- ايەلدەر تەننيس قاۋىمداستىعى (WTA) 2024 جىلدىڭ 11 قاراشاسىندا الەمدىك رەيتينگتىڭ جاڭارتىلعان نۇسقاسىن جاريالادى. ەلىمىزدىڭ ءبىرىنشى راكەتكاسى ەلەنا رىباكينا جاڭا رەيتينگتە ءبىر پوزيتسياعا ءتۇسىپ, ەندى التىنشى ورىندا تۇر. الەمنىڭ بەسىنشى راكەتكاسى رەتىندە چجەن تسينۆەن (قىتاي) تانىلدى. قىتايلىق سپورتشى سوڭعى جاقسى كورسەتكىشتەرىنىڭ ارقاسىندا بىردەن ەكى ساتىعا كوتەرىلدى. 11 قاراشاداعى WTA رەيتينگى: 1. ارينا سوبولەنكو (بەلارۋس) – 9 416 ۇپاي; 2. يگا شۆەنتەك (پولشا) – 8 370; 3. كوكو گاۋفف (اقش) – 6 530; 4. جاسمين پاوليني (يتاليا) – 5 344; 5 (+2). چجەن تسينۆەن (قىتاي) – 5 340; 6 (-1). ەلەنا رىباكينا (قازاقستان) – 5 171; 7 (-1). دجەسسيكا پەگۋلا (اقش) – 4 705; 8. ەمما ناۆاررو (اقش) – 3 589. ەلىمىزدىڭ ەكىنشى راكەتكاسى يۋليا پۋتينتسەۆا 29-ورىندا ورنالاسقان.
- بىرىككەن كۇرەس الەمى ۇيىمى سوڭعى جارىستارداعى كورسەتكىشتەردى سارالاپ, ۇزدىك سپورتشىلاردىڭ ءتىزىمىن جاڭارتتى. وعان سايكەس ايەلدەر كۇرەسىنەن ۇلتتىق قۇراما مۇشەسى ءجاميلا باقبەرگەنوۆا ءتورتىنشى ورىننان ەكىنشى ورىنعا كوتەرىلدى. ونىڭ ەنشىسىندە قازىر 45 000 ۇپاي بار. 72 كيلودا ونەر كورسەتەتىن جەرلەسىمىز جۋىردا عانا البانيانىڭ تيرانا قالاسىندا وتكەن الەم چەمپيوناتىندا كۇمىس مەدال العان بولاتىن. ول بارلىق قارسىلاسىن ۇتىپ, فينالدا جاپونيالىق امي يسيگە عانا ەسە جىبەردى. الەمدىك رەيتينگتىڭ دە كوش باسىن وسى يسي باستاپ تۇر. ۇزدىك ۇشتىكتى رۋمىنيالىق الەكساندرا نيكولەتا انگەل تۇيىندەدى. ايتا كەتەيىك, ءجاميلا وسىمەن الەم چەمپيوناتتارىندا قاتارىنان 4 جىل جەڭىس تۇعىرىنان كورىندى. بۇعان دەيىن 2021, 2022 جىلدارى كۇمىس السا, 2023 جىلى قولا جۇلدەگە قول جەتكىزگەن بولاتىن.
