فوتولار: primeminister.kz
الەۋمەتتىك جوبانىڭ ماقساتى ەلىمىزدىڭ وڭتۇستىك وڭىرلەرىنەن كەلگەن جاستاردى وقىتىپ, كادر جەتىسپەۋشىلىگى بايقالىپ وتىرعان قازاقستاننىڭ سولتۇستىك, ورتالىق, شىعىس ايماقتارىنا جۇمىسقا ورنالاستىرۋعا باعىتتالعان.
وبلىس اكىمدەرىنىڭ ورىنباسارلارى جوبا اياسىندا اتقارىلىپ جاتقان شارالار تۋرالى ايتا كەلە, شەشۋدى قاجەت ەتەتىن ماسەلەلەردى ورتاعا سالدى. ۆيتسە-پرەمەر باعدارلامانى جۇزەگە اسىرۋداعى نەگىزگى ماسەلە جاۋاپتىلاردىڭ ناقتى, ادرەستىك جۇمىسىنىڭ جوقتىعى ەكەنىن اتاپ ءوتتى. جوبادا قامتىلاتىن جاستار انىقتالعانىمەن, ايماقتارداعى جۇمىس بەرۋشىلەرگە ناقتى قانداي ماماندىقتى مەڭگەرگەن كادرلار قاجەت ەكەنى ناقتىلانباعان.
«بۇل ماسەلەنى شەشۋ ءۇشىن عىلىم جانە جوعارى ءبىلىم مينيسترلىگىنىڭ جانىنان رەسپۋبليكالىق جوبالىق كەڭسە جانە كادرلارعا قاجەتتىلىكتى ناقتىلاۋ ءۇشىن جۇمىس بەرۋشىلەرمەن, جۇمىسپەن قامتۋ ورتالىقتارىمەن, ۋنيۆەرسيتەتتەرمەن جانە كوللەدجدەرمەن ءوزارا ءىس-قيمىل جاسايتىن وڭىرلىك كەڭسەلەر قۇرىلدى. وقۋدى بىتىرگەننەن كەيىن مىندەتتى تۇردە جۇمىسقا ورنالاساتىن مامانداردى دايارلاۋ ءۇشىن ناقتى وقۋ ورىندارىن تاڭداۋ ماڭىزدى قادام بولادى», دەپ اتاپ ءوتتى تامارا دۇيسەنوۆا.
رەسپۋبليكالىق جوبالىق كەڭسەگە پارلامەنت دەپۋتاتى مۇرات ابەنوۆ, ال وڭىرلىك وفيستەرگە وبلىس جانە استانا, الماتى, شىمكەنت قالالارى اكىمدەرىنىڭ ورىنباسارلارى جەتەكشىلىك ەتەدى. وڭتۇستىك ايماقتاردا كاسىبي باعدارلاۋ ىسىنە ەرەكشە ءمان بەرىلەتىن بولادى. بۇگىندە سالالىق مينيسترلىكپەن تۇركىستان, جامبىل, الماتى, قىزىلوردا, جەتىسۋ وبلىستارىنىڭ مەكتەپتەرى مەن كوللەدجدەرىنىڭ ءتىزىمى انىقتالدى. باعدارلاما اياسىندا وسى وڭىرلەردىڭ جاستارىن اقمولا, پاۆلودار, قوستاناي, شىعىس قازاقستان, سولتۇستىك قازاقستان, اباي, قاراعاندى, ۇلىتاۋ وڭىرلەرىندە وقىتىپ, جۇمىسپەن قامتۋ قاراستىرىلعان.
