ء«بىرىنشى كەزەكتە قازاق ەلىنىڭ قوناقجاي, دارقان مىنەزىنە, ەكىنشىدەن بۇگىنگى العان ءبىلىم مەن تاجىريبە ءۇشىن العىس ايتامىن. يممۋنداۋ كۇنتىزبەسىندەگى جاڭا ۆاكتسينالاردى قولدانۋ حالىق اراسىندا كوپتەگەن سۇراق تۋعىزاتىنى راس. وسى ورايدا ءبىز قازاقستانعا ارىپتەستەرىمىزدەن تاجىريبە ۇيرەنۋگە, ءسويتىپ, اتالعان ۆاكتسينالاۋدى ءوز ەلىمىزدە قولدانۋ ءۇشىن كەلدىك. قازاقستان تمد مەملەكەتتەرى ىشىندە مەديتسينا سالاسى ەڭ دامىعان ەل بولىپ سانالادى. كوپتەگەن كۇردەلى اۋرۋدى ەمدەۋ ءۇشىن بۇرىن شەتەلگە شىقساق, قازىر كەيبىر دەرت تۇرلەرىن قازاقستاندا دا ەمدەۋگە بولاتىنىنا كوزىمىز جەتىپ ءجۇر. سونىڭ ىشىندە قاتەرلى ىسىكپەن كۇرەسۋدە قازاقستاننان ۇيرەنەر نارسە كوپ. اسىرەسە شىمكەنت قالاسى سوڭعى جىلدارى مەديتسينادا العا قاراي قارىشتى قادام جاسادى. ۇلكەن مەگاپوليستىڭ بۇل سالاداعى تابىستارى ءبىزدى دە قۋانتىپ وتىر. تاجىكستان رەسپۋبليكاسى 2025 جىلدان باستاپ ادام پاپيللوما ۆيرۋسىنا قارسى ۆاكتسينا سالۋدى باستايدى. وسىعان بايلانىستى قازىردەن باستاپ دايىندىق جاساپ جاتىرمىز», دەدى تاجىكستانداعى يممۋنوپروفيلاكتيكا ورتالىعىنىڭ باس ديرەكتورى فايزالي
باروت.
شىمكەنت قالاسىندا ادام پاپيللوما ۆيرۋسىنا قارسى ەكپە ەگۋ جۇمىستارى ءالى توقتاعان جوق. جوسپار بويىنشا ەكپە الۋعا ءتيىس ءجاسوسپىرىم قىزداردىڭ 50 پايىزدان استامىنا ۆاكتسينا سالىندى. بۇل كورسەتكىشپەن شىمكەنت رەسپۋبليكادا الدىڭعى قاتاردا كەلەدى. بۇگىنگە دەيىن ۆاكتسينا العاندار قاتارىندا جاناما اسەرگە تاپ بولعاندار كەزدەسپەدى.
ايتا كەتۋ كەرەك, تاجىكستاندىق مەديتسينا ماماندارىنىڭ قاتىسۋىمەن وتكەن تاجىريبە الماسۋ ءىس-شاراسىن دۇنيەجۇزىلىك دەنساۋلىق ساقتاۋ ۇيىمى مەن قازاقستاننىڭ دەنساۋلىق ساقتاۋ مينيسترلىگى, سونداي-اق قالالىق دەنساۋلىق ساقتاۋ باسقارماسى ۇيىمداستىرعان. حالىقارالىق دەڭگەيدەگى بۇل كەزدەسۋ مەگاپوليستەن بولەك, تۇركىستان وبلىسىندا دا جالعاسىن تاپتى.
قازان ايىنان بەرى ەلىمىزدە جاتىر موينى وبىرىنىڭ نەگىزگى سەبەبى بولىپ سانالاتىن ادام پاپيللوما ۆيرۋسىنا قارسى قىزداردى جاپپاي ۆاكتسينالاۋ جۇمىسى ءجۇرىپ جاتىر. دەنساۋلىق ساقتاۋ مينيسترلىگىنىڭ مالىمەتىنشە, قازىر رەسپۋبليكا كولەمىندە 57 مىڭنان اسا قىز بالا اپۆ-عا قارسى ۆاكتسينا العان. سونىڭ ىشىندە شىمكەنتتە 5,3 مىڭ قىز بالا ەكپە قابىلداعان. مينيسترلىك ءبىر ايلىق بۇل ستاتيستيكانى جوعارى كورسەتكىش رەتىندە باعالاپ وتىر. دەگەنمەن مامانداردىڭ ايتۋىنشا, ەلىمىزدە جاتىر موينى وبىرىنان بولاتىن قايعىلى وقيعالاردى ازايتۋ ءۇشىن ءالى دە اۋىل-ايماقتاردا ناسيحات جۇمىستارىن جالعاستىرا ءتۇسۋ كەرەك. وسى رەتتە, مينيسترلىك وكىلدەرى مەكتەپتەر مەن دەنساۋلىق ساقتاۋ مەكەمەلەرىندە تۇسىندىرمە جۇمىسىن تۇراقتى جۇرگىزۋگە كەڭەس بەرىپ وتىر. سونىڭ اياسىندا شاھارداعى №52 مەكتەپ-ليتسەيىندە جوعارىدا اتالعان تاجىكستاندىق مامانداردىڭ قاتىسۋىمەن ارنايى جيىن ءوتتى.
جالپى, اپۆ شىرىشتى قابىقتار مەن تەرىنى زاقىمدايتىن ۆيرۋستاردىڭ ەڭ كوپ تاراعان توپتارىنىڭ بىرىنە جاتادى. بۇل ۆيرۋس شىنىندا دا ادام ءۇشىن وتە قاۋىپتى, ويتكەنى ول اعزاعا تەز تارالىپ, جاسۋشالاردىڭ قاتەرلى ىسىگىنىڭ قوزدىرعىشىنا اينالادى جانە قاتەرلى ىسىكتىڭ پايدا بولۋى باستاپقى كەزدە بىلىنبەيدى. سونىڭ سالدارىنان اعزاداعى اۋرۋ تۋدىرعان وزگەرىستەر كوپ جاعدايدا سيمپتومسىز جۇرەدى. ءوز كەزەگىندە جاتىر موينى وبىرى ونكولوگيالىق اۋرۋ بولىپ سانالادى. ستاتيستيكا كورسەتكەندەي جىل سايىن ايەلدەردىڭ 7,5 پايىزى وسى ادام پاپيللوما ۆيرۋسىنان قاتەرلى ىسىككە شالدىعىپ, كوز جۇمادى. ايتا كەتەتىن جايت, ادام پاپيللوما ۆيرۋسىنا قارسى ۆاكتسينا الۋ ءۇشىن ەڭ اۋەلى اتا-انانىڭ كەلىسىمى قاجەت. سوندىقتان ءبىلىم بەرۋ ۇيىمدارىندا وتەتىن وسى تاقىرىپتاعى جيىنداردىڭ باسىم كوپشىلىگىنە اتا-انالار ارنايى شاقىرىلادى. بۇدان بولەك, اپۆ-عا قارسى ەكپەنى اتا-انالاردىڭ قالاۋىمەن قىز بالالار وزدەرى تىركەلگەن ەمحانالار ارقىلى دا الا الادى.
