تۋرنيرگە ەلىمىزدىڭ 13 وبلىسىنان كەلگەن 80-نەن استام قۇسبەگى, 67 بۇركىت, 16 قارشىعا, 14 يتەلگى قاتىستى. موڭعوليا, قىتاي, قىرعىزستاننان كەلگەن شەتەلدىك قۇسبەگىلەر دە ءوز ونەرلەرىن كورسەتتى. جالپى, قاتىسۋشىلار سانى جۇزدەن استى, ولاردىڭ اراسىندا الەمدىك, حالىقارالىق دەڭگەيدەگى جارىستاردىڭ جەڭىمپازدارى مەن تاجىريبەلى قۇسبەگىلەر دە بولدى.
ءتۋرنيردىڭ اشىلۋ سالتاناتىندا ەڭبەكشىقازاق اۋدانىنىڭ اكىمى تالعات بايەدىلوۆ ءسوز سويلەپ, قۇسبەگىلىك ونەرى قازاق حالقىنىڭ مادەنيەتىنىڭ ماڭىزدى بولىگى ەكەندىگىن اتاپ ءوتتى.
«بۇل جارىس – قازاق حالقىنىڭ عاسىرلار بويى جالعاسقان ءداستۇرىن, ۇلتتىق مادەنيەتىمىزدىڭ ءبىر بولشەگى بولىپ تابىلاتىن قۇسبەگىلىكتى دارىپتەيتىن ماڭىزدى شارا. قۇسبەگىلىك – تەك سپورت ەمەس, اتا-بابالارىمىزدان قالعان ۇلى مۇرا, تابيعاتپەن, اڭشىلىق ونەرمەن بايلانىسىمىزدى كورسەتەتىن ەرەكشە ونەر», دەدى اۋدان اكىمى.
تۋرنيردە نەگىزىنەن بۇركىتپەن, قارشىعامەن, يتەلگىمەن اڭ اۋلاۋ اتالىمدارى ساراپقا سالىندى. ءاربىر قۇسبەگى ءوز قۇسىمەن اڭشىلىق ونەرىن كورسەتىپ, ۇلتتىق سپورت ءتۇرىنىڭ ۇزدىك وكىلى اتانۋعا تىرىستى.
«قۇسبەگىلىك – ۇلكەن ونەر, ونى ساقتاپ, ءارى قاراي دامىتۋ ءبارىمىزدىڭ ورتاق مىندەتىمىز», دەگەن قۇسبەگىلىك فەدەراتسياسىنىڭ ۆيتسە-پرەزيدەنتى باعدات مۇپتەكەقىزى تۋرنير قاتىسۋشىلارىنا ساتتىلىك تىلەدى. سايىس اياقتالعاننان كەيىن الماتى وبلىسى اكىمىنىڭ ورىنباسارى بولات كۇرەڭبەكوۆ جەڭىمپازداردى ماراپاتتادى.
سونىمەن قىتاي, موڭعوليا, قىرعىزستان مەملەكەتتەرىنەن, ەلىمىزدىڭ 13 وبلىسىنان قۇسبەگىلەر قاتىسقان «سونار-2024» حالىقارالىق ءتۋرنيردىڭ جارىس ناتيجەسىندە بۇركىت باپتاعان استانا قالاسىنان قاتىسۋشى ەراسىل سەرىكبەك ۇلى اقباس بۇركىتىمەن, جەتىسۋ وبلىسىنىڭ قۇسبەگىسى جاسۇلان بۇركىتباي اقبورتە, اباي وبلىسىنىڭ نامىسىن قورعاعان رينات الىمعازين قاراداۋىل قىرانىمەن جەڭىمپاز اتاندى.
يتەلگى ۇشىرعان قاراعاندىلىق تانات وسپانقۇلوۆ پەن پاۆلودار وبلىسىنان قاتىسقان ەرمەك يمانعازيەۆ جەڭىمپازدار تۇعىرىنا كوتەرىلسە, «قارشىعا» اتالىمىندا الماتى وبلىسىنىڭ قۇسبەگىلەرى بەكسۇلتان سەيىتجان مەن ساعىنىش باەتباي, جامبىل وبلىسىنىڭ قىرانى قانجار يەسى بەرىكبولسىن باباجان ۇزدىكتەر قاتارىنان كورىندى. جارىستىڭ جەڭىمپازدارى مەن جۇلدەگەرلەرى ديپلوم, مەدال, كۋبوك, اقشالاي سىيلىقتارمەن ماراپاتتالدى. جالپى جۇلدە قورى 3 ميلليون تەڭگەنى قۇرادى.
سونىمەن قاتار ەلىمىزدىڭ ەڭبەك سىڭىرگەن ءارتىسى, ءانشى نۇرلان ونەرباەۆ تا جەڭىمپازداردى ماراپاتتاپ, قازاق حالقىنىڭ قۇسبەگىلىك ءداستۇرىنىڭ بولاشاق ۇرپاققا جەتۋىندە وسىنداي شارالاردىڭ ماڭىزدىلىعىن اتاپ ءوتتى.
ءتۋرنيردى ۇيىمداستىرۋعا مادەنيەت جانە سپورت مينيسترلىگى, الماتى وبلىسى اكىمدىگى, الماتى وبلىسىنىڭ دەنە شىنىقتىرۋ جانە سپورت باسقارماسى, «قۇسبەگىلىك» رەسپۋبليكالىق فەدەراتسياسى, «سامۇرىق-قازىنا» ۇلتتىق ءال-اۋقات قورى قولداۋ كورسەتتى.
الماتى وبلىسى
