كوللاجدى جاساعان – قونىسباي شەجىمباي, «EQ»
ەپيدەميولوگيالىق قىزمەت وبلىستا جرۆي-ءدىڭ 14 920 جاعدايى تىركەلگەنىن جاريالاپ, ءبىر جاقسىسى, ونىڭ وتكەن جىلدىڭ سايكەس كەزەڭىمەن سالىستىرعاندا 14%-عا تومەندەگەنىن ايتادى. بيىل ناۋقاستاردىڭ ەڭ كوپ بولىگى 14 جاسقا دەيىنگى بالالار اراسىندا بايقالعان. سانىن ايتار بولساق – 9 847 نەمەسە بارلىق سىرقاتتانۋشىنىڭ 66%-ى. بۇل كوبىنەسە جاسوسپىرىمدەردىڭ اۋا رايىنىڭ ىزعارىن سەزبەي, دەنەسىنىڭ بۋسانعان كۇيىندە دالاعا ءجيى شىعىپ كەتەتىنىنىڭ كەسىرىنەن ەكەن.
سوڭعى اپتادا جرۆي-ءدىڭ 2 773 جاعدايى تىركەلىپ, الدىڭعى اپتامەن سالىستىرعاندا 1,5 ەسەگە وسكەن. ءبىر قىزىعى, جاڭا ەپيدەميالىق ماۋسىم كەزەڭىندە تۇماۋ جاعدايلارى تىركەلگەن جوق. الايدا جرۆي-مەن اۋىراتىن ناۋقاستاردان پتر ادىسىمەن باسقا, تۇماۋعا جاتپايتىن ۆيرۋستاردىڭ بارى انىقتالعان. ولاردىڭ اراسىندا پاراگريپتىڭ 8 جاعدايى, رينوۆيرۋستىڭ 12 جاعدايى, ادەنوۆيرۋستىڭ 7 جاعدايى, مەتاپنەۆموۆيرۋستىڭ 2 جاعدايى, بوكاۆيرۋستىڭ 3 جاعدايى بار. تۇماۋ مەن جرۆي-مەن سىرقاتتانۋشىلىعىنىڭ ەتيولوگيالىق وقىلۋىن ۇلتتىق ساراپتاما ورتالىعى وبلىستىق فيليالىنىڭ ۆيرۋسولوگيالىق زەرتحاناسى انىقتايدى.
تۇماۋ جوعارى تەمپەراتۋرانىڭ كەنەتتەن پايدا بولۋىمەن, جوتەلمەن (ادەتتە قۇرعاق), باس اۋرۋىمەن, بۇلشىق ەت پەن بۋىننىڭ شانشۋىمەن, ەشتەڭەگە زاۋقى بولمايتىن السىزدىكپەن, تاماق اۋرۋىمەن, مۇرىننىڭ سۋلانۋىمەن سيپاتتالادى. قازىرگى ۋاقىتتا تۇماۋدىڭ الدىن الۋدىڭ ءتيىمدى ادىستەرىنىڭ ءبىرى – ۆاكتسيناتسيا. تۇماۋعا قارسى ۆاكتسيناتسيا نەگىزگى اۋرۋدىڭ اسقىنعان اعىمىنان, اۋرۋحاناعا جاتقىزۋدان, توسىن جاعدايدان قورعايدى.
1 قازاننان 31 قازانعا دەيىن وبلىستا تۇماۋعا قارسى يممۋنداۋ ناۋقانى وتكىزىلگەن. تاۋەكەل توبىنا جاتاتىن ادامدارعا ارنالىپ رەسەيلىك «گريپپول پليۋس» ۆاكتسيناسىنىڭ 60 مىڭ دوزاسى ساتىپ الىندى.
«بۇگىندە تاۋەكەل توبىنا جاتاتىن ادامدار 100% (60 000 ادام) ەگىلدى. سونىڭ ىشىندە: 8 502 مەديتسينا قىزمەتكەرى, 495 جۇكتى ايەل, 5 262 وقۋشى, مەديتسينالىق ۇيىمداردا ديسپانسەرلىك ەسەپتە تۇرعان 20 985 ادام, جابىق ۇلگىدەگى مەكەمەلەردەن 1 671 ادام (بالالار ۇيلەرى, سابيلەر ۇيلەرى, قارتتار ۇيلەرىنىڭ كونتينگەنتى), ەپيدەميولوگيالىق كورسەتكىشتەر بويىنشا 23 085 ادام: 6 ايدان 2 جاسقا دەيىنگى بالالار, 60 جاستان اسقان ادامدار. تۇماۋعا قارسى ۆاكتسينامەن قامتۋ ۇجىمدىق يممۋنيتەتتى قالىپتاستىرادى, ەپيدەميانىڭ جايىلۋىنا جول بەرمەيدى», دەدى ءا.جۇماتاەۆ.
سونىمەن بىرگە مامان تۇماۋعا قارسى ۆاكتسيناتسيادان باسقا, ارناۋلى ەمەس پروفيلاكتيكانى نازاردان تىس قالدىرماۋ كەرەكتىگىن دە ايتتى. ونىڭ ايتۋىنشا, اۋىرىپ قالماس ءۇشىن بەتپەردە كيۋ, الەۋمەتتىك قاشىقتىقتى ساقتاۋ, مۇمكىندىگىنشە ادام كوپ جينالاتىن جەرلەرگە بارماۋ, جەكە گيگيەنا ەرەجەلەرىن ساقتاۋ قاجەتتىگىن ۇنەمى ەسكەرۋ كەرەك. بۇلاردان باسقا قولدى سابىنمەن مۇمكىندىگىنشە ءجيى جۋدىڭ دا پايداسى كوپ.
جرۆي مەن تۇماۋعا قارسى يممۋنيتەتتى بارلىق قولجەتىمدى تاسىلمەن دە كوتەرۋگە بولادى. دەنە شىنىقتىرۋ, جۇمىس, دەمالىس رەجىمىن ساقتاۋ, تولىققاندى ۇيقى, ميكروەلەمەنتتەر مەن دارۋمەندەردىڭ, اسىرەسە «س» ءۆيتامينىنىڭ, سارىمساق پەن پيازدىڭ جەتكىلىكتى مولشەرى بار تاعامداردى قولدانۋ كەرەك. «ال اۋىرىپ قالعان جاعدايدا دالاعا شىقپاي, قوناققا بارماي, ۇيدە بولۋ, دارىگەر شاقىرىپ, ينفەكتسيانىڭ ودان ءارى تارالۋىن بولدىرماس ءۇشىن بالدىرعانداردى بالاباقشاعا, وقۋشىلاردى مەكتەپكە دە جىبەرمەۋ كەرەك», دەدى مامان.
پەتروپاۆل