- كاسىپقوي بوكسشى يۆان دىچكونىڭ كەلەسى كەزدەسۋىنە قاتىستى اقپارات شىقتى. ول 27 جەلتوقسان كۇنى الماتى قالاسىندا وتەتىن بوكس كەشىندە ونەر كورسەتەدى. بۇل جونىندە جاۋاپتى پروموۋتەرلىك كومپانيا مالىمدەدى. دىچكو سوڭعى جەكپە-جەگىن بيىل تامىز ايىندا امەريكادا وتكىزدى. ول جەرگىلىكتى كرەيگ ليۋيسپەن كەزدەسىپ, ەكىنشى راۋندتا قارسىلاسىن نوكاۋتپەن جەڭدى. جالپى, يۆان بۇگىنگە دەيىن كاسىپقوي رينگتە 13 كەزدەسۋ وتكىزىپ, 13-ىندە دە باسىم ءتۇستى. ءتىپتى ونىڭ 12-ءسىن ۋاقىتىنان بۇرىن اياقتادى. دىچكونىڭ كەلەسى قارسىلاسىنا قاتىستى ازىرگە ناقتى اقپارات جوق. ەسكە سالا كەتەيىك, بىرەر اي بۇرىن سپورت پورتالدارى «قازاقستاندىق يۆان دىچكو مەن وزبەكستاندىق ءباحادۇر جالولوۆ كەزدەسۋى مۇمكىن» دەگەن مالىمەت تاراتتى. قوس مىقتى اۋەسقوي بوكستا 4 رەت كەزدەسىپ, 4-ەۋىندە دە جەرلەسىمىز جەڭىسكە جەتتى. قازىر ەكەۋى دە كاسىپقوي بوكستا ونەر كورسەتەدى.
- كوكشەتاۋدا سپورت شەبەرى اسقار ساتىباەۆتى ەسكە الۋعا ارنالعان جاستار اراسىندا بوكستان حالىقارالىق تۋرنير ءوتتى. ەرلەر اراسىنداعى مەدالدەر 46-دان 92+ كيلوعا دەيىنگى ون ءتورت سالماق دارەجەسىندە ساراپقا سالىندى. جارىس قورىتىندىسىندا ەلىمىزدىڭ بوكسشىلارى ون ءۇش التىن مەدال جەڭىپ الدى. الىشەر ءارىپجان (46 كگ), نۇربەك ازادوۆ (48 كگ), بەكسۇلتان كوپبەرگەنوۆ (51 كگ), ءالي مەرەكە (60 كگ), مۇحامەدالي قاليەۆ (63,5 كگ), تاگير ساتاەۆ (67 كگ), بەكارىس نۇرمۇحان (71 كگ), جاندوس الپىسباەۆ (75 كگ), امانجول يمانعاليەۆ (80 كگ), باقىتجان ايتمۇحانوۆ (86 كگ), ەرجات تىلەۋجان (92 كگ), نۇرسۇلتان جولداسبەك (92+ كگ) سىندى بوكسشىلار جەڭىس تۇعىرىنا كوتەرىلدى.ء بىرىنشى ورىن العان جالعىز قوناق وزبەكستان وكىلى بولدى. 57 كيلوعا دەيىنگى سالماق دارەجەسىندە سىنعا تۇسكەن دجامشيد دجابباروۆ التىننان القا تاقتى.
- الماتى قالاسىندا باسكەتبولدان 15 جاسقا دەيىنگى ۇلدار اراسىندا كۇزگى ىشكى بىرىنشىلىك ءوتتى. ەلىمىزدىڭ ءار وڭىرىنەن كەلگەن 15 كوماندا الدىمەن توپتىق كەزەڭدە ءوزارا مىقتىنى انىقتادى. ۇزدىك شىققان ءتورت كوماندا جۇلدەلى ورىنداردى ساراپقا سالدى. الدىمەن قولا جۇلدە ءۇشىن قاراعاندى, اتىراۋ كوماندالارى كەزدەستى. سارىارقا باسكەتبولشىلارى تارتىستى ويىندا تاباندىلىق تانىتىپ, 70:54 ەسەبىمەن جەڭىسكە جەتتى. ال باس جۇلدە ءۇشىن الماتى جانە شىمكەنتتىك ورەندەر شەبەرلىك بايقاستى. باستاپقى كەزەڭدە الاڭ يەلەرىنىڭ قارقىنى كۇشتى ەدى. ۋاقىت وتە شىمكەنتتىكتەر تىزگىندى قولعا الىپ, قارسىلاستارىنان ۇزاي بەردى. ماتچتىڭ قورىتىندى ناتيجەسى – 61:31. وڭتۇستىك ورەندەرى ەل چەمپيونى اتاندى.
