بۇل – ەل شەبىندە جول تالعامايتىن «JAK ت-6» جانە وپتيكالىق-ەلەكتروندىق باقىلاۋ جۇيەسى ورناتىلعان «سوبول» اۆتوكولىكتەرى. تەمىر ارعىماقتاردىڭ كىلتتەرىن جۇرگىزۋشىلەرگە شەكارا باسقارمالارىنىڭ باسشىلارى مەن شەكاراشى ارداگەرلەر تابىستادى.
ەستە بولسا, بىلتىر العاش رەت ساتىپ الىنعان 60-تان اسا «JAK ت-6» جۇردەك كولىگى شەكاراعا ەكسپەريمەنت رەتىندە جىبەرىلگەن ەدى. شەكاراشىلاردىڭ ەل شەبىندەگى جاۋاپتى قىزمەتىندە اتالعان كولىك سىناقتان ءساتتى ءوتىپ, ۇقك شەكارا قىزمەتىنىڭ باسشىلىعى شەكارادا ءداستۇرلى «ۋاز» اۆتوكولىگىن تولىق الماستىرا الاتىن زاماناۋي ۇلگىدەگى تەحنيكامەن جابدىقتاۋعا شەشىم قابىلداعان.
شەكاراشىلارعا كولىك كىلتىن تابىستاۋ سالتاناتىندا ءسوز سويلەگەن ۇقك شەكارا قىزمەتى ديرەكتورىنىڭ ورىنباسارى داۋلەت دۇيسەنبەكوۆ: «شەكارا قىزمەتىن كەزەڭ-كەزەڭىمەن قايتا جابدىقتاۋ اياسىندا اسكەري تەحنيكانىڭ جاڭا ۇلگىلەرى قارالادى, ناتيجەسىندە, مەملەكەتتىك شەكارانى تىكەلەي كۇزەتەتىن بولىمشەلەر وسىمەن ەكىنشى مارتە ەكى ماقساتتا قولدانۋعا بولاتىن وسىنداي اۆتوكولىكتەردى الىپ وتىر. بۇگىن 75 اۆتوكولىك تابىستالدى, بۇل – ءوز كەزەگىندە مەملەكەتتىك شەكارادا قۇقىققا قارسى ءىس-قيمىلدى توقتاتۋعا ەلەۋلى ۇلەس قوسادى», دەپ اتاپ ءوتتى.
سونداي-اق شەكارا قىزمەتىنىڭ وتستاۆكاداعى گەنەرال-مايورى مارات ءماجيتوۆ جول تالعامايتىن اۆتوكولىكتەر شەكاراشىلار ءۇشىن قانشالىقتى ماڭىزعا يە ەكەنىن ايتىپ, شەكارا سوقپاعىنداعى ءوز ەستەلىكتەرىمەن ءبولىستى.
ءىس-شارا اياسىندا ەل اۋماعى بويىنشا وتكەن «جىلدىڭ ەڭ ۇزدىك جۇرگىزۋشىسى» سايىسىنىڭ جەڭىمپازدارى ماراپاتتالدى. باسەكەدە قارسىلاستارىنان وق بويى وزىپ, جەڭىمپاز اتانعان – ماڭعىستاۋ وبلىسىنىڭ قاراقيا اۋدانى بويىنشا شەكارا باسقارماسىنىڭ كەلىسىمشارت قىزمەتىنىڭ قاتارداعى جاۋىنگەرى ق.ەرگەش. قولىنا سۋ جاڭا قىزمەتتىك كولىكتىڭ كىلتىن العان جاۋىنگەر ءوز اسەرىمەن ءبولىستى.
«بۇگىن مەن ءۇشىن جاڭا قىزمەتتىك اۆتوكولىكتىڭ كىلتىن الۋ – زور مارتەبە. بۇل ءسات مەن ءۇشىن عانا ەمەس, مەملەكەتتىك شەكارانىڭ بويىندا قىزمەت اتقارىپ جۇرگەن بارلىق ارىپتەسىم ءۇشىن دە اسا ماڭىزدى. ءبىز «JAK ت-6» جانە «سوبول» سياقتى جاڭا اۆتوكولىكتەر شەكارالارىمىزدىڭ قامتاماسىز ەتۋ بويىنشا تاپسىرمالاردى تيىمدىرەك ورىنداۋعا كومەكتەسەتىنىن تۇسىنەمىز. مەن وزىمە سەنىپ تاپسىرىلعان تەمىر تۇلپارىمدى كۇتىپ ۇستاۋعا ۋادە بەرەمىن ءارى شەكارا بولىمشەلەرىن زاماناۋي تەحنيكامەن جابدىقتاۋعا ايرىقشا كوڭىل بولىنگەنىنە قۋانامىن», دەيدى ق. ەرگەش.
سالتاناتتى راسىمگە كەلگەن قوناقتار سۋ جاڭا كولىكتەردىڭ مۇمكىندىكتەرىمەن تانىسقان سوڭ, تەمىر ارعىماقتار ءوز دەپارتامەنتتەرىنە قاراي جولعا شىقتى.
الماتى
