سۋرەت: ru.freepik.com
«ساندىقتاۋ» جشس ديرەكتورى جامۇل مۇسحانوۆ جالدامالى ماۋسىمدىق قىزمەتكەرلەردىڭ الەۋمەتتىك اۋدارىمدارىنا قاتىستى ماسەلەگە نازار اۋداردى. شىنتۋايتىندا, بۇل جالعىز وسى سەرىكتەستىككە ەمەس, كوپتەگەن اۋىل تۇرعىنىنا قاتىسى بار جايت. بۇگىندە جۇمىس بەرۋشىلەر مىندەتتى الەۋمەتتىك مەديتسينالىق ساقتاندىرۋعا قىزمەتكەر ەڭبەكاقىسىنىڭ 3 پايىزىن, جالدامالى قىزمەتكەرلەر ءۇشىن 2 پايىزىن تولەيدى. الايدا اۋىل تۇرعىندارى – نەگىزىنەن اۋىل شارۋاشىلىعىمەن اينالىساتىن ماۋسىمدىق جۇمىسشىلار. ولاردا جىل بويعى تۇراقتى تابىس جوق.
– دالا جۇمىسى كوكتەمگى جانە كۇزگى ماۋسىمدا جۇرگىزىلەتىندىكتەن, جۇمىسشىلار قىسقى ماۋسىمدا جۇمىسسىز قالادى. مىنە, وسى كەزەڭدە ولار ءۇشىن الەۋمەتتىك اۋدارىم جۇرگىزىلمەيدى. سالدارىنان مەديتسينالىق ۇيىمدار قىزمەت كورسەتۋدەن باس تارتىپ جاتادى, – دەپ شاعىمدانادى اگرارشى.
وڭىرلىك پالاتا ديرەكتورى ەرقانات مۇسىلمانبەك: «اتامەكەن» ۇلتتىق كاسىپكەرلەر پالاتاسىنا اۋىل تۇرعىندارىنىڭ الەۋمەتتىك ەسەپتەۋلەرىن سارالاۋعا قاتىستى زاڭناماعا وزگەرىستەر ەنگىزۋ تۋرالى ۇسىنىس جىبەرەمىز», دەدى. «حامزە» شارۋا قوجالىعىنىڭ باسشىسى ەرجان بيەكەنوۆ ەلەۆاتور ماسەلەسىن العا تارتتى.
– ەرەيمەنتاۋ اۋدانىنىڭ ەركىنشىلىك اۋىلىندا ەلەۆاتور جۇمىس ىستەمەيدى, سول سەبەپتى استىق قابىلداۋ جۇرگىزىلمەيدى. ەلەۆاتوردىڭ جاعدايى مۇشكىل, كاسىپورىن يەلەرىنەن كەرى بايلانىس جوق. ەلەۆاتور جۇمىسىن جانداندىرۋعا قاتىستى جەرگىلىكتى كاسىپكەرلەر نيەت ءبىلدىرىپ تە وتىر, الايدا جەرگىلىكتى اتقارۋشى ورگاندار تاراپىنان تۇسىنىستىك پەن قولداۋ بايقالمايدى, – دەدى فەرمەر.
ەلەۆاتورلار تاراپىنان جوسىقسىز قىزمەت كورسەتۋ ماسەلەسىن «كەنەسارى بيداي» جشس ديرەكتورى قۋانىشبەك يبراەۆ جالعاستىردى. ايتۋىنشا, بۋراباي اۋدانىنىڭ اگرارشىلارى ەلەۆاتوردا استىقتى ساقتاۋعا تاپسىرۋ كەزىندە قيىندىقتارعا تاپ بولعان. سەبەبى استىقتىڭ ساپالىق كورسەتكىشتەرىن تومەندەتۋ فاكتىلەرى بار. جەرگىلىكتى جەرلەردە مەملەكەتتىك ستاندارتتار قولدانىلمايدى, سوندىقتان استىق ساپاسى جاساندى تۇردە تومەندەيدى.
فەرمەرلەردى تولعاندىراتىن نەگىزگى ماسەلە – استىقتى ساتۋ. وبلىستا 6,6 ملن توننادان استام رەكوردتىق استىق جينالعانىنا قاراماستان, كوپتەگەن اگرارشى ءونىمىن ساتا الماي وتىر.
– ديقاندار ءمان-جايدى تۇسىنەدى. ازىق-ت ۇلىك كورپوراتسياسىنا ءونىم بەرۋگە دايىن. الايدا قولدانىستاعى تەتىكتەر استىقتى تىكەلەي ساتىپ الۋدى كوزدەمەيدى. سونىمەن قاتار شارۋالاردىڭ نەسيە مىندەتتەمەلەرى بار, – دەدى وڭىرلىك كەڭەس توراعاسى قۋانىش راقىشەۆ.
وبلىس اكىمىنىڭ ورىنباسارى مۇرات بالپان بارلىق ايتىلعان تۇيتكىلدى ماسەلەنى جەرگىلىكتى ۋاكىلەتتى ورگاندار نازارعا الاتىنىن ايتتى. ء«بىزدىڭ تاراپىمىزدان جان-جاقتى قولداۋ كورسەتىلەدى. بىراق اۋىل شارۋاشىلىعى وندىرۋشىلەرى ازىق-ت ۇلىك كورپوراتسياسى الدىنداعى قولدا بار مىندەتتەمەلەردى مەرزىمىندە ورىنداۋعا ءتيىس», دەدى م.بالپان.
كوكشەتاۋ
