ستۋدەنتتەر وقۋ بارىسىندا ۇيرەنگەنىن تاجىريبە جۇزىندە كورسەتىپ, ءوز بەتىنشە جيھاز جاساپ, ماشينا بولشەكتەرىن قۇراستىرىپ, ساۋلەت جانە ديزاينمەن اينالىسا الادى. سونداي-اق ورتالىقتا سالا ماماندارى تاعىلىمدامادان ءوتىپ, بىلىكتىلىگىن شىڭدايدى.
الماتى كوپسالالى كوللەدجىنىڭ ديرەكتورى اسىلحان بەيسەتباەۆ بيزنەس-ينكۋباتور جانە ستراتەگيالىق جوسپارىمەن تانىستىردى. ستۋدەنتتەر ءوز جوبالارىن ازىرلەپ, تالىمگەرلەردەن ساباق الىپ, ينۆەستيتسيا تارتۋعا مۇمكىندىك الاتىنىن اتاپ ءوتتى. ونىڭ ايتۋىنشا, قۇزىرەتتىلىك ورتالىعى بولاشاقتا ستۋدەنتتەردىڭ ءبىلىمىن كۇشەيتۋگە جانە تاجىريبە جيناۋعا, ماماندىق بويىنشا قالالىق, رەسپۋبليكالىق, حالىقارالىق «WorldSkills» چەمپيوناتىنا دايىندىقتان وتۋگە مۇمكىندىك بەرەدى. بۇگىندە كوللەدجدە جوعارى بىلىكتى مامانداردى دايارلاۋعا بارلىق قاجەتتى رەسۋرس بار. ارينە, ءبىلىم بەرۋ ساپاسى ءبىرىنشى كەزەكتە كوللەدج وقىتۋشىلارىنىڭ بىلىكتىلىگىنە بايلانىستى دەسەك, مۇندا ءوز ءىسىن جاقسى كورەتىن جانە كاسىبي دەڭگەيىن ۇنەمى ارتتىرىپ وتىراتىن بىلىكتى وقىتۋشىلار مەن وندىرىستىك وقىتۋ شەبەرلەرى جۇمىس ىستەيدى. 80 جىلدىق تاريحى بار كوللەدجدە تەك كاسىبي دايىندىققا عانا ەمەس, جەكە تۇلعانى دامىتۋ مەن كوشباسشىلىق قاسيەتتەرىن اشۋ ءۇشىن دە بارلىق جاعداي جاسالعان.
قۇزىرەتتىلىك ورتالىعى اشىلعالى تاجىريبەلى وقىتۋشىلاردىڭ ۇيرەتۋىنىڭ ناتيجەسىندە سۋرەت سالۋعا, كومپيۋتەردەن لوگوتيپ, سەرتيفيكات جاساۋعا مۇمكىندىك العانىن اتاپ وتكەن كوللەدج ستۋدەنتى ولجاس مايلىباي الداعى ۋاقىتتا وسى سالادا كاسىبي ماشىعىن دامىتا بەرەتىنىن ايتتى.
وسى جولى ماماندىعى بويىنشا شەبەرلىگىن دالەلدەپ, «ۇزدىك مەدالون» يەگەرلەرى اتانعان ستۋدەنتتەردى قالا اكىمدىگى قۇتتىقتادى. ءىس-شارا اياسىندا جوعارى كاسىبيلىك كورسەتىپ, فرانتسيادا جاس ماماندار اراسىنداعى «WorldSkills International»-دا جۇلدەلى ورىندارمەن ورالعان 9 ستۋدەنت ماراپاتتالدى.
«Worldskills international» جۇلدەگەرى ميحايل پوپوۆ گيپسوكارتونمەن جۇمىس ىستەيتىن قۇرىلىس سالاسىنا ماماندانعان. ول «Worldskills international» بايقاۋىنا قاتىسىپ, الەم ەلدەرىنەن جينالعان جاس شەبەرلەرمەن بىرگە سايىسقا ءتۇسىپ, جەڭىمپاز اتانعان بولاتىن. ەندىگى كەزەكتە بۇل باعىتتاعى شەبەرلىگىن شىڭداي بەرەتىنىن ايتتى.
وڭتۇستىك استانادا بۇعان دەيىن اشىلعان سەگىز مانساپ ورتالىعىندا ستۋدەنتتەر مەن پەداگوگتەرگە ارنالعان وقۋ-وندىرىستىك ساباقتار, كاسىبي جانە مەن شەبەرلىك سىنىپتارى, سونداي-اق «WorldSkills Kazakhstan» جانە «WorldSkills Almaty» چەمپيوناتتارىنا دايىندىق جاتتىعۋى ءوتىپ جاتىر. بۇل ورتالىقتار بارلىق مۇددەلى تاراپتار, سونىڭ ىشىندە كوللەدجدەرگە ينۆەستيتسيا سالاتىن جۇمىس بەرۋشىلەر اراسىنداعى ديالوگتىڭ دامۋىنا ىقپال ەتەدى. اكادەميالىق ۇتقىرلىق جوبالارى جانە بيزنەس ساراپشىلارىنىڭ قاتىسۋىمەن وتەتىن دەمونستراتسيالىق ەمتيحاندار تۇلەكتەرگە ەڭبەك نارىعىنا نىق سەنىممەن شىعۋعا مۇمكىندىك بەرەدى. مۇنداي قۇزىرەتتىلىك ورتالىقتارى ءبىلىم ساپاسىن ارتتىرىپ, تەحنيكالىق كاسىپتىك ءبىلىم بەرۋ جۇيەسىن دامىتىپ قانا قويماي, جۇمىسشى ماماندىقتارىنىڭ بەدەلىن ارتتىرۋعا ىقپال ەتەرى انىق.
الماتى
