
«بۇگىندە اداي, قوستاناي تۇقىمدارىنىڭ جىلقىلارى جويىلىپ كەتۋ الدىندا. سونىمەن قاتار ەلىمىز ات سپورتىنان حالىقارالىق تۋرنيرلەرگە ۇسىنىلا بەرمەيدى. وسى تۇرعىدا ۇيىمداستىرۋشىلاردىڭ نەگىزگى كوزدەگەنى بولاشاقتا وتاندىق جىلقىلارعا الەمدىك دودالارعا جول اشۋ ءۇشىن حالىقارالىق ات سپورتى فەدەراتسياسى مەن تورەشىلەر كوميسسيالارىنىڭ تورەشىلەرىنە جەرگىلىكتى جىلقى تۇقىمدارىن تانىستىرۋ بولدى. بۇگىنگى 100 شاقىرىمدىق جارىستا اتتار 20, 30 شاقىرىم سايىن دەمالىپ, ولاردىڭ جۇرەك قاعىسىن, جالپى جاعدايىن ۆەتەرينار ماماندار تولىق تەكسەرىستەن وتكىزىپ وتىردى. ءتۋرنيردىڭ باستى شارتى – جارىسقا قاتىساتىن جىلقىنىڭ جاسى التى جىلدان جوعارى بولۋى كەرەك. سونداي-اق شاباندوزدىڭ سالماعى 70 كگ-نان تومەن بولماۋى ماڭىزدى. جارىسقا قاتىسۋشىلار اراسىندا ماجارستان مەن ءباا-دەن كەلگەن شاباندوز قىزدار بار. ات جارىسى حالىقارالىق ات سپورتى فەدەراتسياسىنىڭ ەرەجەلەرىنە ساي وتكىزىلدى. ەرەجە بويىنشا 30 شاقىرىم شاۋىپ كەلگەن جىلقىنىڭ جۇرەك قاعىسى 60-تان كوپ بولماۋى كەرەك. 15 مينۋتتىق ۇزىلىستە جۇرەك قاعىسى وسىدان ارتىق بولسا, ول جىلقى جارىس-تان شىعارىلادى. ويتكەنى اتتىڭ دەنساۋلىعىنا زاقىم كەلەدى. اتتار ساعاتىنا ورتاشا ەسەپپەن 16–17 شاقىرىمدى ءجۇرىپ وتەدى. سوندىقتان بۇل سپورت تۇرىندە الامان بايگەدەگىدەي اتتار قۇلاپ نەمەسە جاراقات الىپ قالمايدى. سوعان قاراپ, جىلقىعا مەيىرىمدى سپورت ءتۇرى دەۋگە بولادى», دەيدى يپپولوگ احات رازاق.
ء«بىز الەمگە اداي, قوستاناي جىلقى تۇقىمىن تانىتىپ, ولاردىڭ الەمدىك تۋرنيرلەرگە قاتىسۋىنا مۇمكىندىك جاساعىمىز كەلەدى. الداعى 2025 جىلى دا ەلىمىزدە جارىستىڭ وسى ءتۇرىن وتكىزۋدى جوسپارلاپ وتىرمىز. وتاندىق سپورتشىلاردى 2026 جىلى قوستاناي, اداي تۇقىمدارىنىڭ جىلقىلارىمەن ساۋد ارابياسىن-دا وتەتىن الەم چەمپيوناتىنا قاتىستىرۋ – باستى ماقساتىمىز», دەيدى جارىستى ۇيىمداستىرۋشى ءارى باس دەمەۋشى, «قوبىلاندى» جىلقى زاۋىتىنىڭ ديرەكتورى شىڭعىس دوسمۇحامبەتوۆ.
جارىستى ۇيىمداستىرۋشىلار – ات سپورتى فەدەراتسياسى, «بايسەركە اگرو» اگروحولدينگى, «قوبىلاندى» جىلقى زاۋىتى. ءىس-شارا ءباا ۆيتسە-پرەزيدەنتى شەيح مانسۋر ال ناحايان مەن ونىڭ «Emirates International Endura» كومانداسىنىڭ قولداۋىمەن ءوتتى. شەتەلدەن كەلگەن ماماندار جارىسقا تورەشىلىك ەتىپ, ەلىمىزدىڭ ۆەتەرينارلارى مەن تورەشىلەرىن ۇيرەتتى.
«بايسەركە اگرو» جشس «ات سپورتى فەدەراتسياسى» رقب-مەن بىرلەسىپ, جىلقىنىڭ دەنساۋلىعىنا, قاۋىپسىزدىگىنە تولىق قامقورلىق جاسايتىن جىلقىنىڭ ءال-اۋقات كودەكسىن بەكىتتى.
سونىمەن 100 شاقىرىمدىق جارىستا تۋرنير جەڭىمپازدارى انىقتالىپ, باعالى سىيلىقتارمەن ماراپاتتالدى. باس جۇلدەنى ماڭعىستاۋ وبلىسىنان قاتىسقان كوكجەبە اتتى تۇلپار, شاباندوزى ومار نۇرسۇلتان يەلەنىپ, Ravon اۆتوكولىگىن تاقىمدادى. 2-ورىندى جەتىسۋ وبلىسىنىڭ جۇيرىگى باقتورى, شاباندوز دارگەربەك حاباي يەلەنسە, 3-ورىنعا ماڭعىستاۋلىق توبىلعى تورى, شاباندوز نۇرسۇلتان قۇماروۆ جايعاستى. اباي وبلىسىنىڭ تۇلپارى گۇلسارى, شاباندوز ۆيكتور جاناليەۆ 4-ورىنعا تۇراقتاسا, 5-ورىن جەتىسۋ وبلىسىنىڭ قاھارمان اتى, شاباندوز داۋلەت بەيىسباەۆقا بۇيىردى.
ماجارستاننان كەلگەن نوبەل اتى, شاباندوز مەحوك ورحيدەيا التىنشى, الماتى وبلىسىنىڭ جۇيرىگى نەاپول, شاباندوز ناتاليا دولگيح جەتىنشى بولىپ مارە سىزىعىن قيدى. بارلىق جۇلدەگەر باس دەمەۋشى «بايسەركە اگرو» حولدينگىنىڭ اقشالاي سىيلىعىنا يە بولدى. جالپى جۇلدە قورى 4 ملن تەڭگەنى قۇرادى.
مامانداردىڭ ايتۋىنشا, بۇل سپورت ءتۇرىن جەتىلدىرۋگە كوپتەگەن ىزدەنىس كەرەك. بۇگىنگى جارىسقا قاتىسقان اتتارعا حالىقارالىق كۋالىك بەرىلىپ, ەكپە سالىنعان. سول تۇرعىدا جارىس جولىنا شىققان اتتار ۇنەمى بابىندا بولۋى ءۇشىن ات سپورتى بازاسى ۇيىمداستىرىلۋى كەرەكتىگى دە وزەكتى ماسەلە.
الماتى وبلىسى
